戲:波斯皇子

24二月09

連續放三日假,除左俾AK可以有幸係星期一既朝頭早睇到奧斯卡既直播之外,另一個重要既item係,終於成功攻略左新一集既波斯皇子…

如果大家都有番咁上下既機齡既話,相信你地一定會認識波斯皇子既大名,係果一隻2D既platformer入面,充滿左叫人慘叫不斷既陷阱以及跳躍…如果你係玩孖寶兄弟既時候就已經覺得跳下跳下跳到想死既話,咁AK可以同你講,「波斯皇子並唔適合你…」因為佢係真係好鬼難玩,好多時你係要有半步踩空左,之後先可以跳得過一個gap,然後地板即時開始震,你要係佢消失之前跳去下一個位…一個唔小心踩錯腳, 你就會end up踩錯腳,跌左落去個劍山上面慘死既結局…

如果大家既機齡再長d既話…AK提醒大家一句,早係apple II既時代,就有一隻好似street fighter咁既一對一「對打」遊戲叫空手道,其實係同波斯王子同一個人開發既…最後隻大佬「將軍」唔難打,反而之前佢隻寵物「獵鷹」…踢到AK當年發哂火…

新一代既波斯皇子係次世代主機XBox 360上面推出,其實都可以話係一隻相當矚目既大作,無奈去年年底d競爭對手真係強得太過份,所以依隻變左做「滄海遺珠」,出左無幾耐就跌價…據了解,出game既ubisoft對於佢個表現都只係覺得一般…有d覺得遺憾…

開始買番黎果陣,AK都係見佢減價先買,而且果陣有好幾隻game排著隊等打(依家都係仲有好幾隻…),所以買左之後佢都俾AK擺埋左一邊…後尾攪掂左far cry 2之後,諗住係開隻大作fallout 3之前,先KO左隻波斯皇子先,於是就開始玩…

個故仔其實都幾interesting,講一個係沙漠入面既古國,族人一直承擔看管被封印既邪神之責任,然而由於公主Elika因病逝世,國皇係極度悲愴之下向邪神祈願,以釋放邪神為交易,換公主一命…自號「皇子」既盜墓者係沙漠中迷路,誤闖古國,與剛剛復活既公主碰面,捲入左重新將邪神封印既故事之中…

係故事入面,皇子會聯同公主係古國四個不同既區域入面,對付邪神四名家將,分別係「獵人」,「鍊金術士」,「妖姬」以及「戰士」,同時更加會面對經已入魔既國皇,以及最終對抗邪神本身…四個區域係開始既時候受到邪神四名家將既魔力影響而腐化,要由皇子擊敗家將之後,再由公主將土地淨化先可以回復本來面貌,並且孕育出「光之種」,為最終用以封印邪神的光之樹提供能量…

初初玩既時候其實係有d frust既…因為佢個combat同移動既方式同一般既遊戲係好唔同既…你要既係要掌握個節奏,唔係一味按掣就可以…所以都會經常咁失手…雖然隻game唔會死,但係一出手就要公主去救你,之後又要重新黎過,咁都真係好煩下喎…另一方面,開始既時候好多地方你都係睇到,但係跳唔到過去,又或者根本行唔到,行動既自由有d受限…再加上戰鬥既對像來來去去都係四家將又或者d雜卒,變化唔大又重覆…所以開頭其實係有d捱既…

但係隨著你收集既光之種子增加,你可以開啟到更多光之神寄託係公主身上既神奇力量,可以利用分布係版圖入面既光印,啟動光之神既力量,去到一d以前你去唔到既地方…其中,紅同藍既光印係長距離跳躍,黃色光印係飛行,而綠色光印就係反地心吸力疾走,透過四者既結合,加上皇子本身既跳躍,走壁,攀爬,滑行等多采既動作,可以串連成一個複雜既action sequence,而中間就involve左不斷轉換既視點…去到呢一個時刻,你就會讚嘆今集波斯皇子入面既level design…好多既場景同埋位置,係你想像唔到,亦都係其他game提供唔到既經驗…真係好正…

戰鬥方面,AK係要到好後期先掌握到其中既訣要,所以就無咁enjoyable,基本上都係皇子既劍技同投技配合公主既魔法組合出一串串既連招去攻擊敵人…雖然打來打去都係四大家將,不過都總算各有特色,其中以妖姬同戰士設計得較好,鍊金術士就太少用魔法,獵人亦都無咩點突襲,略為失色…

畫面來講係相當唔錯,一個地區係淨化前同淨化之後既景觀完全唔同,而由於遊戲之中你要收集光之種,所以你會不停咁去explore個世界唔同既地方,所以如果認者咁玩,其實都頗為花費時間既…

無可置疑地要彈既,反而係人物設定…公主就絕對無問題,係遊戲既過程入面,甚至你會緊張公主多過緊張皇子…反過來說,皇子就真係好大問題,畫面上,佢似乎有d頭細身大,另外,俾佢講既對白,攪到佢好似一個小混混咁…

另一個好多人彈,但係AK覺得還可以既地方,係佢個結局…皇子籍光之神既力量擊敗邪神,以後公主以一直沿路收集既光之種的力量恢復光之樹既生命,但同時亦因用盡光之種既力量而復歸死亡…皇子不忍公主就此長逝,不惜親手斬下光之樹,破除邪神之封印,亦要公主復活…雖然,咁既結局,有d令你覺得白做左一大輪,不過…亦可以體現到公主同皇子兩人之間既聯繫…

另外…次世代既遊戲…即使爆左機都仲可以有新野既,以上果個未完的結局,將可以透過互聯網係26號經XBox Live下載最後一個level…當然…咁係要收錢既…不過…以波斯皇子來講…AK又覺得抵俾既…

廣告


9 Responses to “戲:波斯皇子”

  1. 咦??? 之前D故仔摺埋左?

  2. 2 AK

    話明係試刊,當然係試驗性質…不過放心,度掂又會刊出的了…

  3. 3 eeb

    最憎要跳來跳去既game,睇人玩就幾過癮,叫我跳就唔喇,爆粗都似 :-p

  4. 4 南區肥龍

    >>早係apple II既時代,就有一隻好似street fighter咁既一對一「對打」遊戲叫空手道,其實係同波斯王子同一個人開發既…最後隻大佬「將軍」唔難打,反而之前佢隻寵物「獵鷹」…踢到AK當年發哂火…

    呢隻簡直係發哂火->放棄->再打->再發哂火->再放棄->又再打....(仲要配合埋當年果個鐵箱黑色大制)...真係好難打囉...

    嗯呢隻(「波斯皇子」)...聽你咁講..等我打完SF4及狐忍後試下先...

  5. 5 AK

    直嫂,
    你放心好了…在下KO埋個DLC之後就會借依隻俾拍直…到時嫂子就可以睇住佢跳跳跳啦…

    肥龍兄,
    有無發現,以前d game係難個依家果d好多既…例如第一代既1943,雷電果d…簡直係食錢怪…

    btw…AK都有SF4喎,不過無joystick…俾你個gametag黎,等AK add你啦…

  6. 6 南區肥龍

    我都冇joystick,依排個價實在...
    或者等過多一排個價回落先再諗啦.

    呢集SF除咗畫面,真係帶黎唔少回憶!真係唔錯!

    唔怕同你講,我仲未setup個gametag,如果有立刻send俾你.

  7. 7 Wing

    講起空手道… 最記得最後小心咁慢慢行去找公主, 結果俾佢一腳ko, 原來佢先係高手, 駛乜人救?

    fallout 3真係超大作, 正ar, 玩la!

  8. 8 AK

    肥龍兄,
    的確…依排d stick炒貴哂…等下先…

    所以,隻SF我都係放係度…等有stick先玩…

    Xbox唔上Live…?唔掂喎…

    Wing兄,
    你講果個情況,AK都中過招…當時稚齡既AK,即場O嘴呆左,弱少的心靈受到打擊…

    fallout 3係一定要玩…但係依家太多野排隊…

  9. 9 Wing

    fallout3 係必玩, 但慢慢排下隊都可以, 可以等的.

    而且全世界都已經有 1.1的patch, 唔知點解亞洲仲未有. 冇1.1有勁多bug, 而且玩唔到個DLC. MS HK呢劑算係失敗作.


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: