才:匯豐供股,澳門封城加十四歲的貓貓

09三月09

三月頭,依d趕住埋數加為下一年budget討價還價既日子,AK都非常之忙,無他既…新公司講求企業管治,要提升透明度…為左應該各方質詢既問題答案紙四圍飛…corp comm係接「蕉」既主力部門,之後再將d「蕉」掟出去…人地又會再掟…掟到隻「蕉」變成一pat野之後,再等corp comm將果pat「蕉醬」兜多兩野…上碟…

今次三單,雖然唔係單單都係新料,不過全部都係「現在進行式」…都仲有可足一論之處…

匯豐供股(寫果陣未修市,寫完先check股價,結果收報33…依段都真係有d明日黃花味…):

之前網友hana談及匯豐供股,認為「個男人係咁差嘅經濟環境下搵少咗好多錢,但都好過失業爭落周身債總要老豆阿媽養返轉頭果啲吖!做為一個明事理的女人點都要俾個機會佢。」

在下咁睇…

今次唔單止係個男人搵少左好多錢番黎咁簡單…而係個男人係外國爛滾糊搞,結果俾隻金絲貓(美國)呃左好Q多錢,…個衰佬仲要一開始既時候扮無野(唔發盈警),等你以為佢仲係好佬(管理層表現卓越)一個,結果原來佢係出面搞左個大頭佛,要問你拎私己錢出黎填數(供股集資)…而且,雖然佢話同出面果個斷絕來往(放棄美國多項業務),但偏偏仲係要拖住個兩個「野仔」(美國信用卡業務同埋一大堆房賃),話信佢他日會成才…

更大鑊既係,佢又唔早d開聲(錯過集資既最好時間),偏偏揀係情況最麻煩既時候黎開聲(金融海嘯)…仲要係開聲之前又原來已經私下科左水益班豬朋狗友(任由分銷商拎哂d利益)…

一個咁既男人…佢開聲同你講「stay with us, stay with us…」

你stay定係唔stay…?

在下以為…如果你係一早就嫁作人婦,仲要同佢連仔都生埋(十幾年前買落)…咁其實你就無咩得揀,正所謂嫁雞隨雞也…反過來說,如果你同佢結婚無耐(近日見佢落價你先買入),其實就算唔同佢離婚(係市場沽出佢既股票),亦都可以考慮唔再俾錢個衰佬(唔供)…雖然以後佢對你既愛一定會減少(股本增加以至攤薄),不過反正佢以後俾番你既家用(利息)有限…所以都係…算吧啦…

聰慧如hana姐,自然唔需要在下多講d咩都可以自己做決定啦…在下都係係度扮下南宮夫人jer…

後補:又或者咁講,其實AK都信依個男人有一日可以捲土重來…不過可能要十年八載,如果閣下都已經嫁作人婦多年,咁就話迫住要同佢一齊捱jer…但係如果你仲係新婚少婦,花容月貌未有減色..你直係甘心將自己既黃金十年交俾依個男人,尤其係當出面仲有好多好似唔錯既選擇既時候?

澳門封城:
打從今年年頭,澳門真係野野都食住香港,壓住我地黎打…

先有泰國包機事件,搞出「來生不做香港人」…

之後人地人人即時五差野,我地就…選擇性地有d人有六千,不過係要你六十五歲先有得拎…

之後人地又話一年有三千萬旅客,威過你咩「東方之豬」…(雖然後尾俾人踢爆佢督手指數…死狗咁修正,扣番八百萬出黎…)

之後人地三扒兩撥搞掂埋「劍廿三」,為祖國完成光榮任務,我地依邊唔止搞出五十萬人上街,仲要依家無限期押後立法…(well…係祖國眼中我地唔係「動感之都」,係「動亂之都」囉…)

依家人地仲要一句話唔俾你入境,就唔俾你入境,「真係唔駛同你講咁多,你班正一係「攪屎棍」…」

頂…DLS…俾人郃到上心口,堂堂香港制服部隊既總領導人保安局長,做個警隊一哥既李少光居然dup頭認衰仔,話自己「無能」為力…真係掉L哂我地香港人既架…結果要勞動到Sir Donald親自同撈家鏵傾(堂堂大英帝國爵士同個撈偏收片既坐埋一齊傾,幾無面)…人地都仲係唔肯俾個承諾你…仲要果個「乜膠」治安警察局代局長俾個「乜膠」答案耍你班香港記者…

好啦…結果搞到勞師動眾,成班泛民議員話要過去澳門一齊「試閘」,都唔知會唔會「撞閘」…點知居然今日蘋果引述政府消息人士話,「一旦泛民主派決意在斡旋期間闖關,顯然是對澳門「唔畀面」,不但無補於事,或會令事件更複雜,呼籲泛民主派三思。「澳門政府梗係覺得你地係度玩野,唔畀面,想挑戰我地!」

頂!依家邊個唔俾面邊個先?你當人地係「兄弟」,人地當你係「契弟」咋!

十四歲的貓貓
另一單值得拎出黎講既,係有個十四女既女仔同男友珠胎暗結,搞大個肚,依家搵左母親的決擇幫手,為左排譴懷孕期間的鬱悶,於是就用blog寫下左「少女孕記」,唔止出文,仲要出相…

結果係…係網上世界,自然唔會係一面倒叫好,亦都唔會一面倒臭罵(即係edc都仲有支持者,天真嬌既演出都仲叫好叫坐,仲要上新聞添)…有網友讚佢大膽,勇氣可嘉,又有人話佢思想未成熟,唔應該係網上公布「少女孕記」,又質疑人地係學校既操守(咁同見到強姦受害人之後話人地一定係衣衫暴露行為放浪無分別,係極有問題既思想)…

到人地知道網絡世界既險惡,剷走左相關既相,封埋blog之後,d人都仲唔肯放過一個細路女,死都要掘番人地個網站出黎,引用人地講過「父母不接受她懷孕,曾揚言若不墮胎不讓她回家」…而且,當然亦都走唔甩果d「衰十一」既煩惱…

結果攪到母親的決擇要出黎講,少女係看到互聯網有大量中傷她的謠言後,心情大受影響,令她更受傷害。

講真…AK又真係覺得…大家真係唔駛咁大驚小怪啦…母親的決擇都話,最細既個案十二歲都有,差在只不過係人地無上網,今次上左網咁大把…對住個細路女,大家輕手d,網開一面啦…

不過,依單野,的確又勾起左近日一次朋友飯局,其中一個好兄弟既「第二名」今年內應該都會出世,另一個結左婚既兄弟就係度躊隨緊生定唔生(人地老婆好似好想)…

AK其實一直都話唔主張生…因為依個世界,尤其係香港依個社會,真係唔適合孕育下一代…就算你認為,你唔會花四百萬去培育個「靚仔」,但係係全部父母都係咁催谷既時候,你唔咁做,即係預先就要個「靚仔」係起跑線度落後於人…的確,Ak係唔信果d一出世就受洗,細個學琴棋書畫,入讀著名幼稚院,小學,中學同大學可以為個「靚仔」既思考同能力有咩助益,但係正如果時搵工,AK三張幾野仲有人留意佢中學邊處畢業,就可以知道鍍金既影響力,唔好講一世,但係半世…點都係度…之後佢出黎社會依個大染缸,面對既簡直係變態式既競爭,明槍暗箭無日無之…個「靚仔」由一出世果一刻就要同人跑狗咁跑…跑到死果日…都真係好無謂下…

至於果d咩legancy既野「傳宗接代,繼後香燈」…算吧啦,以優生學既角度講,AK依d咁既gen…真係無左都唔駛恨…一個由一開始就知佢係悲劇既故仔,都係無謂俾佢開始啦…

不過,又講番轉頭,雖然AK講左係咁就係咁,不過如果有咩閃失(雖然科學昌明,但係都唔係萬無一失),個女既又真係好想生佢出黎,仲希望佢有個「健全」既家庭的話…AK都應該會盡番應有既責任既(上次同另外兩個朋友講果陣,嚇到佢地花容失色,話從來無諗個AK會咁順灘)…所以都係果句,「留精不留種」…

所以,如果你有一日見到AK一袋二袋係銅鑼灣推住架「法拉利」同d死靚仔爭用「闊閘機」既話,你捉住佢條頸問,「你係AK」,我一定會答你,「我係C.M.」

廣告


15 Responses to “才:匯豐供股,澳門封城加十四歲的貓貓”

  1. 1 Terence

    都係帶備雨褸啦,出面「橫風橫乳」架。

  2. hehe,撐完第二日朝早已經發覺唔妥啦!跟住又出咗幾篇文了。

    真實點處理同聰唔聰慧冇乜關係,重點係你總愛唔愛佢格遮,你睇周玉女點對個衰男人就知啦!哈哈哈!

  3. 3 samsara

    又來?果然係趁佢病攞佢命呀!

    不過又唔駛咁老定,依個世界就係估佢唔到,咁囉….cm哥哥!

  4. 4 eeb

    世紀大逼供,自己溝(淡)好過俾人溝(淡)bor。

    o個個14歲,唉,咁extreme既case,如果佢要落,我估我都會少有地認為落咗都係好事,不過最好都係生出黎俾人領養,唔好俾個女仔見個bb/知道邊個領養咗,對大對細都好d,亦算係等個女仔為自己做過既事負上責任同代價。

    社會既道德觀/價值觀只會向下走,教育係要由家庭/父母開始,我個仔前兩日同個大佢2個月既姐姐一齊玩,個女仔係語言同認知方面都俾我個仔好好多(當然一般男仔12/3歲前都會比同齡女仔差),但行為方面,個女仔真係兩歲就有港女本色,自己會去搶別人的玩具,而我個仔去想(只係想,未有實質行動)攞個玩具,已經硬食咗佢一巴﹗我個仔無還手,只係喊,我就行埋去踢低個女仔同打咗佢幾下再講粗口鬧佢全家(我梗係無啦 :-p),只係攬下個仔又教下個女仔道歉同再有咁既情況要點樣去處理,點都唔可以打人。

    之後我諗,我真係無去催谷個仔學中文英文普通話數字圖形,如果細個唔教好佢基本禮貌同尊重別人,俾佢學齊琴棋書畫、精通7國語言、入到名校……咁又點,根本唔能夠好好地做一個人,我從來都無諗過要培育精英,自己知自己事,我同老公都唔係特別叻既人,生出黎既都只係會好似我地咁中中庸庸,我只係希望小朋友可以身心健康,o係充滿愛同快樂既環境下成長,將來只要佢(地)係做正行同自力更生,就足夠喇。

    至於你,唉,搞還搞,要避免有意外發生,如果真係要負起責任既,我怕你有十年會痛不欲生﹗

  5. 唔想有意外,咪… 聽阿關師傅當年咁話囉… XD

    尋晚響柏林,有條傻佬係咁話執啦執啦,無錢就借啦,實掂喎… 但係,而家呢個時候,唔會有人用吊命錢黎咁玩,莫講話借… (我又諗起德國寶馬女董事被牛郎呃左幾百萬EUR的故事… 佢真係斬纜斬得快 [個男人叫佢起個成億的trust,再同老公離婚,佢即刻知唔對路],仲要報埋警,果然係壯婦斷臂。)

  6. C.M.大佬,過左呢個大上大落橫風橫乳人慾橫流提心吊膽人心虛怯期,我即刻搵你!(唉,個女既父母唔撐佢,咪要搵外人囉。撐自己個女,先係我呢亭現代AK第一樣要做既事… 所以,咪要同人爭濶閘機law)

  7. 7 samsara

    AK哥哥講得好!!!果然係現代型爸。

    (如果小妹妹個老爸都係咁撐佢,你估依件事仲會唔會發生呢)

  8. 8 AK

    Terence兄,
    最緊要識得保護自己…

    Samsara姐姐,
    依d野,可免則免啦…

    直嫂,
    依個世界,「有強姦,無焗賭」既…講真,作為股民,都真係可以唔受溝架…

    14歲到左依家,個肚成個籮咁大都真係無得落左佢架啦…生出黎之後等人領養應該係唯一選擇…

    港男/港女,依個係一個社會問題,應該…around 2歲,未受社會依個「醬缸」既污染,大體上唔會係港女形像既表現…其實,個個「靚仔」其實都有極強既佔有慾,係佢地口中,「我愛XX」同「我要XX」係同一個意思既…所以,爭玩具依個行為表現,係「靚仔」都有…

    講真,我地依家就係不斷咁生產果d精通琴棋書畫,但係唔識煲水劃火柴既「天才低能兒」…基本上,港男/港女/港童…歸根結底都係香港整個社會既問題…

    智嘉兄,
    咁既市況仲有依d傻佬走去借錢玩股??真係壽星公吊頸…

    Hana姐,
    講開玉女敏…之前南宮夫人論匯豐…今次就…施老闆講慧敏花園…

    慧敏花園過去都真係果一個區既樓皇,設計外型細緻典雅,曾經係唔少中產人士既置業目標…不過,畢竟去到今時今日都已經有成四十年以上既樓齡,加上大部份既單位都曾經出租又或者轉手,外牆難免有d剝落,需要重新進行批盪,維條保養自然要花一筆…以前覺得實用既間隔,又未必符合今日既居家需要,可能要大裝執執佢…加上同區又有唔少新盤…所以業主終於決定面對市場既調整,劈價出貨….

    慧敏花園依一宗大劈價交易,反映左樓市本身的支持度一般,相信個成交價會成為後市既指標,拖低同區樓盤既價位,而大市既方向相信會係繼續向下尋底…

    AK兄,
    好…好…搵我…出黎打乎?等C.M.開定支bailey等你…

    Samsara姐姐,
    好多野,人地幫你撐得一時,撐唔到一世…都係要靠自己囉…

  9. 我也贊成Chika的說法,咁你就一勞永凂啦。哈﹗

  10. 撞鬼,睇錯咗。

    應是「逸」。

  11. 11 Hung

    AK兄:

    從唔知邊套戲講過,「男人就好似沖茶咁,唔俾佢滾下,邊試到佢係唔係真材實料」,今次呢單野,俾個「撐士」佢啦…至多日後俾多兩錢肉緊睇實佢囉…

    話時話,CM兄,令壽堂可以咁大量唔使你去開枝散葉!?

  12. 12 AK

    讀食姐,
    引刀成一快???

    唔駛去到咁盡喎…

    洪兄,
    就咁…男人去滾唔係咁大問題,但係咁到俾老婆知,仲要攪出個大頭佛收唔到科就無得原諒…

    至於跟著果題,真實既C.M.兄一早就開枝散左葉,仲梅開二度,分分鐘可能會完成帽子戲法,成為「hat trick hero」!所以,依題都係由在下來答…

    就咁…在下係屋企,既唔係長子嫡孫,對落仲有「掌上明珠」…AK依d排中間既by product一向無咩人管既…

  13. 13 eeb

    2歲港女唔係講笑架,有時見身邊既父母點去栽培(應該係"哉賠")d小朋友,就明白點解d青少年可以咁自我中心,要整個世界圍住佢轉,唉,社會問題? 你可以咁講,但d父母就唔可以,社會風氣唔好,唔代表父母要跟歪風去害個小朋友,男子10歲都唔識自己沖涼,女仔12歲去咗母親的抉擇,父母真係責無旁貸﹗

  14. >> 男子10歲都唔識自己沖涼,女仔12歲去咗母親的抉擇

    所以話, 邊個敢睇少港女, 騎騎騎…

  15. 15 AK

    直嫂,
    信奉地心論,以為全個世界圍住佢黎轉既,唔止青少年…依個係大部份client既通病…依家…AK好興幸唔駛再對住佢地…

    養不教,父之過,教不嚴,師之惰…這個AK當然知啦…不過都係果句…依個社會係相當之殘酷無情既…

    Marshmallow,
    真係…點會有人夠膽睇少港女丫,女人能扛半邊天…經濟發展,消費市道都真係靠哂咁多位姊妹架…


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: