酒:做隻出色的嘰嘰

26一月09

今日大年初一,首先同各位Blog友講句「恭喜」!

依排其實AK都有好多野想寫,例如以巴同奧巴門兩者既後續篇都未寫,另外又想寫下中國既「俠」同日本既「待」兩者之異同(寫定係度,費事之後又唔記得)…但係依排真係好鬼忙,年三十,年初一同年初三都要開工,所以真係俗務纏身,未能動筆…

今日襯住仲未開工之前,都係時候要開筆寫寫佢,但係…新年流流,寫d咩好呢…講d打打殺殺似乎又唔係咁好喎…咁啦…AK最近買左部新電話for自己過年(之前部O2終於退役,由行Symbian既Nokia N85補上)…通常,買左部新機,AK都會幫佢換過一個「cell phone charm」,即係吊左係部電話上面既吉祥物…今次,AK揀左幪面超人入面既…唔係一號,二號,亦都唔係地獄大使或者修羅男爵,更加唔係電視機蒼蠅果d怪人,而係集集都有出場,怪叫一聲之後俾一號同二號一野踢到飛落河既「嘰嘰」…

自細睇幪面超人同埋鐵面金剛,眼光一定係自動鎖定係超人身上,最多都係有爆炸場面既提醒之下,睇住隻怪人點俾「風雷電」一腳踢爆,至於果d一野跳出黎,大叫一聲「嘰嘰」之後飛左出鏡頭既「嘰嘰」…果時真係無咩印像架(傳說之中,嘰嘰係有對白既,不過果時電視台慳皮,結果所有嘰嘰都剩係識得「嘰嘰」)…

不過有時又諗下,其實,做「嘰嘰」都有「嘰嘰」既好處,有得做超人當然好,集集都有得出場,仲要威風凜凜成為細路仔既偶像,但係集集要你又文又武,都真係好係野架…一個唔好彩,好似一號本鄉猛咁係拍攝中途受傷就要抖足半年(亦都因為咁,先至有幪面超人二號一文字隼人),仲有就係果時d超人唔似依家果d咁有咁多朋友,每一套既結尾曲都係講緊d「改造人」係幾咁孤獨…真係「對人歡笑,背人垂淚」…做怪人果d就仲慘,出得果一集,又要乞d細路仔憎,之後就俾人一野「辟靂光鎚」,跟手一腳「雷霆飛腿」就要爆架啦…死得好慘…做幹部既都好少少,起碼多幾場出,但係最終都係難逃一死…

但係,「嘰嘰」就算係好彩d…雖然場場都係過鏡既角色…通常得一個兩個鏡頭…但係起碼集集都有得撈…依家依個咁既時勢,集集都有得撈,真係唔易架…有得撈,即係起碼都仲可以領番個飯盒,好彩既,仲可以揀下茄牛又或者茄蛋…果陣時,一套幪面超人真係分分鐘有成百集,依張長期飯票真係…幾好架…

仲有就係,做「嘰嘰」,最多都係俾人地一野踢落河,下一集,又係一隻好「嘰嘰」,繼續出場跳跳下…如果你係做幹部又或者係怪人既話,中完「Rider Kick」之後,你係要爆架…真係為左成個「黑妖幫」,「撒旦黨」而犧牲…「為國捐軀」依d野,都係留番俾d大人物好d…做「嘰嘰」既,最大鑊都係跌落河,起碼…唔駛死…

不過,要做隻出色既「嘰嘰」都唔係咁容易,起碼都要識得「行就行先,企埋兩邊,死就死先」既道理,如果你硬食左超人一腳,你仲要唔識死,跌落條河,係要自作主張「加對白」,結果攪到導演叫NG…咁就真係出哂事啦,分分鐘仲會「摩托羅拉」(無得撈啦)…咁,好大鑊架…

當然…如果下下都只係照住導演咁講咁做,又真係做死一世「嘰嘰」既…要發圍,有時又真係要take risk…係「黑妖幫」同埋「撒旦黨」入面果d怪人,其實通通都係由果d被視為精英既「嘰嘰」升上去「手術台」上面接受改造而成…一改造左做怪人,從此就要聽哂d幹部同埋司領既說話…當然,你就獲得左指揮d「嘰嘰」下屬跳埋去幪面超人度俾佢踢既權力(當然,適當時候,你都要盡下義務,硬食一野「風雷電」之後爆開)…不過…依d野係唔係你想要既…就真係只有自己先知啦…

2009,牛年依始,祝大家來年,「做隻出色的嘰嘰」!

另外新年流流,打下麻雀玩番兩鋪都唔少得,咁就送埋依首AK好鐘意既好歌俾大家,祝大家「大勝無限番」!

大智大勇大茶飯 立志食腦赢大番
顯你牌品 考你章法
副牌有幾爛 有打未怕難
廿四圈也未殘 甚養颜

食不出四喜 有得玩都發
利劍如红中 面相如白板

神清氣定腦筋急轉灣 叫清一色四萬
若有咁橋咁啱 摸
點知摸正係最險章個隻大肚南
既是男兒當食南

其實有鋪混一色都好嘆
食不慣 就當搏反彈 就單吊住南

手風差要守 手風好再爭
敗了贏在玩
弱家不要貪 旺家膽搏膽
大勝無限番

廣告


12 Responses to “酒:做隻出色的嘰嘰”

  1. 1 一儒木

    恭喜發財!
    祝 龍馬精神
      鴻運當頭
      萬事勝意
      大吉大利

  2. 2 七十

    祝師兄牛年事事順心!

  3. 祝你牛年身體健康, 心想事成, 想飲幾多就幾多, 想溝邊個就邊個!

  4. 哈哈﹗我連嘰都冇份呢。呢啲嘢都係唔啱我。我都係做睇幪面超人那個算吧。

    祝 牛年順景﹗

  5. 5 chika

    集集有工開,的確係好重要的…

    同埋唔好亂咁講對白!要講,做左怪人先講喇。(最弊係而家好多怪人呀、幹部呀、司令呀,都係唔多識講對白…以為嘰嘰就係人話 XDDD 證明改造手術似乎都有失敗例子)

  6. 祝大家牛年行好運,身體健康,工作順利,心想事成!

  7. 8 賭徒H

    我地d channel 越來越接近,計我話,出唔出色都唔係最重要
    最緊要係做隻開心,不死的嘰嘰
    而且嘰嘰係反派,靈活度比較大,真係唔錯的
    你睇下林公公,換左老頂,佢又照舊屹立不倒
    咩郁人超人打緊都唔入
    真係嘰嘰之典範

  8. 9 AK

    一木兄,
    六合常中!

    七十師妹,
    身體健康!

    marshmallow,
    新年快樂!一向都係想溝邊個就邊個架啦…不過溝唔到咋嗎…

    讀食,
    可是,life is not a spectator sport wor…

    智嘉,
    唔係架…幹部識講野…

    雲兄,
    事事如意!

    Red7K兄,
    嘩!!條片真係好正呀!!最後果一個…其實都係AK既願望…

    賭徒,
    哈哈…無既,去到依家依個position,自然就會咁諗野…總之…唔使死最重要既…

    不過,林公公…佢一定係怪人啦…

  9. 10 Terence

    年初四,大家開工大吉,事事順景。

  10. 11 samsara

    AK哥哥,你有冇睇人生補時呀?

  11. 12 野蠻郡主

    新年進步呀!ak!

    我依家咪做緊唔中唔奸既"嘰嘰"囉!


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: