戲:神探伽里略 — 容疑者X之獻身

26十二月08

連續玩左兩晚,覆雨翻雲過後自然就係疲乏加…肚餓…晨早爬左起身走左去飲茶之後又係去睇「歡樂早場」,今次揀左福山雅治既神探伽里略:容疑者X之獻身,基於係AK電視播既時候差不多集集都有追(AK好Q惰鬼,加上唔鐘意搵部腦既HD去「較飛」,所以一直都無玩BT),電影上演自然就唔會錯過…

點知去到戲院…嘩…攪邊科?得頭三行??…都OK…一樣殺你…咪住…下…十一點半…咁…咪要等多一個半鐘…唉…算啦…好啦好啦…行下晨早流流既旺角啦…度下度下,走左去旺電,行左三層,居然開得一間鋪,好彩都俾AK搵到要搵既16GB USB Thumb Drive…行下行下,咦…田園開十點半喎…又上去行個圈先…

行左一大輪…都係未夠鐘…好,出絕招…好彩AK手邊一向都會有本書既jer…最近既,當然就係佢啦,本書明明係正正常常既「橫度」,偏偏個封面就扭轉左,結果個書名就變左打直既一列橫寫字…不過,最吸引AK既,唔係個一列字,而係畫中既一雙長腿…豐盈有緻既長腿配以黑色呢士絲襪及四吋高跟鞋,而其中腳踏既行李篋自然係全幅圖入面既焦點啦…不過…更加吸引人既,應該係果一身制服下無可掩藏既優美曲線身段…以及係超短制服裙既高叉位中不意露出既吊襪帶…

Well…當然…一本書既封面就好似一個女孩子既面孔…通常,封面有趣可以吸引更多既讀者去pick up本書(正如面貌娟好既女孩子係酒吧之中自然較多人approach),但係,對於經常係書局打書釘既老雀如AK(亦都經常係酒吧入面stand one night睇…書…and…睇…),自然唔可以單純有樣貌而無內涵啦…而依一本…真係…於是AK就係就咁樣,企左係戲院大堂,一路睇書一路等開場…

就係咁睇左半個鐘多d,一飛就飛左半本…哈哈,倒真係輕輕鬆鬆而又愈睇愈有味道,其中唔少既章節都真係非常正…哈哈…AK都非常想參加入面青少年見習退休計劃(雖然已經因為唔再係青少年而DQ左),而又會憶起一次重感冒既上班日子之中食「暖粒粒」既叉燒飯(唔知係唔係人人病既時候都要食叉燒飯既呢?)…揭到入面既北京之旅…又會想記自己曾經既富士山下…

近年唔知係咩原因,有好多制服從業員(即係工作時要身穿制服既工作人員是也…)出書,講述工作中既苦與樂,觀乎同類既書長出長有,相信都有唔少人對於制服…有d Fantasy…不過一直以來,AK都無對任何一本動過心…唯獨係依本…K書既時間係過得特別快既,一剎那之間,就到左入場既時候…

入場既時候,身邊異乎尋常地有好多十來歲既後生妹妹…以福山雅治去到三十尾既年紀…真係叫AK恨得牙癢癢…不過,打從以前同一屋簷下入面既「二佬」雅也…AK就已經…所以…

電視入面,湯川學同內海薰(其實,書入面係無內海依個人物,只係有湯川同草刈,不過,做電視,唔可以無女主角,尚幸,入面既感情線似有還無…)一般都係係一宗案件之中,遇上一d難以解釋既現象,之後展開調查,假設,實驗同求證,最後破解迷團…不過,係電影入面,就唔係以現象為中心,而係以湯川係大學時期,視為唯一平輩朋友既石神因為愛人而捲入殺人事件後展開既智力激鬥為中心…

日本既推理小說其中一個特點,就係其實佢係唔會介意你一早估到咩人係兇手,甚至係由一開始就講埋兇手係咩人俾你知,但係就係要你去估,到底佢係點樣做到既…所以,入場睇伽里略,唔使太過在乎…不過,今次個故仔,對於AK來講,就似乎都真係容易左一d,唔係太過需要出動到伽里略既頭腦…

反而,石神既動機先至係一個重點…依樣野,其實原著係日本都引起左兩派既爭議…東野圭吾表示,係容疑者X之獻身入面,佢要寫既係一份純綷既情…其中一派就認為,石神既動機實在係過於薄弱,但係另一派就話,「為左愛係一個最基本而單純既動機」…AK又覺得,如果你曾經去到石神果個feel既話,咁…你應該可以明白石神既做法…

另一方面,AK又的確地,唔係好認同湯川係電影入面既最終處理方式…或者,AK雖然都係經常強調理性既人,但係如果處身係湯川既位置,而又明白石神苦心經營既目標,而依個仲係自己所認同既好朋友…AK可能真係做唔到去揭開整個迷題…以至完全破壞朋友既計劃…電影完結時,石神既悲嗚,格外叫AK覺得心痛…

另外,電影入面既配樂風格同電視係好唔同既,熟識果一段電子結他,係要完場出staff roll既時候先會聽到,另外,電影入面,伽里略解迷無狂寫方程式…亦都無係思考時,擺出招牌動作「插蘇手」…

睇完戲之後,AK轉左入一間眼鏡店,配左一幅新眼鏡…係試戴既時候,仲偷偷地對鏡試左野「插蘇手」…當然係…一d都唔似啦…

後補:伽里略去探石神果時,手上邊拎住枝酒,AK開頭都以為係老老套套既紅酒一枝,點之之後見到石神搵冰同水,都知道應該係好野,伽里略之後係個紙袋入面拎左枝Bowmore (蘇格蘭Islay Island出產Single Malt威士忌,相對來講係香港無咁易搵到既一隻)…噢…實在係太正啦…兩條友,一晚對左大半枝Single Malt既日子…好懷念…

廣告


12 Responses to “戲:神探伽里略 — 容疑者X之獻身”

  1. 1 七十

    >配左一幅新眼鏡…係試戴既時候,仲偷偷地對鏡試左野「插蘇手」
    哇哈哈
    (呢期師兄真風趣囉)

    我覺得呢
    電影版係失鬼敗既
    因為
    換轉係金田一
    都得姐
    咁洗乜鬼湯川喎

    伽里略 BT fans七十字

  2. 戲,並非好戲,作為伽利略迷,都頗失望。不過主要都係捧福山雅治場咋!

    石神的悲鳴,真的叫人心痛、神傷!

  3. 3 七十

    哇小豬都鐘意伽利略呀

  4. 七十,
    well…成日都太過沉重好趕客架…

    AK都覺得,今次真係太過易,其中個迷題又無咩涉及物理同科學…所以係唔使出到湯川教授,一般既警察其實已經可以處理…

    有無睇東野圭吾既原版?

    小豬,
    好大程度上,今次電影版其實係得兩個角色,就係湯川同石神…其他都係茄…堤真一係最後果場真係演得唔錯,好有感染力…

    「唔好再去破解個迷題,結局無人會得到幸福…」

  5. 5 七十

    東野圭吾既原版咩黎架?


    睇開有鋪癮
    我尋晚攞本agatha christie 出黎睇
    結果發左個惡夢呀嗚嗚

  6. 6 Trista

    ha, 見到有人影評電影, 忍唔住入黎留個言, 因為我都諗住寫。
    我有睇原著小說, 果晚睇完真係訓唔到覺……個結尾太shock, 尤其當石神o既犧牲換取唔到所愛o既人幸福……
    睇小說入面, 完全係睇湯川o既掙扎同傷心, 對於另一個天才惺惺相惜到訝異心痛……
    以及結尾湯川向花岡&石神「攤牌」o既心酸……
    我估我同你睇同一場, 不過我坐最後(你係咪26號係mk百老匯睇11點半場?)
    電影版俾唔到我震撼….對比起小說, 反而有好多瑕疵!
    尤其有「內海薰」依個角色o既存在!!!!超大o既敗筆!
    電影D感動位完全感動唔到我…(即使見到福山飆眼淚都咁話= =)
    福山o既演出未算好(我個人認為…masha fans勿斬我)
    反而堤真一演石神就係要讚, 果種因為愛而全心全意去幫助、發現花岡與工藤一齊o既妒忌&最後見到花岡自首而失控吶喊….
    係原著依一幕係令我好傷感好心痛, 因為會見到湯川攬住吶喊o既石神, 向警察講「就俾佢發洩」, 天才與天才o既相惜….!!!
    再者, 睇小說, 湯川果種內心掙扎與不相信石郎會為花岡設一個咁o既督計都令人無奈, 而草薙在小說入面o既重要性係電影又冇左…(湯川信任依個認識廿年o既朋友先將真相講佢知…)
    電影改左, 我失望左, 結局o既展示又差左, 總之, 同電視版一樣, 我唔太滿意…

  7. 七十,
    東野圭吾係伽里略既小說原作者…

    又,
    睇偵探小說會發惡夢既咩?

  8. 呵呵呵 🙂

  9. Trista,
    電影版要容納內海依個人物,所以將草薙依個人物一分為二,但係由於內海係擔當close to湯川既人物之同時,卻預設左佢係一個唔太聰明既人…所以,內海難以作為湯川既平輩…結果,內海同草薙都係電影入面變得可有可無…

    以戲論戲,堤真一比福山有感梁力得多,當然,係角色發揮上,石神亦都比湯川多左一重…畢竟,湯川係人物設定上係唔會有太多情緒變動…

    有時都會覺得,湯川這個人物,其實以文字應該會比以影像去呈現來得容易…

    btw, 我地曾經係同一個時空出現…

    elaine,
    新年快樂!!

  10. 10 Trista

    所以, 我就覺得睇左原著再去睇電影, 唔多唔少都會失望而回。草薙角色o既變動到湯川, 同電視都有唔夾o既地方。記得我睇到一個網友o既超絕評論: 最可惜還是北村一輝繼續成為大茄,高興的是柴咲コウ一樣是大茄…
    希望往後果本《聖女的救濟》唔會拍, 我真係怕連草薙依個角色都冇埋….
    我地真係係同一時空同在過呀?? xD

  11. AK:

    如果您對電影版的故事不滿意, 不妨睇文字版(本書剛出了); 最大分別係文字版係沒有內海薰呢個角色。

    有好幾位朋友睇過套戲, 佢地一致認為叫我不如等出影碟好過。

    祝您新年愉快!

  12. 12 野蠻郡主

    ak…我已經諗到扮伽利略既你係點既樣喇!嘻嘻嘻!

    (可能我太out,我一集都未睇過)


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: