才:慘黃色中的殺機

26二月09

噚日事先張揚左要寫財政預算,如果今日交唔到貨…似乎係「不得民心的,注定要失敗的…」

就正如之前舞哂獅頭,起哂鑼鼓,又電視廣告,又畫漫畫,又頻頻落區接觸市民…點不知就交出左一份頗為拉雜既功課…咁就算鬍鬚曾係武林高手,可以係社民連三子既「虎口」之中搶番果份尚在宣讀之中,仍屬機密文件既財政預算番黎…佢都好難逃得過社會大眾既批評…甚至因為俾人笑而搞到自己既面色變到同份財政預先一樣咁「慘黃」…

當然,其實AK一開始就寫依段,有d對財爺唔係好公道,畢竟,香港政府一貫以來可以做到既野其實就唔多,要佢係面對金融海嘯期間,一下次變成一個「大有為」既政府,真係無咩可能…更加害怕既係佢一下子好似老懞董果幾年,「畫虎不成」,咁我地就重大鑊…

翻看過去既歷史,香港屬於開放型經濟,對於全球性既經濟周期變化,我地一貫都只有逆來順受…出面個市升,香港又跟住升,出面個市如果跌既話,咁香港就會跟住跌…香港本身只係一個城市,又加埋有聯繫匯率,所以其實政府可以用以調節經濟既財金工具本身就唔多…

睇番依家既金融海嘯…真係好難估計佢到底仲要玩幾多年,之前係友儕之間既食飯閒聊之中,大家都傾向較為悲觀,基礎方向係2010之內應該都未見曙光…如果係咁既話…咁香港都好難避免受外來經濟因素影響而沉落去…而,事實上就係,我地既財爺面對依個大環境,可以做既,真係唔多…

當然,事實還事實,係依家既水深火熱,慘不忍睹既局面之下,如果財政預算真係拎唔出d咩好橋出黎,咁財政司就難免會落得一身罵名…結果…噚日大家有目共睹…亦都的確係拎唔出d咩出黎,結果就連「上網輔導員」都成為左財爺保就業既絕世好橋…

傳媒既報道多數集中係紓困措施得五項,一頁紙講完,而且仲有d似去骨場預著一個手骨無力既骨女咁…極都係無咩feel…AK就覺得,財神爺唔係黃大仙,斷唔可能有求必應,只可以針對性咁做一d措施…所以,唔派糖(又或者派少d糖),AK覺得無可厚非,但係…更加重要既,應該係成份財政預算入面,係財富分配上,財爺做左d咩手腳…

財爺話,今年既財政預算係一份反經濟周期既遇財,係經濟放緩既時候都唔會收縮政府開支…今日信報練總就指出,今後五年政府開支較於本地生產總值為百分之十九點二,較亞洲金融風暴以及沙士期間為低…實質金額方面,名義上較去年多百分之六,扣除通脹後實質可以講無增加…如果扣除非經常性開支,實質金額減少百分之四,扣除通脹減百分之七點六…故此,實在難言政府開支未有因經濟下滑而收縮…

從不同的環節而論,不了環節的公共開支都遭到削減,教育減百分之二十三,經濟減百分之二十八,社區及對外事務減百分之五十七,房屋減百分之八十六…社福佔公共開支百分之十三,名義上增加一個百分點,具體金額是四百一十六億,扣除通賬,實質數字下降百分之四…

瓣瓣都cut,唯獨「基礎建設」無論在名義上及實質上,都有百分之五十的增幅…這些當然係從其他環節「打劫」過來的…政府在財政預算之中,明顯地向建造業傾斜…卻掛上要「保就業不可單純個呀行業受惠,而要做到各行各業都有得益」的臉譜,這實在不能不說是「指鹿為馬」…相信從事衍生工具買賣的各位金融界精英應該考慮下係唔係要去建造業訓練局又或者再培訓局搵下d「扎鐵」,「泥水」既課程讀下先…

另一樣更重要既係今日同為信報既余錦賢指出,財政預算入面講話會係發展局之下成立一個「發展機遇辦事處」…依單野回應左曾蔭權同林鄭月娥之前既講法,係發展局下邊攪一個機構,提供一部式既諮詢同協調服務,為私人建築項目做facilitator…而且,依個係林鄭底下既機構,仲有「讓相關政策局和部門可聯合研究建議項目的效益,以及提共經協調的查詢服務」…跨部門協調依一瓣,一貫係政務司司長既工作,依家由發展局牽頭,「好打得」既林鄭都相當之有依一個「有實無名」政務司司長既況味…

結合財政預算內削減其他環節開支,基建一環獨大的鋪排,以及發展局為私營機構提供協調,疏通不同部門關節的服務…兩者結合…是一條向大型財圍作利益輸送的「輸油管」…

曾俊華同林鄭月娥都係特首曾蔭權旗下既頭馬,今次既鋪排明顯同曾後布局有關…2012特首競選雖未正式宣佈起跑,但各路人馬暗中較勁…作為刀俎上的你我…都只有看的份兒…

廣告


6 Responses to “才:慘黃色中的殺機”

  1. 1 eeb

    「上網輔導員」就10k,大學生就4k,外傭就3.8k,大學生北上就3k,唉,都唔知d數點計。

    我都唔望受惠定點,唔好開我刀就算,人人自危(不過好彩我o個行都有間接受惠)

    加煙稅呀兄弟,戒咗佢啦﹗

  2. 今期預算案冇咩驚喜亦冇咩假大空,個人覺得唔錯噃。

    至於上網輔導員等等,相信唔會真係長期攪下話?反而其他綠化修補舊樓等,長遠對香港係好事呢。

    cheers!

  3. 3 Terence

    林鄭月蛾係近期活化項目很勇,叫做咁多個官員當中,係叫做緊野既一個,其他人真係唔知佢做緊咩。

  4. 4 AK

    直嫂,
    你果行唔止間接受惠咁簡單啦…絕對係直接受惠者…

    另外,嫂子如果有睇在下既舊文…小的十一月間已經停止吸煙了(唔講得上戒煙,因為其實一直無煙癮)…所以,加煙稅唔關在下的事…

    維京兄,
    今次財政預算,的確係無「假大空」,但係同時亦都「四大皆空」…面對金融海嘯,要佢拎到個解決方案出黎,的確係有d要求高,不過…都唔致於只係交一盤流水賬出來吧…

    更大既問題係…今年財政預算簡直係一件MK炸物…超級「重粉」…但係政治化裝再多,都掩飾唔到言辭既閃爍同空洞…

    Terence兄,
    搬左blog喎…好既,好環境,有新讀者,多d新衝擊…林鄭都真係好打得下,不過有時係有d過勇…不過都應該好過「無良蕙蘭」既…

  5. 5 Wing

    財爺份野冇料到, 可能係留番d彈葯俾佢老細果份, 俾佢谷下民望.

  6. 個人覺得預算案冇料到係好事,冇理由家下咩都叫政府去幫。經濟差係大環境,政府做咩都冇用。其實我真係幾 buy 財爺,佢超老實,話中產失業咪用儲蓄。雖然中產其實唔一定儲到錢,但佢講到明叫人自求多福,我覺得呢個咁清晰嘅立場其實反而係好事。

    政府官員唔係神,冇可能要求佢哋乜都攪得掂。都係覺得香港人冇理由唔靠自己走去靠政府。


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: