戲:機動部隊之同袍

10一月09

今日係同老爸出去飲茶之前,預先上左網去訂飛,費事到時又要睇到「頭岳岳」…今日揀既,係羅永昌導演,杜琪峰監製既機動部隊:同袍…無他既…澳大利亞果場平價場開九點九,咁早就睇d三粒鐘既「史詩式」大片,似乎真係heavy左d喎…而且,AK一直都係杜Sir既支持者…所以…

OK…機動部隊:同袍…主要演員仍然都係任達華,邵美琪同林雪…再加上雖然係由羅永昌掛帥,但係始終都係Milky Way,即係杜Sir仍然企左係後面…咁既組合,實在無法唔叫人聯想到杜Sir之前既代表作PTU…畢竟,始終都係機動部隊…

不過,雖然依套係「疑似」PTU續集,但係,實質上同PTU個故仔係無關連既,所以大家可以完全當兩者無關連咁去睇,而當你好實在咁去睇既時候,你就會發現,機動部隊:同袍唔係PTU既續集,而且,佢係有自己本身既特質…雖然羅永昌不能講話走出左杜Sir既影子,但係,機動部隊:同袍的確唔係一套刻意募仿之作,而係有佢自己本身既風格之作品…

杜Sir既作品,一貫有一份男人既浪漫,而同袍,團隊就係最可以發揮出杜Sir依一個主題既格式,所以你係杜Sir既戲入面,會經常見到一個team既action…由之前既槍火,到PTU,以及之後既放逐…都係一個team係mission入面彼此互相cover對方,最終達成任務…但係係機動部隊:同袍入面,雖然都係以team作為整個故事既重心,甚至講得上係用左PTU入面一句經典對白:「著得起依件制服既就係自己人」,但係好有分別地,就係機動部隊:同袍入面,一開始就因為管理層上既偏私不公以及內部競爭等不同之原因,成條team一開始就散左…

係機動部隊:同袍入面,任達華既森哥唔同PTU入面既展Sir,佢唔係果種咩都可以頂得住,照得起既人,邵美琪既May姐亦都唔同Cat姐,唔係果種單純以程序作為重點既人物,而森哥代表左果d有經驗,但係唔識做人既中層,相反,May姐就屬於實務經驗不足,但係起碼明白為官之道既中層…結果亦都好正常地,May姐獲得晉升機會之同時,幫到自己條team既人一齊上,即係「油水多」,反過來說,森哥果邊就要啃較多既豬頭骨,但係又無得升果隻「汗水多」…

係呢套戲入面,森哥唔係一貫地冷靜,理性,更加唔係一貫正確…相反,佢會有頂唔住既時刻,會有情緒爆發,會有失去理志而唔講理既時候…May姐亦都會有心慌,經驗不足,易受環境影響而做錯決定,甚至因為傷疲而落淚既時候…故仔入面既「差人」,面對悍匪,係會驚既,會逃走既…畢竟,「我地係打工,唔係打仗」…整體來講,機動部隊:同袍入面既差人,雖然無PTU入面既咁有型,但係就多左一分血肉…

故事既成個舞台,就係一座荒山,打劫銀行既悍匪逃左上山,於是機動部隊上山搜索…好明顯地,依套係一套低成本既製作,入面差不多可以講係無咩突別要花錢既場面…如果講個handling來講,AK覺得依度羅永昌就真係唔及佢師父…果一段真係缺乏左一份既緊迫感,結果就好似真係全部人都迷哂路亂咁走咁,結果依一段就得個亂字…

不過,個故仔去到最後段,入左一條隱匿係山區之地既小村之後,就開始重拾番果個momentum…由森哥同May姐不敵悍匪的優勢火力,迫於決定其中一人斷後,另一人掩護村民離開,到之後四散於各地既同袍逐一出現支援,到最後扭轉局面…

必需要贊既,係呢套戲的確係做足左research,入面好多既手號同signal,都係正式既signal,同時,攻堅既時候所採用既隊型,以及最後接受匪徒投降時既處理手法…全部都好符合正式既做法,可以講得上係PTU既教育電視…當然,唔識睇既就會覺得,最後一場,差人由四面八方包圍匪徒,火力壓制亦處於優勢地位既時候,點解要拖到咁耐先可以迫使匪徒出黎投降…well…因為,procedure入面,係儘可能protect自己,要減少人員傷亡…所以差人攻堅既時候亦儘可能避免自己曝露係危險狀態…

雖然收場果陣,成班PTU一齊唱歌真係有d老套…不過…有時…都可以講係夾到個feel既…

戲入面首歌,據聞原版歌詞係咁…歌譜係「再與天比高」….(歌詞三級,十八歲以下人士需家長陪同收看…不過,都反映到依位師兄怨氣好重,但係都好有上進心…)

未入過PTU 點算係最苦
柴頭在冷笑 暗示前無路
行埋黎身邊 發出警告
我迫住照做

雖知此操場 惡狗滿佈
膽少非差人 決不入黎做
冷冷對斜路 寂寞是命途
明日俾幫辦 句句屌老母

拋開性慾 飽遭煎熬 早知到係惡撈
整餅瀉鑊 諸多刁難 終需要你做洋奴

一生稱差人 永不信命數 斬荊棘沖波濤 更感自傲
抹去了眼淚 背上了憤怒 來日升幫辦 再與他比高

廣告


2 Responses to “戲:機動部隊之同袍”

  1. 1 Sun

    袋住封信俾亞爸果段....
    好造作

  2. 2 AK

    Sun兄,
    其實,講真,呢套野既劇情真係好電視劇feel架…有d爛…


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: