才:超級無敵獎門人

01十二月08

原本今日諗住繼續寫下食經,又問一次永恆既問題,到底係「元祖既大利清湯腩好d,定係隔離既華姐清湯腩好d?」不過由於睇報紙見到民建聯既三百億刺激經濟方案竟然叫曾蔭權出黎做超級無敵獎門人咁super搞笑,仲要唔止俾獎金,仲要送樓送車送盈富基金咁爆…真係唔寫寫佢都唔係波啦…

講真,由一開始自由黨睇見香港人眼紅澳門有錢派,之後到台灣有消費券,就即刻跳出黎做民粹派代言人,叫出一人一千蚊,七十億消費券救經濟既方案之後,AK就覺得依個世界,原來真係可以去到赤裸裸一手抓政治本錢(討好市民),一手直接係政府口袋中拎錢咁狼死既地步(消費券限期內強迫市民洗錢,就算市民唔洗多左錢,剩係用將消費券,班商家佬都一樣可以拎張消費券去問政府收數…咁仲唔係直接既利益輸送??)…

雖然學者不斷指出消費券既眾多問題,包括行政費用,黑市兌換,市民減少使用現金消費等等等等眾多問題,但係自由黨一為神功,二為弟子,自然死咬唔放,之後又攪出市民六成支持消費券,消費券街頭簽名等「有趣」既現象,無非都係要generate一個勢出黎同政府bargain…畢竟,依家自由黨唔係第一大黨,都係果句,「有智慧不如襯勢」…一於發動市民,迫政府做野…

其他政黨見自由黨咁狼死咁去兩手抓都做得出,自然就唔介意拉低塊人皮,出黎做政治秀…工聯會先係自由黨既建議之上叫出人人二千,一百四十億救市既口號,之後玩到民建聯出掟過三百億既建議出黎,仲要每周攪個幸運大抽獎…社民聯既黃毓民就一句,「攪咁多花臣,不如現兜兜一人五千蚊好過啦!」

去到依一刻,好少有地,AK會贊番一句政府,因為曾俊華問左一句三歲幼童都應該問得到既問題出黎,「咁,錢係邊處黎先?」

我地既社會,就係係一大班各懷私心既政客手底下,攪出「經一事,反一智」既現況…

廣告


8 Responses to “才:超級無敵獎門人”

  1. 美國政府咪會答:印出來囉。唉。

  2. 唏,呢d咁灰濛懞既環境,查實佢地果d proposal娛樂性不知幾豐富,我嗱嗱林上網睇下有邊個居屋未開售,依家揀定樓啦。

  3. 3 Chika

    我諗起兩德合併後補貼德東人民生活的食物券… 有一年響Weimar親眼見過,爭在未影相。

    不如收購晒D空置豪宅平租 (貴過廉租屋,同深水埔樓差不多價啦) 畀我咁喇 😀

  4. 4 ltw

    好有興趣想知果陣既食物券係點用架?

  5. 讀食姐,
    印出黎係可以…最驚攪到第日d人係用紙幣既重量去衡量佢既價值jer…

    C.M.兄,
    揀定樓咁好…係既係既…多左一個家庭成員,都要諗下換樓啦…

    智嘉兄,
    有趣喎…佢地d消費券係點架?

    Itw,
    AK都好想知…

  6. 6 Chika

    > 有趣喎…佢地d消費券係點架?

    呢個,我都唔知,只知係一張印仔卡之類的東西… 應該係畀領失業救濟金的人用的…

  7. 7 Chika

    咦,上網搵到… 原來唔同省食物券(Lebensmittelgutschein)係唔同樣的…不過原理係你拎住去超市買食物 (唔可以係其他野,例如煙酒),多除少補。

  8. 如果是說美國的Food Stamp,美國華人叫這做糧食券。像信用卡一樣,你去超市買東西時,有另一部機畀你碌,要輸入密碼,然後扣錢,有點像ATM卡,政府直接將錢輸入張卡,你就拿張卡去買超市買食物。不單超市可以用,大部分賣食物的店,例如蔬果店都接受。有時擺街邊的農夫市場也接受的。

    這張卡是給低收入人士用的。據統計,全美超過一成人,前幾天看報紙,好像有17%的人用這糧食券。


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: