戲: Kingdom of Heaven Director Cut

10五月09

早幾日夜晚重新睇番展企套舊碟,Ridley Scott套Kingdom of Heaven…AK總係覺得,以Ridley Scott既水準來講,依套真係失手得比較緊要,成套戲有成兩個半鐘,但係就好似好鬆散咁,仲有唔少既犯駁位…套戲有Eva Green同Orlando Bloom俊男美女…仲有Liam Neeson,Jeremy Irons同埋Edward Norton…咁既casting…炒唔出一碟好菜…總係叫人有d可惜…

傳說之中,套戲係美國果陣時因為有太多宗教政治議題,結果唔係太過成功(相對於歷來最大既投資成本一億一千三百萬美元而言)…後尾,Ridley Scott親自操刀,出左一個4DVD既Director cut version,補左成五十幾分鐘戲,將成套戲既總長度推至一百九十四分鐘…AK一直好奇…戲院上果個version有成五十分鐘剪走左?邊得黎咁多野可以剪呢?不過,依套碟依家唔容易搵…有既話,個價都唔平…所以…一心諗住等下,睇下有無日版廉價水貨…可惜,等下等下…雙碟版就有日版,但係四碟版始終不見影…

今次再重睇之後,終於睇到有d眼火爆,亦都覺得,睇一個唔完整既版本實在無法再滿足自己…於是第日襯收工,穿過維園行左去銅鑼灣HMV,買左套四碟版…依兩日就係屋企煲左佢…發現…戲院版同Director cut係無得比較…

有別於Gladiator,三碟既Gladiator叫做Extended Special Edition,Ridley Scott一開始就講明,Gladitor無Director Cut,最滿意果個version係戲院版…Kingdom of Heaven講到明,194分鐘既version係Director Cut,係Ridley Scott preferred既version…Gladitor你唔睇果d加長既畫面,問題不大…Kingdom of Heaven戲院版剪走既野,係完全破壞左創作人既原意…

Ridley Scott一向擅長既係複雜既敘事手法,偏偏係Kingdom of Heaven就變左做一個單純而無內容既英雄片,由Orlando Bloom所演既耶路撒冷守護者Balian虛有其表而欠缺實感,只係得一千零一個表情,係其中一個俾人勁鬧既位置…係director cut入面,Ridley補充番好多關於Balian既空白位…包括左佢對於自殺既妻子果一份感情…電影版入面,Balian忽然殺死神父,情節突兀…原來依個神父係佢同母異父,自細對佢百般欺凌既大哥,除左盜走Balian為妻子親手做既銀十字架之外,仲刻意隱瞞妻子既埋葬地點…另一方面…Balian係電影入面,由一個鐵匠,忽然轉變成為一個懂得軍事,劍術,騎術以至工程既守衛勇將,超神奇…原來又係大較剪一野剪走左Balian曾經參軍作戰,係軍隊中協助製作攻城武器既人物背景…

電影版更加剪走左唔少Liam Neeson,Jeremy Irons同埋Edward Norton既精彩演出…係Balian依個角位既build up上面做成左或多或少既打擊,結果最終導致Balian成為一個虛有其表既角色…

另一個係剪刀之下既最大受害者,係Eva Green演既Sibylla公主…電影版入面佢係Baldwin 四世(即係Edward Norton所演,長期載住銀面具,身患麻瘋病既耶路撒冷之王)個妹,兄長駕崩之後繼位成為女皇,將大權交托俾貴族出身,自高自大而好戰既Guy,結果Guy同Reynald挑釁Saladin,係哈丁之戰中慘敗,引致耶路撒冷皇國覆亡此一無可避免既結局…點解一個由一開始聰敏睿智既女人,會明知Guy係一個大渾賬既情況之下,答應將軍政大權交托俾依個有名無實既丈夫…依點實在講唔通…

原來…電影版將Sibylla個仔,Baldwin IV個外甥既成個角色剪鬼走左…Baldwin VI駕崩之後,Sibylla既仔繼位為Baldwin V,並由母親攝政…係依個時候,Sibylla發現兒子同兄長有同一個命運,兩者均為麻瘋病人…由於Sibylla曾經睇住兄長承受麻瘋病既痛苦,係無法接受兒子為守護耶路撒冷而承受悲慘既命運…毒殺了自己既幼子…缺少左依個有麻瘋病既兒子既存在,Sibylla成個人物就顯得更加空洞化…結果淪為左套戲入面一個可有可無既花瓶…

其實,Kingdom of Heaven入面,Ridley Scott想講既,其實係一個Knighthood既故事,其中,最重要既concept,係Right Action…從以下既兩段對白可以睇得出…(AK覺得今次中文字幕翻得唔錯…依兩段,就用中文翻譯…)

####

聖者,俠也。挺身而出,見義勇為,鋤強扶弱。

神者,仁也,在乎一念之間,一心之間。君子小人之別,存乎平素一言一行。

####

世局有如棋局,任何一步都可能讓你走上絕路。除非你寸步不離起點,否則你作出的任何決定,都可能導致你的敗亡。沒有人會知道自己的結局如何,或任何事會導致最終有何下場。

君令,或不可違,父命,或不可逆,但每一個人可以掌握自己的決定,亦只有如此,他才 真正展開了本身的戰局。無論命運如何支配你,又或是誰人在支配你的命運,即使處於王權之下,霸者之前,只有你才能掌控屬於你自己的心。

於你面對上帝時,你不可以推說當時是逼於無奈,不可以說那時是權宜之計,為自己的決定負責,是推卸不得的義務。

####

以上既兩段,反映左Ridley Scott對於Balian這個騎士既人格打造既基本…所以係電影入面,Balian為左唔能夠成為Guy被賜死既原因,而決定拒絕接受Baldwin IV既賜婚(當時Balian其實已經同Sibylla有過親密關係)…電影上映既時候,依個位係最受到人攻擊,認為Balian愚蠢,明知政敵上台之後,不單會逼害自己,更會挑起戰爭,禍及百姓,而佢只需要點一下頭,就可以為百姓除害,仲可以抱得美人歸,何樂而不為?

或者…我地都太過明白,「成大業不拘小節」,只係,係一次又一次既不拘小節之後,一次又一次既權宜計算之後,我地既「成大業不拘小節」同「為達目的而不擇手段」其實仲有咩分別?

莫以善小而不為,莫以惡小而為之。

生而為人,總有一d原則同信念,係需要持守既…

電影入面,冊封騎士既誓詞…

Be without fear in the face of enemies.
強敵當前,無所畏懼。
Be brave and upright that God may love thee.
果敢忠勇,無愧上帝。
Speak the truth always, even if it leads to your death.
忠耿正直,寧死不屈。
Safeguard the helpless and do no wrong.
保護弱者,無乖天理。
That is your oath.
這是你誓詞。
And that’s so you don’t forget it.
牢牢記住。
Rise a knight!
站起來,騎土!

####
今日去睇Coraline (3D英文版)既時候,係ticket office到收到東邪西毒終極版既單張…五月二十八號…好野!!!

廣告


2 Responses to “戲: Kingdom of Heaven Director Cut”

  1. Thanks for your nice illustration of the missing pieces of this movie! Keep up with the good work! I also like director’s cut or alternative endings of many movies….

  2. 2 Wing

    我都係一樣, 等日版平價4DVD版都等左好耐好耐, 一直都等唔到…. 依家屋企多左個日喊夜喊的小魔怪, 就算依家等到我都無福消受了……. 唉.


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: