戲:砌Lego

21八月08

今晚同智嘉兄多飲左幾杯…個腦既活動能力有d低落,一d以前其實講唔出既野,忽然之間又好想講,或者,就係依度寫一寫啦…

####

細細個果陣既AK,屋企雖然有一部鎖係櫃入面既電視,等AK仲可以偶然睇到鐵面金剛,但係就真係唔算係一d富裕既家庭…果陣時細細個,其實好鐘意Lego,但係屋企真係afford唔起去買,所以,通常都係襯老媽子去人地屋企打麻將既時候,問人地借黎砌…

咁,通常,你借左一幅Lego番黎,之前係未砌過既,通常都會按住一份砌圖紙去砌,希望可以建成心目之中既一幢城堡…但係,其實大家有砌過Lego既都會知道,Lego既砌圖紙係非常之咁「蝦人」既,有時會無端端依道多幾舊,果邊少幾舊咁,總之,你要睇通佢,其實都唔係咁易…

於是你係咁砌下砌下,一路砌到老媽子打到第五圈西風尾既時候,忽然你發現,原來自己係佢地第一圈南風果陣經已砌錯左…大Q鑊啦…

去到依個位,你有兩個option:

1)你可以拆番散佢,重新砌過,糾正番先前既錯誤…但係,你知道依家都已經五圈西風尾,北風都黎緊啦…當你老媽子食糊再連莊…應該都拖唔到幾耐…如果你拆散重新黎過既,應該去到八圈打完,老媽子叫走果陣,你都無可能按照砌圖紙砌得完…果時真係「阿媽要你呢家走,誰敢留多半粒鐘」…而你又知道,你一走,明仔就會拆番散佢…下次再黎,可能佢俾你玩既已經唔再係依一幅Lego啦…即係,你要面對根本砌唔完座城堡既結局…

2)又或者,你可以繼續照砌落去,反正都已經錯Q左,就由佢啦…總之「樂高多創意」,之後就開始係既有既基礎上面亂黎,總之最量要係就手,併埋好睇就得…結果你砌下砌下,整左一部自以為係蝙蝠車,實質上咩都唔係既野,又或者再衰d,整左一舊唔知係咩既東西出黎…無論結果係點都好,總之你就係砌唔到先前要砌果座城堡出黎…表面上你好似發揮左創意,實質上就好Q唔開心,因為你真係砌唔到座城堡出黎…

去到依個位既時候,見到老媽子碰出雙番西…你地會覺得拆卸重建,定係繼賣砌落去好呢?

俾d指引黎啦…在下最近真係對住呢幅Lego,煩到想死…

廣告


24 Responses to “戲:砌Lego”

  1. 1 chika

    我都係果句… 照砌囉…

  2. me2…照砌.

  3. 兩者都冇所謂,Lego嚟嘅姐,唔係真架!而且,切得幾靚都要留低架啦。

  4. 砌啦~

    最多朦住眼姐, 砌埋呢劑~

  5. 5 kw

    ak兄,砌埋佢啦
    反正之後副野既下場非你可以控制。

  6. 6 Terence

    去到咁既地步,將錯就錯,「樂高多創意,件件考心思」就係呢個道理麻,哈哈。

    講係lego,佢有款「巴黎鐵塔」,超正呀。

  7. 既然仲有成三圈時間,不如將成副lego袋起,攞返屋企慢慢砌。(最多同明仔講聲話“借住幾日先”咁囉)

  8. 8 s-pig

    睇你想要完美,定可以接受呢個世界有好多野,都係冇perfect啦…
    如果只係Lego,我會照砌
    係其他野,就睇下係咩嘞
    (係咪我諗多左呀?)

  9. 記得細個嗰時,啲lego都係老表啲剩餘物資,一合二合咁攞番黎俾小綿花玩,自己鐘意砌屋就砌屋,鐘意砌飛機就砌飛機.所以細個既時候,唔知原來lego,係成set咁黎砌.乜原來lego重有砌圖紙架咩?!

  10. 占仔覺得張野比你係死既,人地設計既野…跟到就跟law, 可能ak拎住幾舊積木砌2砌人地會依你個新design畫張出黎呢

  11. 唔好心急, 照砌啦!

    學CM話齋, 不如將成副lego袋起,攞返屋企慢慢砌(橫豎今朝掛八號, 依家掛九號), 可能有意想唔到的效果哩。

  12. 砌落去啦.

    btw,呢次有冇砌圖紙呢?其實冇砌圖紙都冇所謂,或者仲好添,砌到你眼前座城堡就得啦.咁有多既parts,咪用喺第二度地方囉.

  13. LEGO!!!

    首先如果是我是不會砌錯的.因為之前買了一盒砌了幾小時,哈.

    正題,如果是砌錯了,應該是會繼續砌.反而會砌到一些有idea的東西出來,或者是下一次砌時會實現到.

    我接觸lego也是去我表哥家裡玩. 之後好成績,屋企人買了一盒小小地的lego做獎勵.之後便愛上lego了…

    PS: 在今年lego 50周年了…推出了特別版的set. 有一些很美的,我印像中,有一set裡面好像有幾顆金磚(沒記錯的話是電渡金)

  14. 14 野蠻郡主

    如果係我,我一定會拆左再砌..我依d完美主義但又冇咩恆心既人,雖然可能整唔成,但我太固執唔想有dd唔好既地方,你可以話我固板。

    不過,如果計埋經濟成本效益,唔好學我,我依d藝術家脾氣來的!

  15. 死﹗唔係好識打牌,不過,唔緊要啦,砌囉,砌到走為止。

    我小時候家中電視也是上鎖的。噢,鐵面金剛﹗係乜即係幪面超人?當年因為有小朋友扮幪面超人在天台跳了落街死鬼咗,結果政府禁播,後來播番要改名。

  16. 16 AK

    多謝哂咁多位朋友既意見…在下其實仲係好諗唔通,畢竟,只要停係依個位,其實就會諗唔通,又或者只會得出錯誤既決定…而如果係依個問題上錯既話…係好麻煩既一件事…

    大家都認為應該掉左份砌圖紙,繼續砌落去…咁…如果AK話俾你知,砌圖紙其實反映左一個叫做理想既概念,又或者,佢係代表住一d各位一直堅守既原則既時候,大家係唔係可以咁簡單就將依d野掟走???

    繼續砌落去,應該點都可以砌到一d野出黎,但係就一定唔係你之前想砌既野…咁…唔拆左佢就番唔到轉頭…

    拆左佢咩…犧牲又真係好大,之前用黎建立佢既時間全部浪費,而且,你係要係一個遠低於現時基礎既位置重頭黎過…到八圈打完,你砌唔完,你甘心咩?

    智嘉兄及Samsara姐姐,
    砌落去可能恨錯難返啦…

    boring pet,
    在下明白,做得好定唔好,無野可以帶走…但係…砌錯左,始終就係砌錯左…你想留低既係一個錯誤?

    On dog兄,
    蒙住眼點砌呀…

    kw兄 and Skyx兄,
    錯左,砌落去仲有意思咩?

    terence兄,
    黎緊有泰姬陵,仲正…

    C.M.兄,Karen,
    明仔望住你,問你,「你唔係想打包拎走呀?」

    S-pig,
    你無諗多…再諗下啦…

    郡主,
    拆番再砌,唔夠時間喎…

    占,
    唉…錯左就係錯左…點有創意,都係錯左…

    棉花and肥龍,
    張砌圖紙好緊要架…其實,每一份lego都有佢一個default既型態,而砌圖紙就係達到default型態既唯一方法…

    讀食…
    無錯,係面超人V3,就係因為果個細路玩風雪電,結果攪得我地差d無得睇…btw…研唔完…點辦…?

  17. 哈哈! 你知我係講緊其他野既…

    砌呀~~~!

  18. 砌唔完咪砌唔完,有乜點算。

    忽然想起前幾日有人問我:我個仔差一分才合格,入唔到名校,點算?

    我答:咁咪差一分唔合格入唔到名校囉。

  19. 很簡單…因為你已經砌錯了.在你在想到底應該砌還是拆的時候已經更花時間…

    所以很簡單…樂高本身就是發揮創意的.根本對我來說…砌出來的是很美的.(原set),但…我相信我能砌到更美的作品(起碼我眼中是最美的,最滿意的.)
    那張紙我只是當作一張說明書而已…

    如果AK兄你硬要扯到原則問題…那我覺得…是因為你大意沒有依原則做事,才會出現進退兩難的情形…

    以上純粹個人意見.沒有惡意 ^^

  20. Hmm…以你個比喻.假設砌圖紙係做人(又或者打工)既原則,有啲人會跟住張紙砌呀砌.好彩砌得啱一take過,跟住就會坐咗係到,一世咁欣賞住呢架蝙蝠車.

    有啲人又會砌完之後,拆咗佢再砌過,不過都係跟番嗰張紙,砌完出黎都係嗰架蝙蝠車.

    有啲人唔好彩,一世人跟住張紙砌呀砌,砌極都砌唔出佢想要既,不過佢好努力,最終都會俾佢砌到架蝙蝠車.

    有啲人唔好彩,一世人跟住張紙砌呀砌,不過佢唔努力,砌都一半話,唓!都唔好玩既!

    有啲人唔好彩,一世人跟住張紙砌呀砌,但係又砌極都砌唔出喎,咁佢半途丟咗張紙,自己砌.最終又砌到架Honda喎,都唔錯啦!

    有啲人跟本一開始就冇打算跟住張紙砌,靠自己既想像力,又俾佢砌到間豪宅加Bentley,咁佢要架蝙蝠車黎又做乜?

    每個人既創意同耐力都唔同,但係大家有個共通點,就係點,都要砌落去,咁先至好玩架嗎!

  21. 21 AK

    On dog兄,
    係…我知…

    讀食,
    hmmmm…都係既…砌唔到jer…都無人保證過拎住砌圖紙就一定砌到既…

    Skyx,
    無緊要喎…依度公開園地,無話邊個可以入黎留意邊個唔得既,最緊要隨你喜歡…

    你講得無錯…有d野真係「一失足成千古恨,回頭已是百年身」…或者,真係無得番轉頭,因為都已經洗濕左個頭…

    棉花
    你都講得無錯…都只有砌落去先知…

  22. 照砌,砌完出份說明書,出版。

  23. 23 Terence

    Agree with Marshmallow


  1. 1 幪面超人Vs鐵面金剛 « Read and Eat in the Big Wide World 無書不歡,無食不樂

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: