酒:無言…

13二月09

AK其實係一個很喜歡寫的人…

這個blog,由最早之前第一代版本以章回小說方式記述於職場環境下,中層管理人員面對兇險的辦公室政治,到之後一度轉為地下,再到今時今日浮番出水面,一味「酒色才戲」地談著談著…都差不多又一年…當然,比起不少的前輩blogger,AK算不了什麼…

當然,寫…除了需要時間之外,還需要講心情,AK以自身來說,出稿量最多的,還是以前以章回小說模式去寫的時候…現在這麼東拉一塊,西沾一邊的方式,寫起上來是自由了很多,但卻似乎是題目太多,但寫的意慾卻反而少了…雖然,心中總有不少的題目希望可以講,但卻總是覺得點力不從心…

同時,寫,也要講氣氛…AK最初開始寫的時候,其實也是受到CK,渣Sir及elaine依幾位前輩既影響而開筆,寫寫下又遇到更加多不同類型既blogger,成為網友(其中個別既更加之後成為左現實既朋友),果陣時大家會比較多互相留言,對事情既討論亦都會更加精彩…近來,無論是在下還是幾位相熟的blogger,可能又真的是因為大家都經已成了現實中的朋友,可以有其他的溝通方式,所以彼此既留言又少左…同時地,在下於其他網友的網友之中,每每看到不少「匿名」留言…

當然,AK也不介意「匿名」留言,不過,留言,既然是「言」,總得要「言之有物」,眼看著不少留言不單顯得空洞,而且僅屬於人身攻擊又或借意挑起紛爭,卻無助於理性討論…如此水準,也實在不能教在下提起去留言,參與其中的意慾…

有看這個blog的朋友,大多會知道,AK是一個好辯的人,絕對相信真理可以愈辯愈明,而透過多角度觀照,可以窺視歷史的真貌…只是,面對這樣的氛圍…在下感到「無言」…這也是為什麼AK愈來愈少到其他blogger處留言的原因…

這個小站…AK還是會繼續寫下去,畢竟,他陪我經歷了過去數年之間,一次又一次的大風大浪…不過…在偉大航道的航行中,看到同行的船隻日漸減少…總是有點寂然…

廣告


14 Responses to “酒:無言…”

  1. 不需要一定是君子,做人都是有所為,有所不為。海那麼大,有些船划遠了,也會有些慢慢地划過來,反正最重要的還是要自己清晰自己的航線。大家都在大自然定律底下轉,有值得唏噓,也有值得讚歎,這才是做人的過癮處。

  2. 2 eeb

    尋回你的blog之後,我也在想文字的問題,有些人的blog圖文並茂,乍看之下甚有看頭,但看完又不怎麼樣,無味。一張圖片真的值千字嗎?也要看是誰畫/拍的圖跟誰的手筆,以及在描繪甚麼吧﹗

    另,點解呢篇係"酒"?

  3. 3 AK

    Xiao Zhu,
    都係既…無高低起伏,稱不上人生…

    直嫂,
    文字於AK眼中,可以說是人類最重要的發明…無論從表達我們的情感,描寫山水的瑰麗,以至進行高深的辯論,精密的研究,無一不需要文字…更重要的,是知識的傳承,讓我們可以把經驗,智慧以至教訓,一代傳一代的流傳下去…讓他們繼承人類文明的香火…所以,這個blog…是以多字出名的…

    當然,曾經做傳媒的…都明白,畫面的重要性…但畫面背後的意義,住住顯得隱晦難明…對於上述所講的多種功能…文字,是具有不可取代的地位…

    至於…酒嗎?

    酒:用以記述關於酒之事,同時亦寫一邊只有在飲醉之後才會講的言辭…
    色:美食和美色…都是醉人的…
    才:用於對不同事件作較嚴肅思考
    戲:各式的遊戲以及電影筆記

  4. 4 火鶴

    唉, 好懷念果陣時.

  5. 5 AK

    鶴兄,

    的確係…以前玩得開心一d…無論係要以文會友又好,要深入討論又好…總會有d空間…依家…真係動輒就禍及家人…唉…

  6. 禍及家人咁慘?!

    寫扑啫, 有時候又唔明啲人點解咁認真. 最近都有個朋友賴野, 話說佢公司(咪就係要私有化嗰間囉)開始栽員, 攪到人心惶惶. 朋友係自己個扑到寫自己既心態啦, 點知俾佢個老細”朋友”見到, 要佢剷走篇野, 如果唔係”栽正你就唔好啦…”

  7. 喂,我仲o係度呀,冇乜留言但一直睇緊ga。

  8. 嗯。。。。

    真係好懷念一齊打麻雀既日子…

  9. 其實又係果句,唔0岩睇咪唔好睇,又唔使要去踩場撩交打的。

    正如我同你講果位朋友(知名不具喇),都唔0岩睇架,我咪唔再睇囉。

    要隻揪,咪開名揪囉,咪鬼鬼祟祟先得架。 (你老兄更加係喇,當年講到明歡迎單挑添…XD)

    不過的確好多人覺得網上係可以做D響現實社會唔會做同唔夠膽做的事。咁咪Seafood Ghost囉。

  10. AK 兄:

    可能,寫blog都有周期的,開始時好新鮮,慢慢總會歸於平淡。我估喜歡寫blog 的人都好多自言自語自省自覺,寫blog 除左花時間,得著也不少。有時在網上同人交流下,係幾有知心友的感覺的,現實生活中的朋友,思想頻道未必同網友的咁夾,所以在網上找到投契的也不少。

    寫blog 有時又像把一些心聲發射出外太空,像《超時空接觸》(Contact),相信總會有接收者。AK 兄是飽讀書之士,細佬一直都係CD rom 之一,冇幾可留言,只見兄台提到當初寫blog 的日子火花連場好過癮,的確勾起一些回憶,細佬同AK 兄等網友差不多同期玩blog, 斬下眼就兩年半喇,細佬留言和回覆留言亦漸少,但回顧那些留言和文章,你話大家投入左幾多心機細胞響個網上呢?

    事緣有位blogger 前輩,佢叫做PK_ (記得嗎?) 寫左篇三千幾字既留言俾小弟,幾乎是我的當頭棒喝,仲列印左出來珍而重之,頗為感動的。佢大意係話,CK 同細佬堂堂小企老闆,花咁多時間寫文出書,其實將心血花在工作上,係咪實際d? 搞到細佬都有少少唔知點咁,PK_佢老人家仲付諸行動,摺埋佢果個寫左好耐既 blog (“PK 日記"), 我就偶爾浮起鏟blog 的念頭(相信每個blogger 都有過呢個想法吧?) 唔知佢家陣點呢?

    有空再談...

  11. 講開又講,ck 最近都在留言板透露可能好快摺blog, 到時或者細佬都跟隊 say goodbye 了...

  12. 12 AK

    Marshmallow,
    寫blog既野…都係自己寫自己jer…但係一旦出現d不負責任既人身攻擊,就隨時都會禍及家人…

    當進入PR 2.0既時代,各個PR Agency都走去成立d new media division既時候…d機構就會愈係認者咁對待blogger,到時,佢地發現自己既員工係blog入面所發表既言論同公司立場不同時…到底有幾大彈性…

    Elaine,
    多謝一直以來既支持…AK都經常係你果邊做CD-ROM…

    C.M.兄,
    俱往矣…唉…不過…好多野,環境變左,只好跟住變啦…

    智嘉兄,
    其實,AK亦都唔係投訴果d匿名留言影響網絡既生態,因為,佢地存在,甚至比blogging還要早…只不過係以前既留言版,由版主負責執法,相對寬鬆…人既黑暗面,的確係只人有d害怕…

  13. 13 AK

    渣Sir,
    記得第一代AK事件簿既第一個留言,就係閣下…

    寫blog,的確係好似contact到戲入面咁…以為總有人會接收到…而又到左有人真係接收到,彼此既波長仲要夾既…果種喜悅的確係難以形容…

    不停咁寫…其實隨左「心理排洪」之外,AK相信每一個人總有一d佢自己本身既原因,畢竟,不停地寫,係要唔少時間同心力,尤其係如果要維持一定既水準,所花既精神就更多…對於AK來講,這個是一個訓練思考既過程…不過,有時都真係會感到疲倦…

    除左虛幻既cyberspace之外,每一個人都有本身實在既生活…兩者既比重如何安放,係一個似乎自控,但又非完全自控既事…縱然,真的少寫了,是不是就會更加專心工作…AK反而覺得,人,總是多邊向的…需要有多邊向的活動去平衡…

    如果兩位前輩都真係要say goodbye既話…咁希望之後大家可以係佐敦/老尖一帶既酒吧痛飲一番…

  14. 好呀好呀, 渣爺請飲記得預埋我!


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: