戲:十套…排名不分先後左中右…

27四月09

見哥德兄果邊寫得咁開心,咁AK又東斯效顰…以下是AK會keep既幾套漫畫,不過,要分排名,實在太難,所以,十套…排名不分先後左中右:

One Piece
熱血,友情以及冒險,從來都係少年漫畫之中不可或缺既必然主題,近年將依幾個題目發揮得最淋灕盡致既,都真係非One Piece莫屬!作者既水準亦都一直非常穩定,足足穩定左成五十幾集,個故都仲係現在進行式…仲要偉大航道只係行左一半…

浪客劍心
基本上,由一開始,AK就係新撰組既支持者,所以對於作為維新志士既劍心無咩好感(反而完全認同齋藤一既「惡即斬」),以前有次係去到志志雄篇就放棄左…後尾出精裝版,從新開始買,一直去到人誅篇既最新一期(即係結局),AK先對劍心有所改觀,「拿劍與心一賭,完成在下的戰鬥人生。」

男兒當入樽
入樽…AK其實都真係好唔鐘意d爛尾故仔,所以通常一見果套書爛尾,就會將佢踢出局…不過,唯獨的入樽…依一套真係…放棄唔到…主角櫻木由不知籃球為何物,最後成為一個真正喜歡籃球既球員,憑藉既唔係佢口邊常說既「天才」,而係唔服輸既一份毅力…最後give me five一格,更係經典…

Liar Game
相對於大熱既死亡筆記,AK其實更加喜歡Liar Game…首先係,Liar Game無超能力,唔會出現任意調控死亡原因及時間依d超級屈機既橋段,所有既野,其實做讀者既都可以諗到(近期敗者復活戰之中既動態視力就有d屈機成份)…另外,佢講中左一樣AK好相信既野,「信任,不去猜疑,其實亦反映了莫不關心。」

Gundam 0079
唔使多講…在下「生係高達人,死係高達魂」…安彥良和重畫0079,實在係太教人感動了…早前Gundam Ace中文版休刊,對於AK簡直係「晴天Pig pig」…其中經過多年之後,將動畫入面不少當年為左遷就兒童觀眾既橋段作出修訂,使整個故事更加合理…另外,新篇既卡斯帕篇亦甚有驚喜,讓我們見證一代「美型惡役」馬沙既童年及青年期…

幪面超人Spirit
以前都講左,AK係「鐵面金剛」時代既人…相對於依家平成時代既幪面超人,昭和時代既反而更加顯得有血有肉,其中對於改造人既悲衰及孤寂,刻劃得特別深刻…Spirit入面,十大幪面超人聯手對抗復活既惡黨,故事補完在十號「ZO」,以佢既成長作為縱軸亦相當吸引…

六三四之劍
依套可能比較冷門,係日本劍道既漫畫,成個故仔由主角夏木六三四既出生,一路講到大學最後一年,與宿敵東堂修羅比試…其中對於劍,以及劍道都有深刻既刻劃,上段,平青眼,示現流及二天一流…入面既劍術比試係以真實既運動作為藍本,自然不會有好似浪客劍心果d超神速既出現,但係就多左一分既實在感…

北斗之拳
「你已經係一個死人…」武論尊同原哲夫既北斗之拳…佢本身就有一種男人既浪漫…義星利恩死於雷奧之手,於生命最後一刻,為了愛人,與妖星尤達同歸於盡…仁星修迪既自我犧牲以及五車星之中既山同雲…當然,最正既始終都係雷奧歸天…「我雷奧一生,無悔無憾!」

聖鬥士星矢
都唔需要多作介紹…車田正美既聖鬥士星矢…打不死既五小強有時都真係好煩下架…由青銅一路打到去冥皇,最後就連神都可以俾佢地擊敗…或者,依個就叫做,將不可能變成可能…當然,最正,始終都係黃金十二宮…依一套,同埋北斗之拳,AK keep起既分別係天龍版同青鳥版…仲係賣四蚊一本果隻…成套齊哂…屬於典藏級…

愛與誠
依套係好後期先睇番…所以,果陣時,AK係完全唔知,TVb既編劇係可以咁狼死,差不多成套照dup(雖然將人地日本既故事背景變左做民初),整左套「香城浪子」出黎…依本書既兩位主角由頭至尾,面對愈來愈大既困難,愈來愈大既阻力,其中亦都曾經有過軟弱之時,不過最終,一切都係靠自己挺過去…結局…好慘…

廣告


18 Responses to “戲:十套…排名不分先後左中右…”

  1. 戲?

    你在說漫畫還是電影/電視劇?

    《男兒當入樽》
    我看了兩本已經想打瓜那個花乜:因為太白痴,太高(我最憎男生咁高,哈﹗我老友看到可能又踢鬼我)

    高達
    為何將高達排到咁後????我要投訴﹗﹗﹗

    鐵面金剛
    不是喎,麗的開始播時是譯作「幪面超人」的,後來才改名「鐵面金剛」。我喜歡第三號阿豹。

    北斗之拳
    我其實是看過一點的。男主角的樣子有點像太賀誠扮憂鬱,不過,太肌肉的男生我不喜歡看(噢,烙印戰士例外)。

    聖鬥士星矢
    如果要比,我比較喜歡龍珠多啲。

    愛與誠

    哈哈,終於有人寫這套了,這套應該是我最早期擁有的漫畫。記得當年出版時,作者名字有幾個版本:長安巧,乜乜郎,搞到我頭都大。初出時,曾經出現爛尾,不是作者爛尾,是出版社,在報攤上再找不到,不知道是報販不入貨還是什麼的。我後來才買回全書。不過,也全部扔掉了。

    最後一幕,太賀與早乙女在海灘相擁後,到底太賀有沒有因傷重而死在愛人懷裡,還是怎樣。當年有不少意見。我記得有人話睇過續集(????)話太賀是瓜了的。(啊~~~天﹗﹗)

    八十年代,西城秀樹曾在電視劇(電影?)扮演過太賀誠,其實當年的他,外型真的有點像的。女主角真名好像也叫早乙女,不過,樣子不行。內容好像是講早乙女轉去壞學生高校後,被學生群掟石頭那一段。

    無記的《香城浪子》一播,我就媽媽聲:改成咁???﹗﹗

  2. 噢,漏了,請問講馬沙青年期的乜東東在網上有嗎?我先去找找。謝謝﹗

  3. 其實《超事空要塞》和《新世紀福音戰士》也值得入圍,他們對日後機械人的造型日很深的影響啊.

  4. 4 AK

    讀食:
    依篇只講漫畫…唔包動畫同電視劇…戲…一切可以把弄的,都歸入「戲」系列之中…

    入樽…花型透…翔陽…其實同翔陽打果段係第一次full team齊人…不過唔知點解,總係覺得同要有勢南既仙道出場先係最正…

    高達…都話左排名不分先後左中右咯…唔好咁介意啦…卡斯帕篇係安彥大師的新連載入面新加既一段,仲加左馬沙同娜娜既相遇…所以,補白左好多…不過,無左馬古比既強人勇戰高達,多少有d遺憾…網上版…AK沒有找過喎…都是買單行本的…

    鐵面金剛…幪面超人果時AK都未開始識睇電視,所以都係由V3開始睇…阿豹?好似唔係喎…果時廣告係「幪面超人除左洪大龍,洪飛虎之外,仲有洪天馬!」最鐘意?如果以故事既完整度來講,應該係Black,個人情感就係四號…(結城丈二死得好慘呀…)

    北斗之拳…據原哲夫講,健次郎既表情係參考李小龍畫既…尤其係果d貓叫聲…

    愛與誠…有續集既咩?太賀俾沙土谷隊死左都仲有續集?

    苦瓜兄,
    要塞…生係高達人,死係高達魂…唔鐘意要塞(雖然最近迷上Marcross F)…而且,要塞好似無漫畫…

    福音戰士…依本又係睇到人發火…成年先出得一本…不過,的確,漫畫好過動畫…劇場版應該今年會上第二集,仲有新人物四眼妹添…

  5. 5 eeb

    東"施"效顰 XD

    one piece頭廿本都好過癮〝之後有d悶,追唔落

    其他漫畫都無乜共鳴添,雖然多數都有睇過下,不過鍾情少女/校園漫畫。

  6. 6 eeb

    keroro唔入圍?

  7. 依? 乜AK兄你冇睇過咸趣花生咩? 😛

  8. 8 AK

    直嫂,
    keroro?哈哈…Ak仲記得有一次友聚,一眾兄弟正係board game既戰場中殺個日月無光…嫂子在一旁看keroro的卡通…竟會有凄然流淚的一刻(看keroro而落淚的震撼遠大於看禮儀師時落淚)…AK肯定了拍直的眼光…

    marshmallow,
    花生當然有看…還有加菲,不過要講最愛的美漫…還是只有batman…

  9. 不好意思,我記錯了幪面超人三號的名字。我不知為何想起「龍虎豹」,哈哈﹗不過,起初好像不是叫中文名字的,但是,原名我則忘了。

    到四號時,香港還有播嗎?是否改了去無記播?我已經忘了。

    至於《愛與誠》,當年黃玉郎搞的漫畫報《生報》(還是金報?),裡面有讀者來函/投稿之類的。當年有幾天成日講呢套漫畫的。有人聲稱看過續集。但是,我一直都未有發現。我那時也很懷疑。還有,報紙上引用的《愛與誠》的作者名,跟我那本漫畫印出來的作者名不同,所以我一直搞不清楚,到底作者叫什麼名字。

    《北斗之拳》的貓叫聲?我估你看漫畫看到很入迷。

    至於《高達》,你記不記得最後幾集講阿寶與一位女將軍面對面時,曾透視她的內心世界,其中有幾個鏡頭是這位女將軍年輕時跟馬沙(穿起西裝,斯文裝扮)在一起。跟著那女將軍罵阿寶不應偷窺人家的記憶之類。請問這段往事在新的漫畫中有沒有補白?

    我也不喜歡超時空要塞。

    請問有沒有看過《亂馬1/2》、《怪醫秦博士》(Black Jack)、《漂流教室》?我最近在這裡的英文書店打書釘,翻看black Jack(英文譯本),這裡的書店真好,漫畫不會包起來,可以任看。

    (講咁多,不如我自己再寫一篇好了。不好意思……)

  10. 10 eeb

    AK
    你係咪睇錯,我又點會因為d無聊卡通片而落淚?! 如果真的流淚,也只因為看電視看久了,眼睛又乾又疲勞,進行自我保濕。

    (雖然我真係唔記得有此一幕,但如果有人敢再提起,小心我用水壺噴你個貓頭!)

  11. 11

    >Liar Game

    睇過頭兩集,覺得唔掂...因為個女主角蠢成咁真係唔係好合理...

    感覺上「賭博啓示錄」好過佢好多(雖然你可能覺得係兩套唔同題材既漫畫,但其實都係講緊人性既黑暗面)

  12. 12 AK

    讀食:
    四號是與V3同一套中出場的…毒蠍幫的科學家結城丈二因與首領鎧甲元帥結愁,俾人溶左隻右手,之後佢開發左一隻機械臂,獨力對付毒蠍幫(佢同v3開頭係無偈傾架)…

    最後尾佢為左阻止導彈射向東京,係改變導彈軌道既過程中壯烈犧牲,v3係果一刻追封佢係四號…

    v3的本名叫風見次郎…全家人死係毒蠍幫之手,結果由一號同二號幫佢改造,擁有二重風車腰帶,繼承左一號既「技」同二號既「力」,成為v3…

    高達…安彥大師既新版還未畫到最後,現時連娜娜都未死呢…

    亂馬和漂流都有看…高橋留美子還是比較喜歡相聚一刻…漂流…很可怕…

    直嫂:
    作為一個professional既記者…只可以講,「有發生過」…

    米兄,
    頭兩集入面既神崎直真係人如其名…神奇咁直…直到do既地步…不過之後都唔同左…而且係round three都係靠佢去贏橫矢…之後既敗部復活,佢既直覺又一次發揮作用…所以,小直唔係咁弱…

  13. 我又忍不住來搭嘴了。

    噢,原來如此,太久以前的劇情,我已忘了。昨天路過DVD店,看到幪面超人,心想:不用如此大陣仗買來重溫吧。

    高達……噢,咁真係有排都未畫到那裡了(如果會畫的話)。

    相聚一刻只是看過卡通,我不是太喜歡這類故事的(男人婆婆媽媽)。

    漂流的畫法、劇情真的好得人驚。我小時候看也覺得很恐怖。那你一定承受不了楳圖另一套更恐怖的漫畫《神之左手魔之右手》了。當年香港的漫畫出版社(忘了名字了)出了《漂流教室》和其他短篇後,一直沒有出版這套。我只看過台灣版,可能是內容太恐怖了,真的會嚇壞讀者(尤其是那些人穿裂別人的人體和耳朵走出來的場面)。

  14. 少少意見:

    找舊文的方法不太方便(因為有時不記得你是哪一個月寫的)。可否放一個"search"或"recent post"在右邊?

    (我是一個很麻煩的讀者)

  15. 15 AK

    好的好的

  16. 16 Wing

    如果不限年代, 安達充的 “touch" 好應該入圍woo……

  17. Wing:

    對對對,我差點忘了阿tachi沖(我們當年常常這樣叫這個名)。

  18. 18 AK

    如果要係咁多套安達充既作品中揀一套,AK會揀Rough,唔會揀touch…美為無拖橋拖得咁嚴重…


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: