酒:我曾經戀上的…

07一月09

做左咁多年人都係住係香港,對於依個城市既唔同區域,或多或少有d感想同感情,不如又等AK寫下(不過應該無咩機會好似謝安琪既「喜帖街」咁一曲成名)…

家慈:何文田
好似應該係兩歲還是三歲左右既日子,AK既老爸「成功」抽到公屋,於是AK從此就落籍何文田,就咁就係依度左三十X年…記得細個既時候,依個屋村既租金以當時既水平來講算係高水平,對於老爸來講都真係一個負擔,不過老爸為左屋企人有一個好既生活環境,所以就頂硬上…果時,老爸既同事夾錢送左部電視機(魚眼螢幕,扭掣開關,八個channel),所以AK細個既時候有鐵面金剛(AK識睇既時候,己經唔係蒙面超人lu)…

果時仲未有遊戲機,所有細路都係出街玩既,果時既AK係一個街童,鐘意一大班人玩「捉」,初初既戰場就係一層樓,之後擴展至幾層樓…甚至係成個公屋商場…亦都係因為咁樣,對於生活環境之中既不同地理位置都掌握得好清楚,例如行邊條捷徑可以快d去到辦館買雪條,街市邊檔既豆腐花比較滑…最記得既都係依家仲食緊既冬菇亭…老爸就係係呢度教AK飲酒既…

自從領匯進駐之後,依個「老媽」開始潮,引入左唔少新式既品牌店鋪,街市都比以前清潔…不過,一則屋村既小孩都經已長大,加上商場多左管理員…一大班街童玩「捉」既盛況已經不再…面對居住既社區逐漸改變…AK唔算係好有感傷,只係覺得「that’s life…」

初戀:旺角 and SSP

中學時期,AK既活動範圍亦由住家附近擴展至城市內既其他地區,學校仍然係何文田,不過AK就好鐘意行落去九龍中央圖書館借書睇,之後又會由到旺角玩…中學時代既AK所行走既旺角同依家有好多唔同,唯一相同既係…一樣咁旺…果時,AK會走去金聲(即係依家新聲)睇午夜場,記得果陣睇王家衛既「東邪西毒」,完場果陣有個女仔好大聲字正腔圓咁爆粗:「DLS,睇L完都唔知拍左咩!」之後全場大笑…依家諗番,個feel真係相當MK…

另一個AK中學時代既蒲點係SSP…高登黃金相信係係香港玩電腦既集體記憶…果時AK屋企有一部綠色Mon既Apple II+,有機,就自然要搵野玩…所以去到高登既第一件事,係用55-70蚊買一盒五吋半既磁碟(通常用media同skc,貪佢地平),之後就去抄碟…Ultima,Bard’s Tale…仲有好多…

旺角同SSP,俾AK既感覺係相當地道,極為草根,同時係又hip,又潮…不過…人大左,你又會覺得,「咁MK,好難帶你出場面…」

舊情人:中大
大校時代既AK,除左係Franklin既307室扮演關心社會既「有為大學生」之外,其他既日子通常係聯合既法律圖書館入面自閉位潛水(貪果度夠靜可以訓)…果個時代既AK鐘意泳池邊既檸檬批,medic既「人雜飯」,研宿既涮羊肉同北方麵食(應付北來既研究生之口味)…唔like聯合既「螢光飯」同新亞果d兩枝黏埋一齊既「一對筷子」…

讀中大既,永遠記得趕校巴,通山跑…例如由山頂既NA梯,「碌」落去本部,經過小橋流水去崇基上PE…之後再由崇基爬上本部,經UC梯番上山頂修政政d course…

果時都有唔少既回憶,例如第一代既CIV係一張三吋半就裝哂,玩起上黎唔使install,AK會走入碧秋樓,霸住部電腦一個下晝…曾經係伯宿「蛇」過…又曾經潛入「新宿」(當年叫法…依家當然唔新…)既女生宿舍…甚至用grant & loan炒外匯損手至差d無書讀,要出去幫人補習(名乎其實幫補)…

舊情人是個,做到最好偏錯失的感嘆號…時至今日…小橋流水應猶在?不憾回首峰火台。

暗戀:中環
出黎撈野…讀AK果科,辦公室無咩可能係中環…不過就因為工作關係,經常係中環出入,例如成班行家係華人行「部」李生(當年仲未有長江中心),係立法局既公眾席旁聽meeting順便訓覺…最記得果時做施政報告,好多記者都會一早入左美利七樓,優先閱覽施政報告內容,不過期間係唔可以走,又唔可以講電話,直至老董講完為止…當時所屬報館跟施政報告既記者好多都係十月生日,所以每年阿頭都會拎個生日蛋糕去美利,成班記者一齊切餅食…唔駛捱新聞處提供既老麥…

唔講做野,AK都曾經蒲過中環,甚至係以前置地地庫既弁慶喪食…不過對於老蘭同SOHO始終有d格格不入…始終AK係屋村出身既MK族…不過,都會好記得蒲完之後既翠華…

撈左咁多年…從來都無撈到入中環,對於一個生於標榜中環價值既香港打工仔而然,係唔係一件憾事呢?有時都係睇你自己點睇…中環於AK來說就好似一個冷艷既千金,自問真係有d高攀唔起…

情婦:尖沙咀 and 銅鑼灣
唔蒲老蘭,AK放左工都總要搵地方去…尖咀同CWB都係經常出沒既地方,如果講中環係冷艷既話,尖咀同CWB就係治艷…兩個地方於AK來講,都係食同玩…尤其係尖咀,中童吧經已係AK既第二個家,係果度可以拎住杯酒,睇住本書…咁就一晚…

以前老尖有好多戲院…AK試過由佐敦既大華出發,行到落倫敦,銀都,港威,海運…鐘意睇戲既人當年真有福…到左依家,前面三間都無哂,得番海運同港威lu…不過收到風,中童吧附近既K11好似會有戲院…仲要係IMAX…AK真係好期待…中童吧既老闆偉哥就更加期待,因為佢另外開左間吧係K11對面…大家等佢開都等到頸長…

銅鑼灣…喪食的好去處…差不多係各國各地既菜式都可以係依度搵到,而且豐儉由人,有錢既,可以食得好貴,無錢既,地道平民咁食亦都可以搵到好野…不過,酒吧就真係唔係好得…好多上樓吧都唔係賣真既酒,叫black label俾red label你算好彩…

後補:其實AK都有一年係銅鑼灣既「銀禧小食亭」到落腳…果時都真係唔錯,一落樓就玩,不過果時做雜誌,有時要留到好鬼夜等睇版,中央冷氣又唔肯開…真係熱鬼死…果陣時「華星」仲未摺…有時出入都會同佢地d歌手同一部lift…例如eason,edmond咁…

偷食:灣仔
夾左係銅鑼灣同中環之間既灣仔…AK偶然都會去行下…因為有電腦商場,298同188,可以買電腦野,玩具,漫畫同埋game(謎之聲:仲有三仔同四仔)…不過就始終無旺角咁正,咁多同咁平(畢竟,AK都係九龍人)…

灣仔既酒吧都係好多老外既,不過個排他性就無老蘭咁嚴重,加上啤酒既選擇會比唐人吧多,所以AK都鐘意蒲下…以前都會去下dusk till dawn聽 live,不過,始終都係老尖好…

曾經:九龍灣
做報館既…可能都會出入過九龍灣,畢竟依度曾經有成三間報館…AK曾經係方向做過,入閘「do」機(傳說如果忽然發現「do」唔到機,即係你已經俾人郁左)…之後要對創辦人巨像行注目禮…當年internal有份叉雞報,係斬件比較方向,月亮同生果三份報紙逐part既表現,稱為叉雞報,一則係因為斬件比較…二則入邊真係不停咁叉叉叉…另外…又會有好多內部通訊,例如「要排除力有不逮,濫竽充數及未盡全力之份子」…(AK絕對係未盡全力既黑五類…)

記得果時沙士,office會有部手推車,燒住中藥巡樓…不過AK果時仍然好勇,一樣照同老闆走去牛頭角下村食飯…尤其係果d極污糟既熟食店有極好味既煲仔飯…

港女:Quarry Bay
AK曾經搬出來住過係Quarry Bay,亦都因為工作既關係,係太古坊行走左半年…可能係份工唔順利既影響,心理上唔太鐘意依個地方…食飯時間人多,野食又貴…AK試過好多餐都係係依度一個人咬老麥…

太古坊係一個office complex…好多著哂套裝既OL出出入入,以化裝來講,佢地無中環果班咁「甲級」,但係脾氣就一樣係咁「甲級」…都可以講,依個區域似乎真係特別多港女…競爭極為激烈… 甚至可以講得上係「三分顏色上大紅」又或者「扮哂上菜」果隻…I don’t like it…

戀人:炮台山 and 天后
AK唔係第一次係依一區番工,亦都可以咁講,大部份比較美好既工作體驗,都係係依一區…慢慢,AK亦都對依一區有左一份感情,鐘意佢有一份小鎮feel…依一區如果你有心去行下,會發現其實有唔少既妙趣,食物價錢唔貴而多選擇,又有唔少既特色小店…

炮台山,天后同大坑有一種處於旺區附近既緩衝感覺,依個feel係香港其他地方,尤其係市區係唔會多見既…唔知點解,總係覺得佢有一種悠閒感…好似人都行得慢一d…

上年年底係依度番新工,有日心血來潮,行左去天后廟鞠左個躬…或者,同佢真係有d緣…希望天后娘娘保祐,等AK可以係依度落腳啦…

另外仲有一個好處,係依度行路去銅鑼灣唔使30分鐘…中間可以穿過作為市肺(肺活量不足)既維園…對於AK來講,係放工之後散步既好去處…

謎之聲:好明顯地…情婦同戀人係有差別既…情婦一定要玩得,最緊要開心…戀人就…講feel既…

後補:舊情人2:觀塘 and 上環
之前寫漏左,依家補番…其實AK既鬥獸棋前傳就係發生係觀塘同上環依兩個天各一方既地區…果個時代,AK同埋一班兄弟係觀塘地區一齊搏殺,趕書趕到夜晚四點,坐亡命VAN既日子…

當然,果個時代,其實亦無大家想像中咁「兄弟同心,其利斷金」,一個地方多個三個人,就可以分黨分派,而且,隨住利之所在,彼此既衝突自會增加同白熱化…搬左去上環之後,「流血衝突」時而有知…最終成班兄弟就鳥獸散了…(一直都講,前傳太過血淋淋…真係唔可以出街…)

依個舊情人…可以講係「只可共患難,不可共富貴…」都係…因了解而分手…

唔知你地眼中既香港,又係咩一會事呢?

廣告


13 Responses to “酒:我曾經戀上的…”

  1. DLS!

    叫black label俾red label你? 咁L"自然"?咁「甲級」?

  2. 港女,帶有歧視成份喎,哈哈。
    笑屎喎。
    超低能,勁搞笑。

    邊有red label呀,真係好難飲架。二百蚊任劈,red label都回唔到本。

    最近W Hotel個酒吧幾好feel架,可以試試,勉強是油尖旺區。

  3. 西貢你又點睇呢?小弟住咗十幾廿年,感覺好舒服,但朝早返工成日等唔到小巴,勁麻煩。

  4. 邊間咁有良心換red label?

  5. Apple ][ 小弟細個時都有部,重記得o個時係用cassette帶load game。Castle Wolfenstein、Karateka、Lord Runner、Phantasie、Shard of Spring、Swashbuckler、Wizard’s Crown,好game數之不盡, 真係好好玩。

  6. 嘩, 你都好博愛喎

  7. 7 AK

    On Dog兄,
    叫black肯俾red你,係果d上樓酒bar來講,你應該感激流涕…

    Terence兄,
    以「非甲級」地段,收取「甲級」租金,Quarry Bay真係有d港女feel架… W hotel…好唔就腳喎…

    維京兄,
    小弟無係西貢生活過,所以「未曾留情」…不過,AK一貫好驚一d十五分鐘無地鐵站既地區…

    elaine,
    係啦…咁有良心真係好少有…

    雲兄,
    嘩…你個留言,回憶返哂黎…shard of spring真係超級正…續集demon winter都好好…

    marshmallow,
    「老兄,睇你都有三十幾歲人…依d日子以來,總有一d事,一d人…」出黎撈左咁耐,到處留情唔過份喎…仲有一個舊情人寫漏左(觀塘 & 上環)…等我補番先…

  8. 8 JC

    Haha ,

    路過, 我住開香港區, 極度同意你對天后同炮台山仲有大坑既觀感。

    JC

  9. 唔係好記得Swashbuckler係唔係小弟家o既第一隻game,不過係印像最深刻o既一隻。

    http://hk.youtube.com/watch?v=jnER7vX7yn0

    想當年小弟重係豆丁,未識得玩電腦,只好睇大佬玩。佢玩得咁過癮,自己冇得玩齋睇都好high。Swashbuckler係一隻street fighter式o既game,以82年o既電腦技術,可以做到咁流暢o既action game,真係冇o野好講。隻game入面有好多可怕像真度好高(以當時來講)o既海盜,毒蛇,蠍子,又會死人(同復活),以當年小弟豆丁o既年紀真係會驚驚。不過,隻game真係好過癮,小弟又怕又要睇,睇完又發惡夢。之後,有次畀阿媽知道原來係隻game所以成日發惡夢,就畀阿媽禁o左成個月唔畀行埋部電腦到…

  10. 10 chika

    銀禧小食店!咁都畀你記得到。

    我基本上未試過響九龍返工 (除左中學時兼職年代,同埋逃出禮頓道後一千零一次做文史哲書店店員,以及響九龍塘大學做RA果次),咁多年黎,香港沿岸畀我返晒… 由香港仔薄扶林(有時甚至要出差去柴灣西灣河赤柱…)到灣仔金鐘老銅中環流放後再由太古坊去北角去老銅又返北角甚至就黎要去太古城… 但無你咁多留情喎,因為去飲去食,始終係果幾度…

    況且,獨行俠,係唔會點樣留情的。

  11. 噢,原來我們都愛過同一個人嘅。哈哈﹗

  12. 12 AK

    JC兄,
    謝留意…其實AK都有d驚大坑會愈來愈紅…所有野都係…一紅左,就咩feel都無哂…

    雲兄,
    Swashbuckler呢隻AK反而印像唔係好多,最鐘意既,如果唔計RPG類既話,應該係Castle Wolfenstein…呢隻真係好有「蜜桃雞」(Metal Gear)既feel,都係玩潛入暗殺…每一次個地圖都係新generate出黎,之後你要入去個德軍基地…先搵個炸彈出黎,再拎去希德拉間會議室門口,set好之後你要係分幾鐘之內衝番出黎…

    過程入面經常要你係背後刺殺d巡邏既德軍,又要拖走佢條屍等無人見到佢…真係好正…

    智嘉兄,
    AK細個既時候,朝早聽十八樓C座,夜晚睇香港8X…當然記得啦…撈左咁多年,總係有d情感既…

    讀食,
    係依個城市遊走…總會有好多曾經….彼此愛過同一個人既情況都應該不算罕見…

  13. 安兄,

    Apple ][ … 睇唔出你竟然… 無奶油…

    不過Shard of Spring未聽過。

    由brick開始,然後rabbit/ribbit,跟住 Star Blazer (仲係cassette 嘰哩咕嚕版),再玩 Lode Runner玩到癲,Karateka, Swashbuckler… Spy vs Spy, Pirates! (舊版)

    Castle Wolfenstein超正,用刀仔吉人好開心!


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: