才:越俎代庖 指點江山

17二月09

金融海嘯之下,經過農曆新年的「最後探戈」後,緊接著舞曲完結嚮起的並不是霍霍的磨刀聲,而是簡單直接的「開鋤」聲…亞視,無線,電盈,匯豐…相信殺頭之聲仍將陸續有來…春季雖然來臨,但四野仍是一遍哀鴻肅殺之音…對於一眾打工仔女來說,2009年不是一個好年頭,相信這經已是普遍的一個共識…

如此的一個年頭,我們的高官向公眾傳遞的訊息又是什麼?首先…是鼓吹消費,無論是曾蔭權,唐英年,曾俊華,就連林公公都去做一系列的消費show…力推「一個波蘿包」的故事…其次,是面對企業一面倒喊出殺頭之聲的時刻,強調企業要講企業良心…

老實地說,如果閣下之前聽信了曾蔭權先生的呼籲,決定以「生三個」作為你的家庭計劃的話,相信現在的你一定會有「誤上賊船」之憾…

不過,AK相信,會聽看曾蔭權「生三個」之建議的人士,相信不會太多,畢竟,掌管閣下財政的,可能是你自己,也可能是太座,但絕對不會是我們偉大的特首,曾蔭權先生…相信,只有你和你的太太最明白,生第一個,又或是生多一個,又再或是生多兩名…會唔會出現「壓斷擔挑」的問題…相信聽過珊珊既呼籲(養大一個細路仔要四百幾萬)之後,大家對於本身的承受能力應該心中有數…

好明顯地,曾蔭權曾經在家庭計劃之上越俎代庖…在現時金融海嘯的環境下,政府的眾多高官,亦一樣喜歡扮演摩西的角色…鼓吹消費…一眾高官,坐擁高薪厚職(就連曾俊華都無法解釋,為什麼我們偉大的特首之薪金,可以媲美管治全球第一強權的奧巴馬,遠超我們做到杜鵑泣血,精衛填海既溫家寶)之餘,完全沒有面對減薪裁員的切膚之痛(個別更可能因為增薪點而逆市有人工加),在未來收入穩定的情況下,自然可以在如此「大出血」的環境下,放心消費…

如果閣下作為一個打工仔女,搵朝唔得晚既,分分鐘今日出到糧,聽日就收大信封…係依一種的未來既預期之下,就算係一個波蘿包…你都會諗過度過…AK今日果餐午餐,係炮台山街市咬叉燒飯盒,不過係十二個大洋…簡單d講,賤物鬥窮人就係依個局面…就算37吋日本品牌LCD電視一再劈價,你都唔會輕易話買就買…

使唔使錢…唔係計你仲有幾多錢的袋,係計你估你未來仲搵唔搵得番…所以,你既考慮,同d高官應該有d唔同…

好啦,講完打工仔女,又講下做老闆既…說實在,不停咁強調「企業良心」,仲唔單止唔好「結業」,係要唔好裁員…講出來,一定人人讚好,但係事實上,大家有無諗過,其實唔樣的有違香港一貫以來,資本主義既行事方式…

在經濟莠縮的情況下,企業按照業務需要的變化,更改本身的人手編制,乃屬正常之商業活動…企業是按照「未來」的盈利情況去調節本身的編制,而不是按「過去的收益」去承擔社會責任…殘忍地講,善忘是商人的權利,無情是企業的需要…

在下於這一輪海嘯之中,是最早落水的一批,絕對明白水有多冷,只是…在下不認為,以一個資本主義社會領導人的身份,去喊出共產主義之口號,指點一眾於石屎森林之中慣於獵食的「嗜血」動物,是領導人的應有之義…

現在,我們的高官們坐在堂奧之上,一派指點江山的方式,去直接干預企業的運作,是否我們所追求的發展方向…到底是不是要引共產主義的河水,在灌資本主義的井??

當然…在下不認為我們的社會應該對於今次海嘯中下海的人士不聞不問,相反地,我們可以透過不同的社會福利政策改革,為面對困境的人士提供必需的社會安全網(以香港作為一個發達社會及城市,這是一個基本的保障)…

至於「錢從何來」的老問題…其實,政府是可以考慮向企業課以更高的利得稅,因為,只有賺錢的企業才要交稅,即使加稅,只要不是太過,基本上不會觸發企業的倒閉潮…其實,政府的功能最主要部份就是透過稅收及福利,達至財富再分配之目的…

當然…香港是一個富豪所掌握的社會,加利得稅無疑是要同一眾富豪們「分身家」,而他們不單富可敵國,更加有各式的人脈關係…我們弱勢的「政府」,除了向更「弱勢」的我們開刀之外,看來是不會有勇氣去碰老虎的屁股的…

廣告


5 Responses to “才:越俎代庖 指點江山”

  1. 1 eeb

    十二個大洋既叉燒飯盒,AK你真係克己有道。

    (心諗… … 唓,你都上咗岸啦,人浮於事/民間疾苦都唔關你事啦)

    生三個唔係同香港人講架,係同內地人講,上年o個7萬8個新生兒中,父母都係香港人既都無一半,佢地d細路都係4百萬先養得大一個,不過有三百九十七萬係香港政府俾,佢地自己俾3萬醫院費。

  2. 生三個 – 小女子又咁諗, 內地人要黎香港生, 咁俾佢地生囉. 你可能會覺得, 大拿拿四百萬幫佢地養喎… 但諗深一層, 第時我地呢代老咗, 要靠邊個養? 咁就係佢地囉. 你又可以話, 唓, 養大咗一定住係本地咩? 咁就要睇到時香港既競爭能力啦, 爭唔贏大陸班靚仔靚妹唔落黎打工交稅既, 就只好怪呢一代冇交好個棒俾佢地啦.

    企業良心 – 問企業有冇良心之前, 小女子又好想問問曾生, 你做過啲乜要佢地有良心先? 良心從來都係逼又或者教出黎(細個阿媽有冇教你唔好亂丟垃圾?), 呢個政府從來都欺善怕惡, 大財團say yes, 政府唔敢say no. 以家個市係咪真係咁差, 我諗曾生出下街食飯等位就見到. 點解重要炒人? 洗牌囉, 換番啲平靚正既番黎, 有錢佬又可以賺多啲. 貧者越貧富者越富. 良心? 咩黎架?

  3. 3 eeb

    Marshmallow,
    可能到你有小朋友時,就唔會咁諗。

    而且,佢地會交幾多稅呢? 當佢地真係正正經經打工賺錢交稅,賺3萬1個月,一年都係俾2萬9稅,如果有父母/子女要養,分分鐘俾一萬都唔到,要400年先夠cover﹗

    再者,點解d父母要落黎香港生? 有d係因為第二胎,有d係真係為咗搵著數,好多父母都唔會(唔可以)o係香港同小朋友一齊生活,但到小朋友要入學時,因為無國內戶藉,相信好多都會黎香港讀書,佢地一係就要同父母分開,一係就日日誇境返學,兩樣都唔係正常發展,當細個時唔係正常成長,大個又可以期望佢地有幾好?
    可能我咁講對有d人唔公平,但如果當中有一半係咁,都夠大鑊啦﹗

  4. 仲有, 關於電盈, 小女子有點不吐不快. 李生個仔一向都係炒家多於營運者, 咁大間電盈由俾佢買起到現在私有化, 當初政府冇插手, 都可以話科網時代既政府無能, 但現在近乎賤價咁私有化, 害死一班無辜市民. 小女子就識得好幾個公務員世佰, 收咗筆退休金諗住買電盈, 話晒係公用股, 等收息養老. 點知李生個仔一個多謝就出個咁既賤價出黎, 一世既儲蓄付諸東流. 李生個仔可以話, 係佢地死蠢, 但人地本來好地地可以過埋下半世, 俾佢攪到現在要賣樓, 住公屋先夠下半世洗, 李生個仔呢啲又係唔係仁義之財? 政府點解又唔敢插手?

  5. 5 AK

    直嫂,
    大丈夫能屈能伸,lunch既野,平有平食,貴有貴食,好又一餐,唔好又一餐…不過十二蚊既價位…AK覺得佢係走私豬都應該係一個合理懷疑…

    (千祈唔好話在下經已上岸…都係駛左入港jer…AK仲係草根階層…)

    直嫂 and Marshmallow,
    其實,人口政策係一個相當複雜既課題,亦都係香港既其中一個死穴…每日所批出既單程證,涉及到國內不同層級,不同地區既官員之實在利益(層層抽水),根本無可能俾香港有任何既審批權…相較於所謂既優才計劃,差距可止一百比一…

    生小孩方面,Marshmallow係一個宏觀既睇法…就係一個社會,一代換一代,新生代最終會取代上一代成為社會既重要經濟支柱…這個是一個很實在既思考,否則日本又或其他低出生率既地區就不會左度右度,要d人早d番屋企做人…

    不過,直嫂講到既係一d好微觀既細節,依d位如果唔攪好,即使佢地係香港出世,要成為接棒既下一代亦唔容易…

    在下認為,其實一個孩子既成長,好多既野其實係佢出世之前就已經定左…在下唔係講優生學,但係有好多環境既因素係唔會出現變化,甚至係改變孩童既出生地,環境條件亦都唔會因此而變…手握一張香港出世紙,並不代表佢就會可以成為一個香港人…

    Marshmallow,
    關於電盈…的確,賤價私有化導致不少小股民損失慘重…不過,AK認為,如果佢係透過正常程序去進行私有化,咁AK認為真係無話可說,畢竟,玩弄財技本身就係打擦邊球…當然,監管機關有必要檢查其中是否有涉及違規行為,例如種票…以維護金魚缸既生態環境…

    如果當年你係大東既股文,盈科收購之後炒高一轉,之下暴瀉…你出唔切手上d貨…OK,情有可原…但係如果之後你仲有憧景…八蚊又入,六蚊又入…咁…唉…都係無話可說…


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: