酒:病中雜記(下)

22十一月08

君子重信而踐諾,以下係病中雜記既下卷…不過寫番出黎,仲係好多激動既心情…所以,有d亂,唔好見怪…

二.殺破狼命之一年
每年既年頭年尾,AK既好妹子「飛天貓」(佢既哥哥除左AK之外,另一個別號係「長靴貓」)都會幫屋企所有人睇下紫微斗數,呢個妹仔有d「神婆」格,係佢間二百呢左右既SOHO入面都要日日燒香「祈福」果隻,加上又真係有時會講得幾準,所以,除左每年年三十,初一二三果幾日d電視入面既蘇民峰同麥玲玲之外,AK既其中一個餘興節目就係聽妹子講下一年既紫微斗數…

零八年年頭,飛天貓批AK「殺破狼」入命(即係貪狼,破軍同七殺依個大三角形既星陣,其中一粒轉到入命宮),今年一定會有重大轉變…AK雖然不致可否,不過心入面諗,其實今年年頭郁差不多係要動身轉工,果時既形勢其實都頗為麻煩,所以一早就疊埋心水,係農曆年之後全力搵新工…期間又發生左好多事,結果AK係四月尾,五月初就離開左之前既公司,轉左去另一間公司度做…

五月至十月初係呢一間公司入面既經歷都可以講係「不想提起,未敢忘記」,中間自己一定係有d問題既,實力發揮唔到三成,而再加上環境同個勢都好唔就自己,結果係十月頭就出左事…

剛剛睇完CIA光碟離奇失竊案,入面佐治古尼話,「任何男人係佢未搵到新工之前講佢自己辭左職,應該都係俾人郁。」果陣時都真係幾驚架,雖然其實心中都有一d預感,所以八,九月己經部署搵新工,但係去到十月頭出事既一刻,手頭上去到有把握既,真係一份都未有,再加上九月尾十月初係成個金融海嘯拍埋黎既一刻,係呢個時候落水,感覺真係「相當刺激」…其中既故仔,太多係非筆墨所能形容,惟有親身一試先可以知道…當然,AK唔希望大家有依個經歷,不過都希望大家明白點解之前AK會無心機提筆…起碼,AK未至於堅強到係這個對自己講真話既網誌上面,扮一個堅強樂觀既面孔見大家…

咁出左事之後,AK就當然係更加加速去Send信搵工,期間又真係個個星期都有interview,AK覺得依樣野係好好彩既,因為佢撐住左AK個人既spirit,唔會一下子跌到沉底果隻,中間自然又多得智嘉兄,好妹子「飛天貓」及好兄弟「拍直」既多番照顧,鼓勵及幫助(「拍直」兄,雖然成個過程入面你無咩點出聲,仲係AK無野撈既時候同AK一齊去散財買game,不過,有時就係treat you as a normal person依樣野,AK就覺得好受…咁多年兄弟,肉麻野唔講,都係,在心中…),所以,AK一路仲Keep到…

但係,隨著金融海嘯愈演愈烈,十一月初開始,AK發現係求職網站上面,合式既職位明顯大幅減少,由以前每個星期一係八點之前寄出二十至三十封email,跌到十封,五封,三封…局面真係俾想像之中慘烈…需知一個男人,除左自尊之外,亦都必然有一d野叫做責任,有時真係「你唔食,佢都要食」…眼見日子愈來愈緊迫,心情就開始進一步下沉(AK覺得,每個人既下沉速度係唔同既,視乎好多唔同既因素,但係真係就算你幾努力踩水,度力應該好難支撐多個三個月,之後沉左就會有一段時間先可以再踩番起,所以,頭段對於面臨危機者真係一個好關鍵既時間)…

就係依個時候,忽然之間接到一個叫interview既電話,佢收到既係我八月寄出,最早果一批求職信,仲要係覺得,依個級數既機構,應該唔會要AK,不過既然寄開信,順手按多一次forward咁解,點知佢叫我十一月頭第一個星期1st interview,之後第二日就打黎叫2nd in,偏偏AK接左單freelance,於是推遲一個星期,去到第二個星期先2nd in,in完唔夠二十分鐘,AK係度行緊商場果陣就收到電話講confirm appointment,要AK send income proof同大學證書,之後叫AK星期六去驗身…由in,到上工,到依家番左一個星期左右,全部都係十一月發生…

記得飛天貓講過,「你今年最衰既日子係八,九,十三個月,依三個月過左就會好…」真係超級邪棍…經過今年既變動,AK更加明白,出黎撈野,唔關乎你到底你既功夫成不成,因為真係「我說你成你就成,我說你不成你就不成」…好多野…都係睇個天既jer…當然,AK仍然都係果句,盡人事,聽天命,係盡人事在先,聽天命在後…

三. 成與不成
AK今個八,九,十同十一月,應該前前後後經歷左無三十都有二十次以上,1st,2nd,3rd既interview加上相當多既written test…

interviewer有時會係你面前,用枝筆係你個CV上面畫下畫下,AK既其中一個發現係,居然出乎意料地多interviewer係AK中六,中七所入讀既學校依個項目上面著墨…

回想AK中六既時候,由於會考所讀既中學無文料,於是轉左去同一個會既名校讀預科…果兩年處身係果班Blueblood既面前,AK一介「屋村仔」,日子挺不好受…可以講,果兩年係AK既「黑歷史」…

到左今日,距離AK讀預科既日子,真係十年以上了,出左黎撈野咁多年,interviewer仲係會係依d其實都可以講係唔relevant既item上面著墨,證明左,原來真係有「名牌」效應,而且佢仲係可以影響你十幾年既添,於是AK明白點解咁多父母用心良苦到賤賣貴買,都要搬去d名校網,再全力催谷佢地既子女入讀名校,原來真係影響深遠…

但係,話又說回來,係Samsara姐姐處借來既Freakonomics入面講左,一個孩子係學業成績上既表現,其實好多既條件係一早,甚至係係個細路出世之前就已經決定,而後天你再點做,其實唔會點變到個結果,即係,你不停係佢耳邊播莫扎特,以及每晚睡前同佢講故仔,又或者媽媽係孩子年幼時quit份工去照顧佢,以至到送佢入去一間名校讀書…對於孩子既實質影響都係輕微…

咁,以上兩者講左d咩呢…?或者咁講,AK好肯定,果兩年係名校入面讀既預科,對於AK本身既人格,智能,知識以至其他任何方面,並無任何實質既增益(呢一點,AK自己知自己事),但係出面既人就會為左AK入左去兩年,鍍左一層金…就以為AK既「含金量」高左…所以…入名校,未必係要個仔/女學識d咩,受d咩英才教育,因為以過來人既身份講,真係無用,反而,鍍一層金,又真係可以影響你十幾年,分分鐘,會有多幾個人覺得你「成」…

後記
驚濤駭浪既一年尚未過去,好工作特別著重Holiday Season,可以預期黎緊既一個月都會有好多挑戰要去適應同學習…AK仲未可做到:
「回首向來蕭瑟處,也無風雨也無晴。」
不過,希望可以做到:
「人生何處知何似,應似飛鴻踏雪泥。泥上偶然留指爪,鴻飛何復計東西。」

PS:由於之前少不更事,居然許下諾言,如果搵到工,又仲有名額既話,就報名跑十公里…結果,今年依一個好死懶既AK就要係二月八號既晨日(最早果group)去跑十公里…問過On Dog兄同肥龍兄,由維園行去政府總部係四公里左右…hmmm…AK要開始練下跑…一定要…

廣告


15 Responses to “酒:病中雜記(下)”

  1. 1 七十

    !!!!!!!!!!!!!!!!!!!!!!!!!!!
    你個諾言係向邊個許架

    果日星期六你晨咁早打俾我
    我就緊係啪一聲kup線啦哈哈哈

  2. 妖~

    早知我就走堂同你地去啤啤佢喇。鎖你鎖你…

  3. 不要跟黑歷史糾纏,但要從黑歷史中學習,避免案件重演。

    好眼訓 (踩左35個lap腳踏車再游左半個鐘頭水),收隊。

  4. 恭賀ak兄係柳暗花明,希望ak兄可以係新環境大展拳腳!

    渣估兄之前提到河內道間德國吧都係占仔從前係tst返工既聚腳點, 不過唔係ak兄口中個間…占仔好想搵下中童吧係邊間…所以已經去過附近幾間可疑地點…

  5. 5 AK

    七十師妹,
    唉…諾言既野…都係果d usual suspect啦…

    嘩…師妹…我打俾你果陣睇個日晷,好似都三杆啦喎…

    C.M.兄,
    果日係純陽之約,幾個男人大杯飲酒,大口吃肉…各人左手酒杯,右手割肉刀…老兄你唔好酒,驚悶親你喎…嘻嘻嘻…

    智嘉兄,
    明白明白…

    占兄,
    多謝多謝…今次真係山窮水盡疑無路,柳暗花明又一村…

    中童吧唔難搵,認住酒保既身形就搵到架啦…

  6. 始終認為, 如果一間公司D HR要請一個做左10年以上野既人, 基本上佢既大學情況如何都可以不用浪費時間多研究, 如果話連中學既野都要磨磨, 此實為HR浪費公司珍貴資源之專業做法, 相信連老板都只好自隊而不可改變左右之.

  7. 原來果晚本書仲有段古...

    另外,下亞厘畢道步行至維園既距離(3.5km).
    檢視較大的地圖

  8. 飛天貓會唔會免費幫網友算命?或者睇你個 blog 先有免費?
    睇你篇 post,真係完全明白男人之苦。(女人都得)聽日一於同老細宣布誓死效忠公司先。
    😛

  9. 9 七十

    師兄:
    我倆一定要擇日對飲
    不過我要飲香賓(真過隻呀下!)

  10. 歡迎回歸!下次飲野記得預埋小女子喎!

  11. On Dog兄,
    不過有時真係無計喎…係佢地眼中,依d係佢地可以countable既factor,加上有時,依樣可能係成張CV入面,佢地惟一比較熟悉既名詞…

    肥龍兄,
    本書剛剛看完,真係好正架!

    3.5km…真係要練下先…免得二月八號跑跑下暴斃…

    維京人兄,
    等AK叫飛天貓掛多個招牌出黎先…男人之苦既野,其實AK相信人人都差不多,真係我有壓力,你有壓力…」

    七十師妹,
    飲酒之約,AK是從來不會推卻既…你度到期既就通知在下啦…

    Marshmallow,
    多謝多謝…吃肉飲酒團既人數增長中…

  12. 12 野蠻郡主

    恭喜晒!
    真係睇到都替你開心呀!
    “柳暗花明又一村"呀!

    加油啦!

    八月份寄,十一月叫見工…
    咩咁耐架…

  13. 多謝多謝!

    雖然由寄信到見工就係耐d…但係之後個process真係好快…

  14. 你新office好近我屋企 🙂

    作為一個屋村妹,出黎做野之後,真係覺得「名校」校友係好重要既network。有幾個朋友同我講過,屋企人當年要佢讀international sch,唔係要佢讀得舒服開心,只係要佢識多d人。

  15. Elaine,
    依個區域真係充滿回憶,AK打工咁多年,今次係第三次番來依個區,前兩次離開都係跟Office一齊搬,所以,好多比工既日子入面美好既part,都係係依區發生…

    Social Networking既重要性,睇facebook果一類交友網站就知啦…證明左無論中外社會,都係「關係關係」,「煙酒煙酒」…


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: