才:點解外傭稅咁大鑊??

24七月08

噚日打開報紙,見到港大民調既最新結果,曾特首既民望繼續下滑,投入左百億以上既「利民紓困」措施,民望「竟然」仍然係欲振乏力…反映左呢隻「股」出現在基本問題,再加上九月立法局選舉既外來因素影響,相信佢在短期之內都將會繼續尋底,難以重拾升軌…股民如果持有依隻股票,相信果批應該都係「蟹貨」,希望襯偶然反彈既時候(相信機會不大時)可以順勢減持,輸小當贏…至於未入市既朋友,建議都係持盈保泰…一於cash is king啦…

繼上次果一鑊「腐肉腸」(副局長)事件,一野過撻著左唔少作為香港「中產」基本組成部份既公務員之後,曾特首民望外強中乾既特質就開始逐步表露。畢竟,一個由八百人「選」出黎既行政長官,本身就無得到人民既「授意」去充當整體社會既領袖。係咁既情況之下,要獲得民眾既支持,提升民望,本質上就有一定程度既困難…係「競選」時立誓話要「做好依份工」既曾特首無選擇用長遠既手法,即係以實積實效去爭取民間既支持,提振本身既民望,反而一味依靠政治化裝術,單純靠整色整水去充撐門面…手法上本身就值得質疑…

咁…政治化裝術…其實又係每一個政治人物既必修科目,唔單止曾特首要用,其實一貫以「正氣」形像掛帥既「公文袋」都唔可能唔去考慮…畢竟,政治係講feel既,諗起以後晚間新聞可能要對住「孽瘤」果d嘴藐藐既衰樣黎食飯,AK就有d作嘔…呢d咪就係叫做唔好feel囉…化裝術用得好,可以起相輔相承既效果,正如一個普通女仔,用左化裝之後,係可以「變靚d」,一個靚女玩full make up更加可以有「驚為天人」之效,但係,AK覺得,化裝係無辦法改變事實…所以,一塊豬扒,唔會因為你落左鬆肉粉,而變成黑豚…

係講今次單野之前,應該要正本清源,講講所謂既外傭稅係咩一回事,到底佢係一件「索女」,定係「豬扒」先…就咁講,外傭稅就係要果d僱用來自海外人士作為家庭傭工既僱主,每月繳交四百大洋予政府,作為僱員再培訓局經費既一個特殊稅項…由於當年政府唔想揹起向弱勢社群即係果d「菲印泰馬」開刀既污名,於是就向中產人士落手伸手要錢…結果自然係羊毛出在羊身上…一眾既「菲印泰馬」既工資就…哈哈哈…再睇…抽外傭稅去俾再培訓局去培訓本地工人,意思相當明顯…就係話緊果班「菲馬泰印」過黎香港搵食,搶走港人飯碗,於是攪到無得撈既港人要去接受再培訓,轉職做家庭僱工…所以,外傭稅本質上既潛台詞,係充滿左歧視性既…

咁,咁多「菲馬泰印」係香港,到底係咪搶左港人飯碗,咁又睇下外傭稅既受惠機構,再培訓局搞左d咩出黎…自從有左外傭稅依條大水喉之後,再培訓局係田二少既執掌之下大展拳腳,左右開弓…但係…每年報讀家庭傭工再培訓課程是人數就同特首既民望一致向下調整…well…其實,本地人對於「打住家工」,做人「馬姐」,「三姐」甚至「阿四」…依個行業係俾社會自然地淘汰左既…觀乎以前香港既大戶人家有打住家工既「馬姐」,好多都係四九年跟住上海果d大戶走難落黎…到今時今日依個香港,佢地其實一早絕左種…即係,雖然市場有demand,但係,其實係無supply既…

另一方面…「菲印泰馬」離鄉別井,隻身來港「打住家工」,偶然要忍受男主人既性騷擾,以及女主人既殘忍虐待…實質,佢地釋放左香港女性既工作能力…唔少中產家庭,可以「公一份,婆一份」就係靠個外傭幫你睇住頭家…依家香港,女人唔止撐起半邊天既局面…其實真係多得外傭唔少架…而依班對社會有貢獻既外傭,來到香港就算遇到一主好人家,佢地都係要受到政府政策既歧視…依個就係所謂既「動感之都」對待外人(諗起以前機場d標誌,外國人唔係foreigner…而係alien…)既方式…

外傭稅依單野…當然係政府提出啦…但係如果唔係有執政聯盟保送既話,又點可以成為法例呢?而,執政聯盟入面,當年表示支持既…似乎唔少都係自言話要係今屆立法會選舉之中爭取中產票源果d人士…所以…大家要帶眼識人啦…

好啦…講左一大輪仲未入局…又係AK既老毛病…咁…話說今年Inflation…我地偉大既香港政府,係睇事情既時候,每每都認為,事情既關鍵只係經濟問題,所以曾特首民望不振,係因為柴米油鹽係咁加既原因…於是…一向「民望於我如浮雲,浮雲於我如命根」既曾特首就閉關多日…度左條「絕世好橋」,打出「利民紓困」十大絕招…而免徵外傭稅…只係其中既一招…

兩年外傭稅,大拿拿成九千六百蚊…照計都真係唔錯,應該可以買到一d人心…偏偏…其中最大鑊既係…曾特首依十式,係閉關果陣度出黎既…由於急住上馬…係立法會到公布之前都唔外有無同下面果d「屍焗長」傾清楚…結果就攪出左今次既大頭佛…所以…曾特首決而不議,閉門造車既「強政勵治」風格,係出現既第一個原因…

之後掟左個政策出黎,牽涉到眾多政府部門,做execution果班友仔…其實大家都係做execution既,點會唔知,最好就係「多一事不如少一事,少一事不如少一便」,於是係細節上就度左九月一號既可以即時免稅,八月三十一號既要交主費依d咁有趣既執行模式…之後再同你講,下次同外傭續約果陣會唔收你外僱稅…即係…兩年之後…well…兩年之後,都唔好講話唔年有無需要請外傭,而係有無錢請外傭既問題…所以…官僚僵化既執行方式,係第二個導致局面演成今日不可收搭狀既另一原因…

當見到社會上民意反彈,「偷雞唔到蝕把米」又或者「賠了夫人又折兵」既情況之下…勞工及福利局局長張健宗粉墨登場,接手唱依一段荒腔走板既爛戲…又提出提前至八月一號實施免外傭稅,意圖補鑊…但係,依個bug fix根本fix唔到上個version果隻bug…結果又繼續俾人追打(well…佢仲順手一次過得罪埋負責簽證既入境處…所謂既「特事特辦」,唔知係唔係唔需要內部溝通咁解)…成個局面,又發展成為「腐肉腸」事件之中,其中一個最大錯誤既做法,就係果種擠牙膏一樣既quick fix…依種做法,以前Windows都俾人鬧死啦…何況係係政府政策上面出現??well…事件證明,我地既特區政府係唔會識得係錯誤中學習…錯左既野,係可以下次再錯多一鑊既…

正所謂治大國所烹小鮮….AK好肯定地覺得,曾特首以及佢底下果班官員…應該都唔係做廚既材料,應該考慮下離開「熱廚房」…佢話自己係一個「孤獨既推銷員」…唔知佢知唔知…依家既推銷員,係要揹數既…交唔到數,分分鐘係會死人架…

廣告


4 Responses to “才:點解外傭稅咁大鑊??”

  1. 成壇野竟然無一分錢益到我! 我未夠65歲無綜援無子女無請外傭住service apt唔洗交電費,但係就要照俾十七蚊1 litre 既油食加飯底加3蚊既快餐! 我算唔算隱蔽中年?

  2. A4兄,你唔係隱蔽中年,你只係隱蔽富豪遮。

    呢個政府,唉,連錢都唔識派…該猥…

  3. 我日日做到半夜兩、三點,稅就照交,福利永冇我份……
    一缸近十七蚊1 litre 既油,用唔倒兩星期,唉…明天又要入…

  4. 一缸近十七蚊1 litre 既油,用唔倒兩星期 <—-2 weeks is a myth, I can barely last for a week……


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: