戲:三國周郎赤壁…

11七月08

係寫依一篇之前,首先AK要先承認,自細睇三國演義既時候,其實AK就唔係太喜歡屢戰屢敗,滿口仁義道德既蜀國集團…同時地,對於臥龍先生既蓋世之才,每每都會有d質疑…之後去到有機會接觸正史,知道係陳壽既三國志入面,赤壁之戰既底蘊之後,就開始左對於係三國演義入面慘被打成「地底泥」(評價世至比亂世奸雄曹操更差)是周瑜公謹既「迷戀」(哈哈…用呢個寫好似誇左d,不過在下好似真係…每次打三國無雙既時候,第一個爆機一定係周瑜)…而亦都係因為發現演義同正史既不同,開始左AK對於歷史既興趣…

其實,經過左陳凱歌既「無極」,張藝謀既「英雄」,「滿城盡帶黃金甲」,「十面埋伏」以及馮小剛既「夜宴」之後,基本上可以講係對於華人導演處理中國歷史故事(無論真實或虛幻)既能力處於完全失望既狀態…偶然都係靠張之亮既「墨攻」,陳可辛既「投名狀」以及馮小剛既「集結號」(雖然有d唔拉更)養下命…但係之前硬食左果套李仁港既「三國之見龍卸甲」之下,眼見常山趙子龍俾人攪成一個「慘不忍睹」既地步,真係有d想死…AK就係懷住對周公謹既迷戀,以及對導演不信任既心情,係第一日公演既日子,車身360仆去睇吳宇森既「赤壁」…

首先,入場之前,大家做番d功課,吳宇森一早講左,赤壁係香港係會分開上下兩集,所以,大家唔好期待係一百四十分鐘既上集入面,會見到黃蓋苦肉計,火燒連環船,義釋華容道既場面(AK就唔係好想見到果d草船借箭,龐統鎖戰船…),第一集cover既部份係由火燒新野之後,長板坡上趙子龍單騎救主開始,去到曹軍與孫劉聯軍初陣曹軍受挫,再去到曹軍於赤壁對岸安營札寨為止…所以,完場果陣,見到「赤壁之戰,下會分解」既時候…唔好鼓躁同喧嘩…OK?

到左你睇完之後,AK相信你會明白,吳宇森係亞洲地區分開兩集上既苦心…其中好多場面,例如「孔北海祭戰旗」(歷史上,孔融係俾曹操以謗訕朝廷既罪名治罪,全家斬殺,不過…好似唔係赤壁開戰前既事),「曲有誤,周郎顧」等…其實,俾外國既觀眾睇…應該好難明白其中既細節,而佢地食慣左大辣,要連場動作…咁兩集剪埋一齊,應該可以比較suit佢地既要求…而事實上,依d情節,對於一般觀眾而言,其實對成套戲既節奏有一定既影響,可能會覺得有d拖戲…不過,對於三國迷來講,無左依d細節就真係唔得…

電影入面既第一場大戰係長板坡之役,胡軍飾演既趙雲自然係主角中既主角,單騎救主既一幕,其實都係玩緊「三國無雙」以一打百,不過論好睇,講氣魄來講,一定好過「見龍卸甲」入面既劉華(雖然其實AK好鐘意睇劉華)…吳宇森拍槍戰起家,不過今次係赤壁入面既打鬥場面都有一定既風格…尤其係趙雲及關羽經常性地奪下對手手中兵刃使用既連環場面,都相當之「吳宇森」…論打鬥,赤壁唔及投名狀…主要係,久缺實感…但係一定好過見龍卸甲…

第一場戰役中,最失望既係關二哥既出場…堂堂武聖出場…丹鳳眼,臥蠶眉,美鬚髯,青龍偃月刀(其實三國時代…真實地存在於戰場既武器係只有槍同劍)…齊哂…但係…點解唔見左赤兔既???無左赤兔…二哥真係有d唔似二哥,起碼無左個勢…

長板之後係孔明會見吳候孫權仲謀,係大殿上舌戰群儒…依段成個劇本真係拎住果一節既小說黎做…最終,孫權仍然未能下定主意…其實,歷史上好多人都誤會,以為孫權不如曹操,劉備,更加及唔上佢既阿哥孫策同老豆孫堅…但係AK又唔係咁睇(well…愛屋及烏,周瑜之後,AK係特別偏坦東吳)…戲入面張震既孫權戲唔多,但係都算係俾到果份感覺,唔單止背後一大堆神主牌,仲有成班老臣,以及一眾既江東父老…面對 稱八十萬大軍來襲,要一下子去下決定,到底是和是戰,相信並唔容易…過左赤壁之戰後,孫權其實都有所成長,歷史上曹操就曾經講過「生子當如孫仲謀」,但係一向對眼生係額頭既關羽面對孫權提親聚關羽之女為妻既時候就有「虎女豈可配犬子」之說,幸好之後呂蒙,陸遜幫孫權出左呢口污氣…

之後,諸葛孔明到赤壁初回周瑜,操演官兵,回顧音律,監管士卒幾幕,明顯係用黎描繪周瑜依個人物…不過…整體來講,始終係流於平面…整體來講,其實套戲入面,大多數既人物,都係流於平面既,如果演周瑜,孔明作為主角既都係咁…咁其他等而下者既就更加…之後一場瑜亮之音律相通,亦都係為左營造瑜亮相知相惜既感覺…去到孫權獵虎,揮刀斷案阻止向曹言降之後,套戲先叫做正式入左軌道…至於小喬嗎…林志玲既角色其實有d多餘,不過,作為一個花樽…都總有佢既作用既…

八卦陣單曹軍…其實赤壁,人人都只重水戰,但係其實係兩軍水師交戰前,亦的確有戰事發生係陸上…不過…吳宇森刻意加大蜀國大將既戲份,甚至連「弓腰姬」孫尚香都上陣,就好似有d搵戲黎做…當中,趙雲係八卦陣中單挑敵將,居然要周瑜出手,以身擋箭,之後周瑜再係陣中神勇殺敵,就真係太過誇張了一點吧…打完一場大將之後,仲要回到大本營交待同布伏線…依個處理明顯地無向Peter Jackson既Lord of the Ring: The Two Tower好好學習…

越講越長…整體來講,AK對於依套赤壁,有兩個不滿,第一,成套戲既角色,全部老哂…周瑜死既時候先三十六…打赤壁時應該係三十前後,而諸葛孔明比周瑜更遲出道,但係依家既梁朝偉同金城武…小喬,更加唔使講…

另外既一點就係…套戲d CG好差…好易就睇得出係經費所限既粗野…

(噚日仲有一點寫漏左,就係中村獅童個角色…「甘興」…AK睇海報果陣一路都覺得有問題,因為吳國當時根本無一個叫「甘興」既武將,以為係海報錯…點知套戲入面講明「甘興」係海盜出身…頂…DLS…吳宇森自己都攪錯…果個武將應該叫甘寧,佢既別字係興霸…之後合肥之戰同張遼打成平手既吳國第一大將…唉…真失禮…)

套戲成百四分鐘…好多地方都收多幾蚊…不過…AK覺得…都可以入場一看既(AK既基本立場係電影應該係戲院睇,所以一般都會鼓勵入場)…

廣告


9 Responses to “戲:三國周郎赤壁…”

  1. 1 Terence

    所以套戲過到咁大製作,都係咁既質素CG,可想而知個製作費都是水份居多。
    一係就有人落隔。
    如果搵後生角色,咁搵stephy、方力申做架喎,咁仲大鑊喎,哈哈。

  2. 我同你一樣,都好鍾意周瑜呢個人物。

  3. 每次打三國無雙既時候,小弟都只係用呂布…

    無他, 小弟技藝不精, 貪呂布夠勁, 三英戰呂布播! 哈…

  4. 噢! 周瑜! 支持!

  5. 昨天「三十會」還有人借這套戲,在信報寫「參政年齡門檻不應上升」添。

  6. 雖然有失斯文, 但係我都係想用高登名句黎回應你: 嘩! 嘩! 屌你正啊喂!

    會盡快去睇, 對長板一役有期望~

  7. 7 whn

    甘興呢個bug,香港十個打過三國志既電車男,應該有九個都睇得出,所以無理由會犯咁低級既錯。依我斷估,可能係為免俾憤青有位入,話做乜搵日本仔扮演中國歷史人物,所以先改一個字,整個甘興出黎。

  8. 咁未變左做「咁興」囉,哈哈!

  9. 9 AK

    Terence兄,
    其實…正確既講法就係無咩新人可以擔得起一套大製作…

    Derek兄,肥龍兄,
    東吳集團長年係曹,劉兩方既陰影之下,真係…好少何有同好喎…代孫氏一族向兩位表示謝意…

    On Dog兄,
    人中呂布,馬中赤兔…亦都因為鋒芒過露,成為三國日段時間中的眾矢之的,多次係眾敵夾攻之下…有時,對於呂布依一個三國時期既悲劇人物都有d同情…

    水姐,
    時代唔同,以前二十幾三十歲,可以治一國之軍,率百萬雄獅決戰場…依家依個時代…無計…作為戰後第三代既悲哀…

    Alan兄,
    去睇啦…電影係要入場先好睇既…

    whn兄,
    如果吳宇森真係因為要避開憤青既批評而妄顧歷史既真實…咁…就真係另一失望…

    Samsara姐姐,
    …搞爛gag?


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: