酒: why so serious?

17十二月08

以下依一篇..真係純屬個人意見節目,一切責任,在下一力承擔,唔鐘意既,可以唔睇…

咁講啦…話說有一日,中學既好兄弟年度聚會,依d咁既日子,AK一向都係差不多從不缺席既(除左番大陸果d之外,因為AK其實唔係好鐘意「三條六,番大陸」)…畢竟,依班兄弟真係識於微時,相知相交二十年以上…

由以前係學校既飯堂一齊打bridge,到今時今日,其中兩件入左政府做(打死AK都唔會count自己係做緊政府工架啦…雖然…必定要計既話…其實都算係邊陲),一件似乎將會繼承祖業,另有一件就自己做左老闆…而依六件入面,又有兩件經已結婚,另有兩件似乎有穩固既另一半…可以咁講,依班友仔,三十幾歲人…開始去到左一個位置,進入一個其實你又唔會好想搏(反正再搏都未必有得升,而就算真係升到,又未必一定係一件好事),但求又唔洗俾人炒(係呢d海嘯既日子,可以咁講既人就真係…唔多既…),身邊既野似乎好穩定,只要你唔係太刻意去disturb佢,其實你應該可以好穩定(即係好悶)咁過埋下半世既環境…(well,大家可以話依班友無咩大志,也可以講佢地看透左一d世情…總知,無論你地點睇,依班友都應該唔會因應你點睇而有d咩變化…)

通常去到一個咁既階段,有d友仔就會諗下,係唔係到左時候,要搞d大工程去為自己帶來一d衝擊…(美其名為,衝喜…即係一d不必要既人為刺激所引發既不正常波動…)

咁,席間,其中一位身處超穩定架構,而又新近開始同人enter左一段serious relationship既兄弟,向另一名於今年初「忽然」同眾兄弟講話要結婚既兄弟討教:你可以點樣肯定,對方就係你會同佢結婚既一位?

果位兄弟講,其實早係一開始既時候,基本上,係就係,唔係就唔係,係唔需要經過好長既時間去觀察既…不過,有d「係」既人,唔係出現係「係」既時候,總之,當生理時鐘去到「係」既時候(極可能係上兩段所講既果一個時候),而身邊果個人係一個「係」既人(即係,理論上,有多於一個既可能性)…咁…基本上就已經可行…而其中…係有一定程度既risk既…

對於risk依一樣野,AK一向都好明白,唔同既人,對於係唔同既事件上,take risk既能力係唔同既,而係relationship依一樣野上面,AK係好唔鐘意take risk…特別係…係serious relationship上面…AK唔反對,一旦成功既話,回報係好高,甚至係,去到無野可以代替既層次 ,但係一則,成功率唔算好高(即係唔好講話唔係十拿九穩,六四,五五都算係一個好可以接受既數字…不過,通常見到既,都似乎係四六,三七咁啦)…二則,要投放既資源又似乎係相當高(尤其係…你要果一段關係長久而持續地維持係一個「成功」既水平之上)…

而事實上,之前所講果一種無野可以代替既回報,的確,其中有一定既部份,係無可能係其他野上面搵到代替,但係,其餘既部份就大略上可以係唔同既活動上獲得替代品,而所需既投入就遠較為低…(well,冷血動物既mean-end calculation…)所以,AK好難去同任何人enter into一個serious既relationship…

自細鐘意睇戲,其中,一句影響AK最深既對白,出自於heat入面,Robert de Niro講,「任何既人同物,只要係你唔可以係十五分鐘之內帶走,基本上,佢從來都唔屬於你…」(另一句,係張曼玉係東邪西毒入面講歐陽峰,「唔想俾人拒絕,最好既方法就係先拒絕人」…係唔係好變態…?)

AK由此就發展左奉行多年以來既「三不政策」,即係「唔買樓,唔結婚,唔生仔」…過去亦都曾經有出現一d人「唔信邪」,認同奧巴馬既競選口號,又或者睇得「地球停轉日」太多…以為「we can change…」不過,so far,似乎都無一個可以作為參考既成功先例…

未來既野,好多時都講唔埋,或者有一日,你見到一個好似AK既人,用揹帶係前胸揹住一個bb,另外一隻手拖住一架手推車,係銅鑼灣地鐵站入面使用凌波微步去同d死花靚爭用闊閘機…你截停佢問,「你係AK?」

佢會答你,「我係C.M.。」

####

後補:

繁忙的工作 加一把勁來過渡
無聊的交際 祇管把笑容製造
回家 打開一副電腦
模擬找到 模擬傾訴 模擬很好

從來不知道 怎麼竟各行各路
從前的一套 今天仔細仍照做
夜深 粉紫色這外套
模擬起舞 模擬擁抱 模擬得到

仍然能擁有夢想跟前途
仍然能擁有自尊跟自豪
仍然明知許多女伴 一轉身會遇到
為何感到 這不算最好
明明從不信天荒跟地老
明明從不會後悔得不到
明明從新掌握去做 我總可以做到
為何今晚我不懂如何 告別煩惱

浮華掌聲裡 祇想一個人讚慕
從難關出發 心境可向誰透露
是否 悲歡早有定數
何時得到 何時失去 誰能猜到

仍然能擁有夢想跟前途
仍然能擁有自尊跟自豪
仍然明知許多女伴 一轉身會遇到
為何感到 這不算最好
明明從不信天荒跟地老
明明從不會後悔得不到
明明從新掌握去做 我總可以做到
為何今晚我不懂如何 告別煩惱

廣告


12 Responses to “酒: why so serious?”

  1. 最後果段好好笑!掂!

    就算遇到對的人,總要係對的時間同埋地方先至對得成。唔可以否認人係會變嘅,但睇得太多為咗結婚而結婚嘅人,所以婚姻其實係紙扎的圍牆,吹啖氣分分鐘都會冧,如果唔生BB,婚結來把鬼!

  2. 用闊閘機…你截停佢問,「你係AK?」

    佢會答你,「我係C.M.。」

    笑鬼死我….

  3. 飲大咗?

    呢個世界有好多選擇,跟你一樣的人也很多,我也很尊重的。既然網誌都可以有新ak,我們不用封晒後路嘅。有時候,真的搞不清楚邊個打邊個。AK……CK……CM……有冇數漏?

  4. 真係一路妖~ 樑三日,一路笑 XD

  5. 哈哈,最後嗰句,差啲以為你交义扑添!

    至於點先係"The One",小女子不吐不快.好Q難講喎,倪生上個星期先話周小姐唔係,今日又可以話係.王維基又話結婚嗰個未必係你最愛嗰個.連CK兄都會話,有啲人,時間上啱啫!唔值得真心戥佢地高興.

    今日嗰個係"The One",聽日可能又唔係,又或者今日我係人"The One",但係難聽啲講句,聽日,小女子可能行出街俾車車鬼死,咁係"The One"又點,唔係"The One"又點?

    小女子結婚嗰個,係咪我最愛嗰個?點鬼知啫!點解係都要我比,A同B比,係A好定係B好?咁B同C呢?A同D呢?挑!點比呀大哥,唔同人黎架喎!佢乜乜可能大過你,但肚腩一樣大過你,咁,邊個好啲呀?

    重有,今日係最愛又點?聽日呢?後日呢?十年後呢?你係先知,知道得咁多?

    時間啱就結婚?咁就唔值得戥佢開心?以家人地結婚,我鐘意又好,唔鐘意又好,人地開心又好,唔開心又好,關我X事啫!

    一句到尾,Why so serious!?人生得個幾十年,咁都要比一餐?係咪傻X咗呀?

  6. 係喎, C.M.又可以話:「我係CK!」

  7. 嘿,我咁風流倜儻野性難馴,一定會話:「我係渣估!」

  8. 點解結婚拍拖要向其他人交待,自己開心咪得囉。

  9. 風流倜儻野性難馴嘅渣估會俾條揹帶同手推車箍住架咩?!

  10. 10 AK

    Hana姐,
    最尾果段…嘻嘻嘻…在下是一路寫…一路笑的…

    結婚嗎…在下又咁睇,也不是完全否定佢,並唔係覺得佢可有可無,又或者因為是否要生BB既需要而存在…其實剛剛相反,在下係好難肯定雙方真係可以做到果個無比沉重既誓言…尤其係對於果d係現代環境既現代人…

    馬沙兄,
    如果俾著係你係同一個情況下俾人截停…你會點答先?哈哈!

    讀食,
    其實無論係AK,新.AK還是真.AK…實質還是同一個…AK係Getter Robot…

    C.M.兄,
    都係講事實jer…唔駛妖喎…

    Marshmallow,
    交叉扑未到…AK寫果篇俾左你啦…收到無?

    就係同意…本身The One呢一個概念就有d童話式…生活係現實中既人,根本無可能去make sure…AK真係無果種信心可以去搏一搏…既然唔想serious既,咁…真係,why so serious?

    火鶴,
    無錯,互聯網真係提供左好多分身俾大家架…

    雲兄,
    唔係同人交代,而係同自己交代…所以先至會有以上既諗法…

    火鶴& C.M.,
    火鶴兄,exactly!AK正常講俾C.M.兄知…就係因為「揹住BB車,拖住手推車,同死花靚爭闊閘機」依d行為一d都唔風流倜儻,野性難馴…(下刪一億萬字),簡單講,就係唔型…所以…先會講自己係…「C.M.」…

  11. AK兄 – 收到啦…廿五號零時零分,準時刊登!

  12. 12 野蠻郡主

    ak,

    “the one"理論太複雜,我唔係幾明!

    不過最後個段…笑爆,我梗係形住有一日,你會咁唔型喎!
    可能未必係你既小朋友,可能好似電影咁,幫人照顧呢?哈哈哈!

    其實,揍仔公…未嘗唔係幸福既!俾返對腳自己嘛!


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: