色:從「靚模」看「港男」

29五月09

早前一頓晚飯,與友人閒聊之間談及香港近日以來既「靚模」現象…

雖然,不少人近年均會以「港女」來形容在性格上存在特定缺憾的香港女生,然而,其實香港這個曾經以港產電影向海外輸出本土文化的城市,亦曾經出過不少的美女,就如張曼玉既氣質,鐘楚紅既驚艷…然而,今時今日,在香港的銀幕上經已再難以找到這些可以作為港產女性代表作的人物…反而,我們現時的市場上充斥的,是一個又一個的「靚模」,例如Angelababy,Janice Man,Kama,周秀娜,趙碩芝…雖然,我們現在還可以有周迅,李冰冰,范冰冰,徐靜蕾…但她們都是來自北方的佳麗,欠缺了香港的本土風味…當然…泊來品還有林志玲…

觀乎外國,當然…AK作為一個正常男人,自然會留意Megan Fox,Keria Knightly,Scarlett Johansson,Jessica Alba,Eva green,Liv Tyler…etc etc etc…但係係外國仲有好多唔同既選擇,影后Kate Winslet,Charlize Theron,Gwyneth Paltrow以至Penelope Cruz…基本上都係AK會留意既…

就算講日本,果邊當然有不少的「幼齒」,「水著」,以「萌」會友既幼年女星(有時AK會以為佢地係童星)…但係睇番唔少既日劇又或者係日本電影,主流而較有觀眾緣既…普遍都係會去到2X,而且佢地走既路線通常都會同佢地幼年出道既時候有一定既差別,就以多個離開morning 娘之後獨立發展既藝人而言,我們也會看到他們與morning娘時代有所不同…

當然,人家的市場遠遠比香港龐大,可以容納不同的類型…但為什麼近年以來,香港市場中充斥既,都係同一類型既…例如初出道既張柏芝,twin,之後cookie既走音姊妹,各式味之天使,聲之天使,美少女廚神以及一大堆一大堆既「靚模」…如此一種產品可以係一個市場之中佔有主流性地位,反映了他的受眾,對像,所喜好的品味…即係咁講,就算今時今日,有另一個張曼玉,鐘楚紅,林青霞,關芝琳,王祖賢…應該都無可能好似佢地既原版一樣,一下子獲得市場既成功…所以,AK認為,產品上既變化其實不大,反而是市場上的口味變化,影響了不同產品類型的成敗…

咁…研究「靚模」依一個產品類型…首先,他們在面孔上,當然是「顏之可愛」,但係普遍來講,佢地唔係琦琦,熊黛琳,周文琦,楊琤果一個type…你唔可能叫佢地去做一個high fashion既show,因為,普遍既「靚模」,雖然面容及五觀上的確精緻,但係佢地有一種洗唔去既MK味…即係用個好聽既字眼就叫做鄰家女孩feel…更加貼切既形容詞,其實係普通…行走MK多年既AK可以好肯定,不少既「港女」如果出盡十成功力咁去化裝同堆砌…雖然未必係一百,但係都可以有八十…

第二點…通常,普遍係各式對答之中,「靚模」會表現得相當之innocent…當然,處身於香港這個大染缸之中,innocent極有限…而且,通常都習染左依個城市普遍任何男女都有既特質:「串」…但係整體來說,就是極力地表現出他們的年青…進一步推演是入世未深…更進一步既推演就係…無咩腦…又或者咁講…有無內涵,並唔重要,如果真係要講既…無,會比有更加好…(當然,其實係現實中,搏出位又點可以無機心而innocent呢?)

第三點…「靚模」上位既必殺技…係露肉…近年香港既男士,對於胸圍呢碼既理解愈來愈精密…以前細個睇港姐…一般既報法都係32-23.5-33.5…依家就一定唔少得到底係D定E定F…甚至要係G…各式周刊既封面,依家最常用既顏色,就係肉色…

審視過市場上眾多既成功產品之後,我地就可以對目標市場受眾既品味作出一點分析…就咁講…香港既男生會偏好依家充斥市場上既一系列「童顏巨乳靚模」,歸根結底唔能夠唔承認係一個sex object既投射…即係咁…警方都有教啦,賊仔偷野,會搵一d易得手既target…所以,MK Look(市場上供應充足)+innocent(較易擺平)+不設防式露肉(表面好Open…)自然較受市場接受…相反…好多男人都知…熊黛琳同藤原紀香都好靚…不過都會明白自己唔係天皇…所以唔敢高攀天皇嫂…

當然…用到天皇嫂依個級數既例子,好似係有d唔係好relevant…但係個重點係…唔敢高攀…對於依家社會上經上出現女尊男卑既情況,唔敢高攀既問題就顯得更加嚴重…愈來愈多既無用鬼明知自己「降」唔掂d「港女」(以無用鬼既語言來說…),於是傾向一些較常見,較易搵手既target…

所以,講到尾,市場上呢一類型既產品充斥壯大,反映左香港既男人愈來愈自卑,愈來愈軟骨頭同埋無承擔…他們通常不會去考慮改進自己,以熊黛琳作為目標(to be a better man),而係會走去搵d貌似innocent既作為獵食對象…當然,通常,佢地既結果都係不幸既居多…

所以,在下好同意…一眾「港女」覺得依個城市既「港男」好難揀得落手…因為…今時今日,係market入面available既…的確係一d次貨…

今次講左女性產品反照之下既男性受眾…下一篇…又反轉頭,講下男性產品反照之下既女性受眾先…

廣告


18 Responses to “色:從「靚模」看「港男」”

  1. 1 eeb

    “張曼玉,鐘楚紅,林青霞,關芝琳,王祖賢" 都唔係用黎"高攀"架啦,新一代既本土"藝人"真係無歌星無影星。

  2. 近期女星我鍾意… 林嘉欣、張靜初、林心悠喎,雖然唔算爆燈,但勝在夠親切唔MK… 但係都唔係本地產…陰功…

    仲有個湯唯!(係楂HKID,不過又係國產…)

    呢期講童顏巨乳,真係要講下阿楊CK個廣告…

  3. 3 AK

    直嫂,
    即係咁講,對於君子依個目標,「雖不能至,心響往之」,之後一路一路努力,最終可能都成為唔到君子,但係都應該可以有所改進…所以…張鐘林關王依d都係target吧了,總好過一開始就以d「靚模」做target…

    智嘉,
    依度講緊既…係主流選擇…所以…雖然AK既口味唔係「靚模」…但係…無計囉…

  4. 我覺得背後推呢班靚妹出嚟的才有問題。

  5. 5 terence

    其實香港的靚模,即使內地、台灣甚至日本,其實都好興下,去睇下moko.cc呢個網站,但絕對國產,或者台灣正牆妹等等,個個都扮到kawaii架。
    所以這個現像的普遍性其實是亞洲區居多,歐美真係好少出靚模就真,反而個個都wild模。
    內地的名模則個個都好專業,一個天皇嫂論身型都贏九條街。早前同朋友在老蘭玩,識左內地名模,佢地真係好鬼高架,台型的確無得講。

  6. terence:

    外國不是沒靚模,不過,鬼妹細細個已可以生到神高神大,外型一點已不像靚妹了。如果要找一些樣子很嫰的,隨時十歲以下,我怕人地告你虐兒。

  7. 7 AK

    讀食:
    推出對應市場需求的商品並沒有問題…關鍵仍然是…「有怎樣的市場才會有怎樣的產品」,而不是「有怎樣的產品製造怎樣的市場」…商人對應市場需求,尋求利潤是應有之義…

    Terence:
    首先…這一篇既重點,在於從市場上受歡迎既產品,反照出市場的性質…故此,其他地方是否存在相同情況,一定程度上不相干…

    另一方面,正如文中指出,日本,台灣甚至內地存在「靚模」,但他們的市場較香港大,同時存在真更多不同的類型,而且,他們的「靚模」最終是會轉型,而不是由始至終走「靚模」路線(Morning娘的例子)…而一線的女星,通常不會是「靚模」型態…

    相反…你做一個簡單統計…看看雜誌封面,報紙娛樂版,再和內地,台灣,日本做個比較,你就會明白香港「靚模」在市場上所佔既position…

    讀食:
    都係果句…歐美有「靚模」,但不同於香港現時的「靚模」現像…

  8. 哈哈, 等你篇男性產品佈告!

  9. 9

    嗯… 我從來都覺得潮流好似風水輪流轉咁
    一排興窄腳褲,一排興喇叭褲,(當然過度期中間有直腳褲喇)
    所以好自然一排興身材瘦小型,一排興豐滿型
    不過呢D又同人既生理構造有關
    當一排成日食得清淡,遲d又會想食返D煎炸野一樣
    呢D係人既生理構造,當某種刺激過度左,就會覺得fed up想要令一種刺激

    同理男星方面,當年興完屎太隆、阿諾豬華D筋肉人型之後
    又興D李擦基老D公子哥兒型,呢D野係梅花間竹咁輪住黎興

    至於主流產品同市場既互動呢一點呢,我覺得又同地域性有關:

    首先男人方面,香港自7-80年代急速發展
    不論地域空間或人同人之間既心靈空間都好狹窄
    冇咩私人空間可以比人建立自己既一套
    加上香港既教育制度係好似工廠帽咁bear D同一類型既人出黎
    以前考試講model answer,依家連通識科呢D比較free既科目都講統一計分
    當咩都講team work咩都一樣,一D個人風格都冇,學生冇獨立思考空間既時候,
    又點會有需要同點可能會做就到一D可以企出黎有擔當既男人出黎比呢個社會?

    以前當社會風氣重比較封閉,中國男人比較大男人既時候
    女性渴望有d比較在意佢地感受既小男人,於是80年代起小男人應運而生
    不過既然依家客戶口為轉變,相信遲d就會有大男人類型產品就會一窩風咁出
    再過一排又會再興返小男人架啦

    另外,女性方面…
    可能香港水土問題,從來人既身型不論男女都係偏瘦既多
    香港人口又得果幾百萬,同台灣大陸日本果D千萬計億計既冇得比
    如果一百萬人裏面出一個美女(或醜女),其他地方既美女(或醜女)點都多過香港
    (咁當然,會為人所注意又大肆宣傳既只有美女)

    香港社會對待女性既風氣方面
    可能同多年黎娛樂圈對待豐滿身型女性既態度有關
    以前稍為豐滿D既明星好似大白鯊咁,唔係淪為諧星就係三級片星
    (不過後者多數都係國產既多)
    所以香港主流一向以偏瘦既女星為主

    係近年外地女星、外國地長大既港人第二代大舉進軍香港娛樂圈同模特兒界
    豐滿身型既女星同模特兒先漸漸成風
    所以偏瘦女星潮流過後,近年先興起豐滿升cup潮
    過幾年呢個潮流過後,相信又係瘦身人既天下

    至於歐美「靚模」方面,都係果句
    人地既人口數目比較大,咩類型既模特兒都有生存空間
    不過靚呢個字比較含糊
    據了解歐美同亞洲對靚既定義稍有出入
    除左比較國際性既亞洲女星之外
    曾有台灣演藝人表示,亞洲人眼中既美女係西方不甚吃香
    反而係亞洲人覺得唔太靚既到左外國就好受歡迎云云

  10. …「有怎樣的市場才會有怎樣的產品」,而不是「有怎樣的產品製造怎樣的市場」…

    呢點有商榷的地方。我只想到以前英國向中國傾銷鴉片時,難道中國那時已有龐大的吸毒市場?現在的市場難道想要聽那些走音唱歌的人(不知怎稱呼他們)?(或者咁講,那班擁護者其實不是想聽歌,只是想睇靚女,識張開口露肉那種)

    不知是否我敏感,我覺得開風氣之先,推出這班不知所謂藝人的幕後是英皇。

  11. 11 AK

    Marshmallow,
    男性產品報告經已推出…

    奕兄,
    的確,產品未有因為市場而出現變化,而是市場本身的口味出了變化,所以一d以前sell得既,今日變得唔sell得…其實市場會變本身並無不妥…AK有興趣的,是「為什麼會出現這樣的變化?」與及「這些變化反映了什麼?」

    讀食,
    關於「有怎樣的市場才會有怎樣的產品」,而不是「有怎樣的產品製造怎樣的市場」…這個論點,其實AK之前已經多次反複論證…

    「以英國人輸入鴉片到中國,從道德角度而言,鴉片是有害身心,弱化文族的毒品,英國向外國出口毒品自然大有問題,但是,從一個單純經濟學之角度去考量,則只是一件簡單的商品貿易。正所謂,「有強姦,無焗賭」,中國人是明知毒品之禍害(第一個人可能無知被騙,但去到一個國家的層面,中間有多重不同階層之利益考量之後讓毒禍蔓延),選擇去繼續吸食,甚至舉國上下任由毒禍橫流…每一個人都要為本身的行為負責,現在不是英國紅毛鬼捉你去餵毒,是中國人自己決定奉上白銀絲綢交換鴉片…誰應該為中國人吸食鴉片誤國負責,實在明白不過…

    回歸基本,媒體以煽色腥的方式處理新聞,是媒體按市場供應產品的貿易行為,作為受眾,絕對有權去選擇採其他路線處理新聞之媒體,現在的發展是,煽色腥成為市場的主流,媒體需要投入煽色腥中爭取市場份額,競逐第一大報之寶座,責任是供應產品的媒體,還是讀者應該為本身的選擇負上最大責任,不言自明。」

    同一個分析,亦可以apply落去「靚模」現象之上…如果沒有這麼一個市場,英皇的手段再高也不可能硬將一個市場唔受的藝人捧紅…走音歌手的成功,即係市場當時根本不在乎你是否走音,而是在乎其他…

  12. 我明白你講什麼,即是自作孽,不可活。咁做乜要搵我們呢班人來陪葬。我不想看(口靚)模架,也不想聽走音藝人唱歌,更不喜歡看女藝人個個趴低露肉,也覺得那些不識字的人寫書是浪費紙張……

    其實你講的市場,是不是指時下的年青人呢?

  13. 13 AK

    讀食:
    在下指既,係主流市場,一般來講,主流市場是不會照顧小眾需要的,因為小眾不能支撐龐大的產品開發及製造成本…除非有一日,小眾的數目達到一個critical mass的水平,我們才會見到對應這個小眾需要的產品出現…這種情況,必需要有一個較龐大的市場基數,才可以容許有所謂的「雅俗共賞」…which…依一點係香港一向都係好難發生既…所以,小眾在香港是極難找到對應本身需要的產品,故有「陪葬」之嘆…

  14. 14

    >是「為什麼會出現這樣的變化?」與及「這些變化反映了什麼?」

    嗯…我一向覺得ㄧ件事好少由"單一因素決定一切"。每個case都係由佢獨特既環境中唔同既因素組成。就藝人質素同本地時下潮流而言:

    經濟上- 當舊產品銷售出現飽和既時候(以前實力派既骨感氣質女藝人觀眾睇厭左),就會推出一D唔同類型既產品(咪推D偶像派既童顏巨乳女模出黎囉)姑勿論質素如何,目的都係為左揾錢。尤其今時今日豐滿女藝人可以多D出路而唔係只有以前既三級、搞笑路線,更加容易滲透係各層面,所以感覺上好似好氾濫咁。

    社會上- 不過今時唔同往日,以前社會"相對地"冇咁功利,都仲有時間比D偶像派既藝人磨多十年八載轉型為實力派。依家商家既態度係揾快錢/快餐文化,邊個炒得起就捧邊個上位。見唔惦就即刻捧過第二個。完全以揾快錢既經濟利益為主導。特別本地一個特色就係商家不約而同地都係賣同一樣野-服飾潮流尤其明顯。

    心理上- 羊群心理特別容易出現係一個人口密集既社會,特別係當一批被人盲目公認為潮流領導者(公眾人物及商家)以包裝廣告等手法不斷地同消費者洗腦後,又有傳媒為廣告同銷售利益大肆報道… 群眾係"別無選擇既情況之下",本來不值一顧既話題就好容易被炒作成全城熱話。

    消費者責任
    加上大部份本地消費者都係盲目追求名牌既羊群,(本來人崇尚"名牌"呢種心理係可以理解,因為名牌本來暗含質素保證既意思。不過本地人盲目地追求果D所謂名牌限量版產品及其收藏價值既瘋狂程度可見一斑。)所以某程度上,都要有D咁冇腦既消費者,先可以造就D咁無良既商家推出時下D咁不知所謂既產品。

    商家責任
    好似無線咁,早幾年係咁谷D新人上位,觀眾睇厭左,咪揾返D老戲骨出黎囉。不過咁係咪就話市場主導商家呢,可以話係,亦可以話唔係。因為決定權完全係商家度,觀眾根本冇咩的揀。如果無線唔揾D老野拍戲,大家都係局住睇佢架喇。係冇其他選擇既情況之下,到頭來又咪係成為全城熱話?本地市場一向狹窄,果期興D咩,就所有同類商鋪都係賣果種產品。消費者可以話根本冇乜得選擇。

    所以呢D野係相輔相成,好難話係商家或者消費者單方面造成。同理,鴉片問題方面,買賣雙方都有責任。販賣毒品既固然罪大惡極(冇人賣邊有得食),吸毒既亦難辭其咎(冇人食固然賣唔成),所以冇咩話邊個責任大D。

    講返轉頭,好既、有潛質既藝人唔係冇,不過需要時間去浸,商家投放資源相對冇咁大,同回報會比較慢。係快餐文化下出品藝人既廣告報導鋪天蓋地攻勢下一D有潛質但比較"低調"既藝人就會冇咁高見報率。不過咁並唔一定代表佢地唔存在,只不過係"隱形"左遮。等依家個賣肉偶像潮流興完,D人覺得厭囉,咪又會興返D氣質既實力派囉。但係現今咁勢利既社會經濟文化當中,究竟本地有冇足夠時間同生存空間培育D實力派藝人出黎確係一個好大既疑問。

  15. 15

    請問點為之"陪葬"呀?

    嗯…就個人而言,本地音樂方面自四大天王之後再冇咩有代表性既人物,D歌亦唔特別好聽。所以都冇聽本地音樂好耐喇。果D所謂既音樂節目,見到都即刻轉台喇。仲坐係度比D走音歌手虐待隻耳仔咩?電視亦冇野值得睇,不過自從高清廣播之後兩台都多左兩個專播日、韓、台劇同綜藝節目既頻道,依家成日都睇果D節目多。

    如果你話係睇到果D走音歌手同露肉女藝人想死,咁我應該冇自殺傾向囉。

  16. 16 AK

    奕兄,
    在下無排除有其他因素影響,不過係點出,依家存在既產品,反映左一個點樣既市場情況…

    當舊產品銷售出現飽和既時候(以前實力派既骨感氣質女藝人觀眾睇厭左),就會推出一D唔同類型既產品(咪推D偶像派既童顏巨乳女模出黎囉)–>但係,點解會係依一個產品,而唔係另一個產品呢?企業在推出產品之前,一定唔會唔study個market,一定會係認定某一個產品市場接受的機會率攲高,先會推出有關產品…咁,點解係A,唔係B?

    邊個炒得起就捧邊個上位。見唔惦就即刻捧過第二個。完全以揾快錢既經濟利益為主導。–>在商言商,相信閣下不會慢慢去煲一隻不為市場接受既產品,尤其係,延續一隻產品既壽命係要不停付出代價的話…

    以包裝廣告等手法不斷地同消費者洗腦後,又有傳媒為廣告同銷售利益大肆報道… 群眾係”別無選擇既情況之下”,本來不值一顧既話題就好容易被炒作成全城熱話。–>廣告洗腦戰術是企業捧紅一隻產品的正常策略,沒有什麼問題。「別無選擇的情況下」這句說話並不成立,因為市場上永遠存在其他選擇…唔聽走音歌手可以揀聽本地/歐美/國語流行曲,爵士古典heavy metal…甚至,唔聽歌都係一個選擇…問題是,為什麼她走音佣然會有人繼續聽下去…這證明的是購買者在這件產品中找到了唱歌以外的utility…

    要有D咁冇腦既消費者,先可以造就D咁無良既商家推出時下D咁不知所謂既產品。–>同意,不過在下傾向不用「著色字」…就是有怎樣的消費者(市場),就有怎樣的產品…

    如果無線唔揾D老野拍戲,大家都係局住睇佢架喇。係冇其他選擇既情況之下,到頭來又咪係成為全城熱話?–>唔睇無線,你可以睇ATV,仲有now同cable,另外仲有NBC,BBC,National geographic,AXN…就算唔睇電視,你可以睇DVD,VCD同blu-ray…再唔係,你仲有互聯網,必要時仲可以出街睇戲…就算唔睇戲,你仲可以打機寫blog溝女唱K劈酒做功課番工賺錢…etcetcetc…所以…唔存在無其他選擇…記往,你係決定是否要invest時間金錢入去一件產品上面既人,「有強姦無焗賭」,牛唔飲水,唔按得牛頭低…

    販賣毒品既固然罪大惡極(冇人賣邊有得食),吸毒既亦難辭其咎(冇人食固然賣唔成)–>前者屬於道德判斷,在單純商業考慮之中,這只是一個貿易行為…反而後者…明知吸毒會死都選擇去吸,就不單是一個道德問題,而是一個智力問題…除非,他覺得生不如死…

    果D所謂既音樂節目,見到都即刻轉台喇。仲坐係度比D走音歌手虐待隻耳仔咩?電視亦冇野值得睇,不過自從高清廣播之後兩台都多左兩個專播日、韓、台劇同綜藝節目既頻道,依家成日都睇果D節目多。–>正正值明在下之前所說,消費者,永遠係做decision果個…選擇唔睇,都係一個decision…

  17. 奕:

    我的選擇是不看不聽。

    哈﹗我冇想過自殺。我只是順著AK的說法說下去,我不想要那些東西,為何仍有那些東西充斥市場。按照AK的說法,是因為我屬於小眾市場。

    AK:

    你話「有怎樣的市場才會有怎樣的產品」,而不是「有怎樣的產品製造怎樣的市場」,如果我沒有理解錯誤的話,你的意思是,有這個需要就有這個市場,所以市場上有什麼,是消費者促成的。

    我是兩者都接受,所以我才說有商榷的地方。

    要有D咁冇腦既消費者,先可以造就D咁無良既商家推出時下D咁不知所謂既產品。」你也同意奕說的這一點。你說「就是有怎樣的消費者(市場),就有怎樣的產品」,弊在現在的生產商透過廣告、傳媒製造一種你需要的假象。例如某某牌子的產品,有品味的人要有;邊度邊度的名菜,連乜乜乜都去食,你也要去食;啲樓而家咁平,你仲快些去買……

  18. 18 AK

    讀食:

    「弊在現在的生產商透過廣告、傳媒製造一種你需要的假象。例如某某牌子的產品,有品味的人要有;邊度邊度的名菜,連乜乜乜都去食,你也要去食;啲樓而家咁平,你仲快些去買…」

    通常,我們很容易混淆了廣告/宣傳/市場推廣的功能申(以下統稱廣告)…廣告只能引發市場對一件產品的正面反應,但如果產品本身不能對應市場的基礎需要,企業做再多的廣告都無法將一件產品捧紅…例如,在香港,人肉產品沒有足夠的市場去支持企業推出人肉產品,AK亦認為,無論你再多的廣告,也不可能成功…

    市場是不能被製造出來的…產品在市場中獲得成功,一定有其對應市場需要的地方,例如走音歌手,買既唔係歌藝,而係image…對應了港男市場需要既image…

    廣告在引發正面反應的過程中,可以運用不同的技巧,其中當然可以係針對產品本身,但更多的是針對市場的反應,例如激發市場的好奇心,虛榮感…廣告的重點是sell到件product,個means係唔重要,重要既,係end…


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: