戲:葉問

20十二月08

星期六既朝頭早,自然係同老爸老媽去飲茶啦…通常依個節目,去到十點之前應該就差不多結束(視乎果日份蘋果有幾多值得AK詳細,逐隻字咁睇既新聞,例如今日AA疊就有歐聯十六強抽籤結果,國米對曼聯)…因為,AK既第二個例行活動,係走去旺角百老匯睇「歡樂早場」…

百老匯既早場優惠都好似做左,即使係首輪既戲,佢都係收三十五蚊,不過就只限係十點幾果d場次,所以如果要係海嘯之中仍然繼續可以追住d戲黎睇,依個係一個好選擇…另外,佢係依d場次係會做長者優惠既,收費只係十皮,對於一班長者來講,依個真係「便宜又大碗」既娛樂,所以有時你會發現,有d公公婆婆同你一齊睇「地球停轉日」…

今日去到,見到有兩套都係十點二開場,分別係葉偉信同甄子丹既葉問,同埋僵屍片吸血新世紀,基於AK唔係十來歲既靚妹仔,對於哈里波特入面既「西追」(真係一個好差既譯名)無咩迷戀,所以,自然係揀葉問啦…

相對於黃飛鴻,霍元甲而言,葉問依一個人物,新一輩既朋友應該認識不多,AK亦都只係知佢係香港攪左「詠春體育會」,同埋佢係AK既偶像,李小龍既師父…佢應該係甚至比AK老爸更上一輩既人物…所以,AK無咩理佢係唔係「忠於原著」,但求睇得開心就算…

電影開始既時候係一九三五年,果時葉問係佛山經已享負盛名,不過就未有設館授徒…期間貫串兩場其他武師上門「論武」既場面,之後開始去到電影既重點時代舞台,一九三八年,日本仔在開始侵略中國之後一年,佔領佛山…

電影入面既葉問無好似黃飛鴻,霍元甲咁樣,領導對抗侵略,佢只係善盡一個男人既責任,屋企無米,就去典當家產,典當都唔夠既,就係做「倒煤」(即係煤工),賺錢養家…

當然,如果套戲只係一個煤工既故仔,咁就會變左做一套文藝片,就自然唔會搵甄子丹做主角,套戲入面,管治佛山既日本將軍三浦(池上博之)係一個武痴,佢「邀請」佛山既武師去同日軍作武術比試,打贏既,可以獲得白米…電影入面,三浦算係一個日軍之中既正面人物,表現左日本人既尚武風格,不過佢既手下佐藤大佐就係典影電影入面既「日本人」,射殺中國人同殺一隻畜生無分別…

咁相信去到依個位置,AK都唔使多講,套戲之後既戲情會點發展落去啦…所以…都係慳返,唔講劇情…就講下感想啦…一貫以來,睇甄子丹既打戲,始終係唔夠睇李連杰既打戲咁過癮,其中一個重點就係,李連杰既打法,係以中國功夫為基礎,每一招每一式既打出,都有一份實在既中國武術風格,畢竟,佢始終係五屆國術冠軍,但係睇甄子丹既打戲,尤其係「殺破狼」,「導火線」入面,佢引入左好多現代既格鬥技動作,打起上黎好似係好實用既,亦都唔係話佢唔好睇,但係就始終就係差左一d…

反之,今次拍葉問,用既係由一代俠女嚴詠春所創既詠春拳,動作就顯得有板有眼…AK細個亦都真係學過下詠春(之後又走左去學跆拳),所以見到入面葉問指導工廠工人既基本套路,AK都真係認得出果幾手既動作…亦都因為咁樣,套戲入面既打印場面就黎得多左一份實感…其中,葉問係日軍總部練武場上以一敵十既場面,就明顯係向李小龍既精武門致敬既場面…

齋講打,女性觀眾應該唔會鐘意,依套戲,AK覺得係好過霍元甲既,因為入面既葉問以及其他既角色,比較合乎正理同人性…其中入面,出任日軍翻譯既林家棟俾葉問怒罵係走狗,林家棟話佢都要搵食,之後葉問話,「你睇住同胞係面前俾人打死都得既?」…正正回應…「搵食jer,犯法呀?」(當然,之後林家棟依個角色仍然係一個正面角色…可以話佢係曲線咁幫助有需要既人…,而係過程入面,佢亦都真係有所付出…)

AK有時覺得,依家有d男人真係唔係好似男人,每每以逢迎鑽拍走精面視為「機靈」,「識轉膊」,「噤撈」,而當見到其他人唔係做佢地既同一套既時候,就會指人地「死硬派」,「唔識做人」,甚至去到話人地「扮野」,「sell自己」…AK要指出既係,有d野,係唔扮得,亦都唔sell得既…就好似咁,係老闆面前提出對於不合理既政策之反對意見,為受欺負既人發聲,依d行為,係有好明顯既付出既(極可能 引起老闆不滿以至人頭不保),有d「烈士」係無得扮既,有d「風骨」係無得sell既…有d行為,亦都唔係一句「搵食jer」可以推得過去…

唉…一野就差到得好Q遠…翻番黎講番套戲,電影入面其中一個重點自然係天王嫂既處女演出,亦都一如估計,唔係好得…即係咁…導演都唔係好想佢做花瓶,所以有兩場應該有表演既戲俾天王嫂…不過熊黛琳既演出就明顯地不合格啦…

套戲最終,就自然以「怒打日本仔」作為結束,其實,AK就無好重既中國人自我識同,對於日本仔亦都無咩特別既國仇家恨(不過據聞,阿爺果代有唔少軍票俾老爸摺飛機飛鬼哂),不過睇到依d情節,總會有一d熱血…

AK覺得,學習歷史,最緊要既係吸取其中既教訓,了解不同事件既前因後果,從而學識趨利避害,不要重覆犯錯…其中係可以將道德對錯抽開既(當係機械理性分析模式既時候)…至於對與錯,歷史自有公論(去到依個位,可能又有人會話,歷史係勝利者所寫…不過,AK認為,通過不斷既研究,考察,多讀多想,配合開放既心,自然可以找到「真實既歷史」)…的確,日本軍人發動侵華戰爭,為中國以至日本人民帶來災難,歷史中經已判別為站於「錯誤」的一方(無論係道德責任上又或者係戰略戰術上…),但時至今日,在認知層面以外,升格至排日,仇日既情緒層面…則大可不必…

廣告


8 Responses to “戲:葉問”

  1. 1 Terence

    睇完呢套,到睇王家衛既葉問,想知到葉問會係「梳頭」定係「跳舞」,佢係一隻雀仔定係一代宗師。

  2. 2 s-pig

    >>AK要指出既係,有d野,係唔扮得,亦都唔sell得既…

    咁快就咁大感觸呀?

  3. Terence兄,
    唔知點解…對於王家衛,AK始終唔係果個feel…佢又唔係套套戲可以click到我…

    S-pig,
    哈哈…千祈唔好誤會…AK不是忽然因為環境而有d咩特別的感觸,只係一貫都佢唔過眼d無腰骨既人…

  4. 奇怪… 唔知點解,今個post竟然一去先睇個ending寫乜…

  5. 我仲未睇呀~~~

    題外話,同你講定聲聖誕快樂先 🙂

  6. 學緊"十字拳", 玩緊"大掃子"既時候, 都有向師父偷師, 學一下"小念頭"架~!

  7. C.M.兄,
    好架,今篇最尾果段同尾四果段先係重點…

    Elaine,
    恭喜出書成功!!聖誕快樂!!

    On Dog兄,
    咦…食過下夜粥喎!

  8. 葉問始終係一套商業片,而其主攻市場又係內地,其內容取捨當然由所偏頗。

    內容保留日本侵華o既史實,刻意誇大日本人o既惡行,借意改寫葉問o既義舉。由於政治關係,葉問戰後加入國民黨o既事,更隻字不提。

    http://zh.wikipedia.org/w/index.php?title=%E8%91%89%E5%95%8F&variant=zh-hk


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: