才:玩弄恐懼的公關手段

14六月09

豬流感疫症於全球各地蔓延,香港亦都終於出現左社區感染既個案,由抗疫發展至援疫既新階段…特區行政長官曾蔭權亦都專登縮短外訪行程,番到黎香港,宣布全港所有幼稚園及小學停課…當然,任何drastic既動作都會做成一d社會既反響,係一時之間停課,亦都自然會引業好多家長既反對…

好大程度上…由於豬流感既殺傷力明顯地及唔上沙士,再加上政府有左處理沙士既經驗,所以政府係處理豬流感既手法上就較為成熟…甚至,可以講係可以空出對手出黎「玩火」,利用豬流感去玩公關手段…

香港係03年曾經出現沙士,當時既境況對於好多既香港人來講,係一個慘痛既集體回憶,而政府其實係處理豬流感既時候,其實好多野都係以沙士果一次既處理方法作為反面教材…

就好似之前中國南部傳出沙士出現既時候,香港選擇避而不見,甚至不向中央政府作出求證,之至之後居然要內部討論,是否要將SARS既A拎走,以避免同特區既英文簡稱混為一談…今次係發現第一個豬流感確診患者既時候,政府使出重手,甚至不顧國際形像以至有關措施對香港旅遊疫既衝擊,選擇封閉酒店七日,實施嚴密隔離…

政府利用左市民對於沙士既記憶,將豬流感既危險性推到頂峰,在市民既恐懼記憶之下,加上五月初既時候公眾對豬流感既認識不多,政府既重手抗疫措施獲得公眾既支持…政府既民望一時之間推高…就連民望一直俳佪係低位既周一鑊,亦都一時之間成為民眾仰望信賴既有能官員…

不過,所有既民望,隨著一向缺乏政治智慧,尤其唔識打「順境波」既曾特首一句「我代表香港人」而付諸東流…面對住六四二十周年集會出席人數出現歷史性既新高,以至七一遊行顯得來勢洶洶(事實上,AK認為依個睇法其實不符合正常既推算…畢竟,今年既七一欠缺左有力既議題去支撐…),政府需要一個新既機遇,去展示強勢領導既作風…其中,豬流感正係一個相當合式既議題…於是就特登等曾蔭權係外地趕返香港,由佢出面宣佈全港停課措施…做就一個「榮耀盡歸曾蔭權」既場面…

如果有留意當日既記者會…曾蔭權一宣布完有關既措施之後,就即時叫孫明揚出場…甚至唔留係現場回答記者既問題…依個明顯就係「功就我領,鑊就你揹」既setting…

不過到左今時今日,大眾對於豬流感既了解增加,恐懼減少,加上上次封鎖酒店隔離既影響始終係「針唔吉到肉」,而今次忽然停課…有關既家長就直接受到衝擊…所以,利用恐懼既公關手段,有關既「如意算盤」係唔係真係可以敲得響…AK就有相當既保留…

至於講到政府抨擊迪士尼…在下認為,迪士尼既做法有一定既問題,但係其實政府唔需要出聲,只要將件事交俾大眾評價就已經足夠…更加唔應該由作為官員既周一嶽去出聲…畢竟,香港係一個奉行自由經濟既商業社會,政府係唔應該涉入於市場既運作…

其實,市民會對疫情有本身既評估,佢地會計算染疫既風險,以及帶同兒童去迪士尼睇史迪仔既收益,作出本身既選擇…唔需要政府日鵝夜鵝,指指點點,如同一個八婆一樣…

廣告


5 Responses to “才:玩弄恐懼的公關手段”

  1. 我很陰謀論的認為其實這次是做戲咁做。

    如果要驚,這裡有死人添,我應該是最驚那一個。市長彭博最近也常蒲頭拉票連任,佢都無叫全面停課。

  2. 自沙士一役,政府玩呢D"labelling the big baddies"愈玩愈熟。

    不過話時話,而家D家長又係果種出左事就話 “你又無警告我地唔好乜乜乜,迪記又係政府的,你地要負責",所以AK兄話由市場用家決定呢一點,嗯… 決定去果下咪work囉,出左事果下咪唔work囉… XDDD

  3. 3 AK

    讀食,
    今次好明顯係政府見第一棍「毆」得咁應,於是想乘勝追擊…不過,AK覺得佢有d玩火…甚至過左火(迪士尼單野)…

    智嘉兄,
    如果唔係個政府本身虛怯,就唔駛咁驚果d刁民既睇法啦…

  4. 4 eeb

    我又認為迪係抵鬧bor.

  5. 5 AK

    直嫂,
    唔係話迪迪尼唔抵鬧,但係唔應該由一個政府官員出口…是非自有公論…政府官員干涉自由經濟是相當「不該」的行為…


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: