才: Linus & Ricky

05十二月08

依排睇左咁多政府d硬膠野,真係睇得多都有d悶…今日亞視又換管理層,其實都無咩特別,一貫積弱左以幾十年計既麗的/亞視,近年換管理層都真係換左好幾轉啦…特別既係兩個人既名字,Linus & Ricky…即係「青樓名妓」搭「電訊魔童」…依個組合就真係…有創意,我鐘意…

以前做記者都曾經跑過下電訊beat…果個時代仲係講緊盧永仁係沙田開壓縮工場,提供不切實際既VOD業務,張永霖就同王維基鬥生鬥死既時候…當時王維基看準長途電話費用高昂,可以利用「回撥」技術大幅削減成本,於是猛然對當時既香港電訊展開猛烈既狙擊,期間既「1666魔鬼」,「CTI殺價超人」廣告深入人心,最後甚至可以成功迫使電訊推出「0060」…

就係長途電話變得再無肉食既時候,王維基開始提出自行鋪設光纖網絡攪寬頻,當時不少的網絡服務供應商都係透過租用老電既網絡,王維基既策略極之大膽,時至今日,香港寬頻經已經係緊隨電訊盈科之後第二大寬頻網絡服務供應商…

相對於武功路數大開大合,霸道而迅猛既王維基,張永霖既武功就顯沉穩練達,帶點綿裡藏針既特質,由佢係國泰到之後既電訊盈科,兩個大形機構均係面對住強烈既競爭以及臃腫既架構,張永霖以一個企業醫生既身份入主,展開大刀闊斧既改革,期間親自落手策動多次既裁員行動…但係係佢狠辣既手段之下,佢仍然可以同員工維持「有商有量」既外裝,可以看出其人手段之高明…

無線與亞視,鬥左咁多年,亞視一直都係二奶台,除左一貫講緊既慣性收視之外,其實亦都同香港電視行業本身既特質有好大關係…大家好鐘意睇既日,韓,台劇,基本上所有演員都係同製作公司簽部頭約,一套戲,一張合約,之後製作公司再將套戲買俾唔同既電視台,所以你可以係A,B,C三個台都一樣見到可愛教主…

香港就完全係另一回事…藝員全部同無線簽左長約,死約,期間只可以為一個台服務,而無線對於藝員既控制,係可以講得上無所不用其極既,例如,唔容許藝員接受其他電視台既訪問…透過控制藝員及歌手,無線既鐵桶江山可以講係牢不可破…

利用旗下藝員必需依靠自己才可以取得曝光率的優勢,無線製作大量既劇集,這是亞視一直無法超過無線的其中一個關鍵…香港電視觀眾有別於日本的觀眾群…日本不少的年青男女,晚上是會趕回家去看「月九」的電視劇集,其中一個原因是相對於香港,日本的公共交通極早「收車」,而的士則超級貴…所以年青人最經濟的娛樂是回家看電視(間接導致日本電影業不振之原因),但是…香港嗎…我們的父母只會擔心兒女太遲歸家吧…(除著金融海嘯,不知這個情況會不會有所變化…) 無線電視劇集的觀眾,以家庭主婦(師奶)為主,故此劇集亦以他們的口味作為依歸,在這種情況下,相信可以看到港產「魔女之條件」,「女皇之教室」的機會…應該同你係行街既時候撞到金城武既機率差不多…

面對如此的局勢,做左十年怨家既「大偉」王及「哥利亞」張有咩新橋可以扭轉局勢,AK真係覺得好有趣…佢地上任之後叫出亞視將會不以劇集為重點,走中產路線,AK樂觀其成,為一池死水既免費電視市場引入新競爭…「大偉」王強調自己係香港仔…不會以亞視的深紅背景為顧慮,在下亦會「放長雙眼」睇下佢點攪…

廣告


7 Responses to “才: Linus & Ricky”

  1. 1 Terence

    即使魔童同企業醫生入主亞視,相信都係冇野睇之作,因為電視是資本投放極大的行業,看NBC一年幾百億美元收入,但只是一億多利潤,可見並不是易搵錢,所以資本投放是要大,而無線多年來的資本是華人市場是數一數二,亞視是沒有可能鬥得過他們。

    始終本港電視行業不是internet這種仍可以發揮創意的平台,是成熟的服務媒。

  2. 2 chika

    王維基我無乜感想,但見Linus Cheung出山我第一句諗到的是… 姣婆唔守得寡 XD

  3. 站在觀眾立場,當然希望有啲好嘢搞出來。

    你提起盧先生,我馬上想笑。記得當年係烕係勢架。

  4. 從節目及內容上,當然希望會有競爭然後有進步啦.

    而今次兩位加入及安排,今日ltv cafe都有講,阿luk所講都成立及有可能.

    http://www.rthk.org.hk/rthk/radio2/LTVCafe/20081206.html

  5. 5 Terence

    「天地雄心」既盧永仁?當年都好威架,仲搞過上市公司主席,市值廿億但最後cap唔到水,走去做聯通又唔掂,直到落戶I.T. (當自己做返IT呢行)。

    不過VOD當時又真係超前左d,到依家都未流行。

  6. 對王維基有 D 憧憬 ~~~

  7. Terence兄,
    睇魔童一上場有整左碟豉油無情雞,伸出到副總裁咁落本,應該會有d野可以睇下既…風物長而放眼量…

    盧永仁…AK其實對佢無大好感…不過,佢果陣時做VOD所面對既最大問題「頻寬」,就係近年因為寬頻上網普及而不藥而癒…

    智嘉兄,
    依個Linus唔係史路比入面果個,落手殺人絕不手軟…

    讀食,
    AK相信應該有野睇既…

    肥龍兄,
    Impossible is nothing…

    巴林,
    今次應該會好睇過「電視風雲」既…


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: