才:殺人step by step

23十二月08

大時大節(依句無論你係唐人定係外國既朋友都應該唔會錯),其實Ak都唔係咁想動火,尤其係依排為左年底個大show而忙到嘔血既日子…不過,有d野都真係唔鬧唔得… 係正式入正題之前,又等AK先講一個小故事…

話說某一個星期六AK又同老爸老媽去飲茶,嘆其一盅兩件…咁落左單,AK一路嘆報紙,一路係度等食,占知等左好鬼耐都未見影「盅」…就係依個時候,聽到侍應阿姐同上菜既嬸嬸開始有d爭論,於是就八八卦卦咁豎起對耳仔去收下風…

嬸:「咩擺錯呀…明明依張係184,果張係185…」
姐:「喂…你睇清楚個table number未架…呢張係186,果張先係185,184係果邊…」
嬸:「…妖!!你地點擺架,明明一直以來都係依邊係184,果邊係185架嘛…」
姐:「……」
嬸:「總之你地唔好亂改d number啦…」

AK望一望,發現自己坐左係184,原來d「盅」同件就係AK身後果張table,等AK去食…事件自然就引發左AK既一d思考…就咁…

一個工作多時既員工,自然有佢既習慣同記憶,會將佢地做開果一套視作為理所當然既,阿嬸係用腦去記住每一張table既number,之後以慣性既模式去出菜…然而,大家去慣茶樓飲茶既朋友都會知到,放table number果個stand係moveable既,係流動既,所以,其實,每日每張table既number,其實係可以有差別既,當然,侍應可以為左方便大家工作,以固定既模式編排,但係亦可能基於不同既原因而有需要改變。前線既員工,除左按照慣例去工作既同時,其實係唔係應該係上菜之前,睇清楚每一張table既number,而唔係單純依靠記憶同慣例去處理工作呢?所以,係依件事上面,AK認為,錯在上菜嬸嬸…

其實,所謂既指引,英文叫做guideline,就係將一d日常工作之中既routine野,按慣例將每一個step制度化,成為一個方便新入職員工可以參照,學習的工具。

但係,既然講明,指引只係對應一般既routine情況,咁遇到突發性事件既時候,正常地,我們都會要求處理事件既主事人展現出彈性,懂得面對變幻局勢臨機處理,臨危而不亂,明白所謂的特事特辦…

如果我們的日常工作只需要跟從guideline,咁果一份工,基本上係唔需要一個人去做,而只需要一個機械人,又或者一部電腦,就可以應付自如…正如曾經戰勝電腦「深藍」既世界棋皇卡斯巴洛夫就曾經講,同電腦對奕,其中一個重點就係在於唔能夠死抱棋譜入面既textbook example,因為電腦背書一定好過你,你跟足textbook就中哂佢計,佢完全掌握左你每一步棋…人腦比電腦優勝(起碼,暫時來說)就係果份彈性,可以按不同情況,採不同方案去應對…

事實上,這個世界不可能有一個機構,可以有充足的指引去應對任何既情況,員工本身就係需要「帶個腦返工」…所以依個世界係唔應該有一份「什麼時候應該用指引而什麼時候不該用指引的指引」,我地係assume左依個世界,人係懂得因應情況去做judgement…

結果,今年我地既政府完完全全display左俾大家睇,guideline係點樣用既…guideline就係爆左鑊之後,用黎做擋箭牌同埋遮醜布…香難難民滯留泰國無包機…我地跟足指引做過喎…醫院門口心臟病發失救死亡…我地跟足指引做過喎…

我地跟足指引做過喎…依句說話即係咩意思?簡單d講,就係死唔認錯…即係唔肯負責,唔肯上身…

咁…點解遇到突發事件果陣,唔敢「特事特辦」而要跟足指引?因為特事特辦,決定錯左就要上身,如果跟指引去做,衰左就可以講,「我地跟足指引做過喎」…

簡單d講,仍然係「多做多錯,少做少錯,唔做唔錯」既心理…

再簡單d講,就係「無承擔」…

進一步簡單講,就係「無心」…(借左肥醫生既講法,AK誠意推介大家去佢既網誌看看…)

咩野「我會做好依份工」…唔該,收皮啦(AK掟鞋抗議!!)

後補:噚晚同智嘉兄「對酒當歌」之時又佢remind左在下,其實係好多大機構入面,guideline的確係一件殺人工具…「你唔跟guideline做」可以成為人地郁你既理由…不過,AK仍然覺得,咩時候用guideline,咩時候唔用guideline,依個judgement其實唔係咁難make…

廣告


12 Responses to “才:殺人step by step”

  1. 1 米搞

    >前線既員工,除左按照慣例去工作既同時,其實係唔係應該係上菜之前,睇清楚每一張table既number

    1.如果個阿姐識咁諗/做,佢已經唔駛做傳菜阿姐;
    2.响建築設計界泥睇,梁展民就係一個識得「特事特辦」既人,(佢會為左整體推動件事,而寧願踩少少界),所以佢嗰時紅灣半島單嘢先會有咁多建築界既人出泥撐佢;但係傳媒只係識得focus响佢可能俾左「著數」地產商度...ok,咁搞完一大輪,到而家換左既官員,咪寧願咩都唔搞囉...所以十大機建搞咁耐都冇嘢見,部分原因真係咁泥既

  2. 真係講哂小弟心裹面o既說話。

  3. 3 chika

    要問責,成件事牽涉極大的香港人心理偉大工程…

    當然政府外判制問責制其實亦扭曲左職場心態。

    我只能話,可以的話,我仍然堅持做傻仔。

    正如之前茶餘同你提過,亦因為咁同另一人嘈過,但我會話,我係以一個急救員的角度睇,D政治粉人後來講乜,我唔理。

    除左路過的韋醫生外,亦唔好抺殺左跟住黎支援的電單車救護員和醫護助理的努力。(果部defiberator係當年砌左好耐先至畀救護員用的… )

  4. 米搞兄,
    AK咁睇…

    如果個阿姐識咁諗,佢就唔駛做傳菜阿姐…well,香港對於前線員工既服務水準,似乎未去到咁低喎…起碼,如果係office入面,個細既做錯野,你都會炳佢,叫佢下下唔好啦…

    梁展民事件…特事特辦係有cost既,呢點大家都明白,紅灣半島事件係唔係應該咁樣特事特辦,有值得爭議之處…泰國包機及明愛失救,係唔係應該只係按照指引處理,亦都可以討論…

    以上三件事件,是非,其實都已經係公共空間入面有左定論…

    安諾兄,
    以上既粗淺觀察尚嫌粗疏,有興趣既,AK推介肥醫生果邊…

    智嘉兄,
    傻仔萬歲!!

    AK唔係全盤否定前線員工既努力,甚至,對於係醫院reception果位阿姐都無太大既責難(正如流川楓對新加入球隊既櫻木講,「你犯錯係大家預期左既事」),但係頂唔住既係醫院處理事故既態度…如果講要問責既,幫佢地老闆度個Line to take既友仔應該係最先果個…

  5. 兄弟, 我剛好著10號鞋, 預埋~!

  6. AK兄:聖誕快樂啊!

  7. AK,

    提早同你講句Merry X’mas

  8. 8 一儒木

    Merry Christmas and Happy New Year.

  9. 人係生既, 指引係死既. 但係冇啲咁死既指引, 又點會俾到咁多機會人去作反呢?!

    小女子呢邊都有啲好騎呢既指引. 好似話, 每年都要做火警演習. 火警演習呢樣野, 本來都冇乜問題既, 最大問題係, 小女子公司係四十幾樓喎, 著住對高根鞋跑樓梯, 咪玩啦… 但係老細又話要喎! 咁咪早幾分鐘坐(車立)落樓, 他他條條買杯咖啡先去報到囉… 有火燒埋黎既時候, 自然會識走架啦!!

  10. On Dog兄,
    你居然有依d大殺傷力武器…?我果對得9號半咋…

    Hana姐:
    聖誕快樂!!

    馬沙兄:
    聖誕快樂!!!

    一儒木兄:
    聖誕快樂!!!!

    Marshmallow:
    其實有好多時,依d所謂既指引,都係為左做一d極之無聊既野而做既,不停咁去做一d重覆重覆既checking,結果影響左成個工作進度…

    不過,有時,d高層玩指引依一樣野,真係出神入化,妙用無方,簡直殺人不見血…

  11. 我只係同你對酒,當歌係你自己的事… XDDDD

    其實我想講係,好多人覺得做一個決定,中間有好多考慮,包括飯碗同埋條命 … 好似我呢D猶疑較少的,就係傻仔…

    同埋指引的存在,唔止係一條,係好多條,又因為上有政策下有對策,你對得D小動作指引多,就會開始麻木,總之你在工作崗位的話,跟足指引就唔會死 (這種心理在小薯仔職系中特別明顯)。呢個係近十年官僚系統愈黎愈rigid (當然佢地認為係好靈活同清晰架…)之下的副產品。

    早幾星期水姐講左一劑血戰中年女秘書,就係拎住成條考試規例逐點啄 (當然對手亦打出D favourable的條文) 黎救一個小妹妹免佢要retake…

  12. 12 野蠻郡主

    反而我又唔係咁諗得晒喎!

    無錯,阿嬸冇睇清楚係佢有責任!
    但我會覺得,d枱跟no.排係一個秩序,

    如果執枱個時係成日郁d no.咁就應該要briefing一下啦,
    叫人留心下唔好放錯。

    其實d阿嬸應該就冇咩讀書冇咩文化,
    唔排除未問清楚就先發制人鬧左先!

    不過我估如果好地地張d枱移位都係有d原因,
    加上早班中班夜班咁多人輪,溝通上就一定有不足既地方!

    所以…其實只係一d好小既誤會,希望d人真係可以學習有好既eq,睇清楚先嘈之巴閉啦!


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: