酒:斷片

26六月08

如果大家都係有番咁上下「酒齡」既朋友,相信都會試過下斷片呢一回事情…AK近排就係極短既時間之間,經歷左兩次…

第一次,其實一早就知要小心架啦…去食日本菜飲清酒,對面個女既唔係好飲得,所以連續三樽差不多都係AK隊左,之後同佢再轉番去「中童吧」,繼續飲威氏忌…之後有返知覺同記憶既時候,己經係…係張床上面果陣…好彩…唔見果個女仔係隔離…不過,AK就真係點都諗唔返自己點離開「中童吧」,甚至中間一段時間係酒吧入面既記憶都係完全消失…

膽粗粗,「大膽假設,小心求證」,係IM上面同當日果位女性朋友閒扯,對方似乎無提出要AK負責任,大致上表現正常…OK,即係初步過關啦…係架啦…男人,就係咁…見表面上無野,就真係以為無野,所以,女仔應該長期表現到有d野咁…但係,單純咁樣求證,都係唔得,於是走番去「中童」問Mandy…

Mandy:「無喎…果晚你其實一入黎我就知你飲左唔少,不過見你同個女仔都仲係對答如流…果晚落好大雨,你地等左好耐,到雨細d果陣你就送左佢出去上的士…之後番黎自己繼續飲,之後就爆左囉…哈哈哈…不過都無咩野丫,又無打爛我地d杯,你都係一野訓左係度咁解…無野喎…」

啊…原來係咁…斷左片既期間都仲保持到基本既風度…果然係幼承庭訓,力保不失…okok…

之後另外一次,又係食日本野,又係一條友飲到第三枝…對面個女仔就全程飲巨峰提子特飲,之後又係轉番去「中童吧」繼續,今次捱得耐一d,但係最終都係發現…自己係張床度…

開著部電話,見到有個簡訊,「thx for the dinner and drink tonite, i am so happy.」

well…應該都係…無野既…

下次同女仔飲既時候…都真係要避開d清酒先…次次都係衰係佢手上…

廣告


13 Responses to “酒:斷片”

  1. >己經係…係張床上面果陣…好彩…唔見果個女仔係隔離…
    如果係個男仔係隔離,咁…..

    酒醉三分醒嘛!我可以齋飲支半芝華士(啱啱郎底),所以我’醉’起上來,通常都係想’行凶’。哈哈!
    斷片?唉,總未試過。

  2. 2 Hung

    師兄你嚮無意識既狀況下,仲可以無穿無爛咁返到屋企,淨係呢下都值得還神啦…

  3. 我同意Hana姊話酒醉三分醒! 我都從未試過斷片!

  4. Agree! 清酒真係好易奶!

    有次隊完"酒鬼"唔夠喉, 黎多枝清酒, 清酒變得淡如水, 但結果…
    醉得一x糊塗!

    斷片? 未試過! 因"湯"完之後, 人都已好清醒.

  5. 唔怪得男人要鍛煉酒量啦,原來係驚失去知覺…

  6. 如果係驚失去知覺的話…

    咁仲要練就一身好身手先得呀!

    我淒~~~!

  7. 7 chika

    兄弟小心D呀…

    我唔係未試過斷片…大多係踏出的士之後…但第二日總係唔多記得自己點樣找數…

    唔係無同你講過.. 都講咗好幾年.. 呵呵..

    同你案情重組唔 係無意義ge….

  8. 醉左都唔會行兇? 你飲變隻sake? 講個名黎聽我以後唔飲佢! 釀一隻酒醉左唔會亂性, 呢間酒商好唔負責任! 點做野架…:p

    我覺得你果兩位女性朋有係扮無野, 其實想打鑊你: “有無搞錯! 醉晒都唔出手, 浪費我成晚時間……!#^%*$$%&@!!!”

    同你飲左數次, 發覺左個pattern, 你有無斷片我唔知, 你幾時到訂我大約估到, 留意左幾次, 你差唔多時會有個小動作, Vennessa都留意到~

  9. 9 AK

    Hana姐,
    如果隔離係個男仔…咁要睇清楚佢係吳彥祖定係八兩金…後者既話就殺佢滅口…

    酒醉三分醒…這個在下都知道,無奈AK係追酒飲果隻,如果係三分醒果個階段繼續唔停咁飲,push over the limit既話,AK就會比較容易出現「斷片」…

    借醉行兇?哈哈…依樣反而AK真係無試過…well…要行兇應該唔使借醉…

    齋飲唔溝酒…應該都可以既…但係一撞酒,尤其係清酒就真係好易揩野架…

    洪兄,
    男人,最緊要識得返屋企…

    馬沙兄,
    你同Hana姐都係果隻「知所進退」既高人,在下就…去得太盡…回頭太難…

    C.M.兄,
    AK依d係錯誤示範…

    On Dog兄,
    係架,「湯」度就一定唔會斷片,但係有d情況係,湯唔到既…咁…就出事…

    要練既…其實係控制自己既速度…

    Chika兄,
    近年斷片既次數嚴重左…真係要聽下話,小心d…不過,在下斷片似乎都係出現係相伴既美女離開之後…無機會借醉行兇…

    Alan兄,
    AK「斷片」既情況,通常係「完全沉默」,「行動不能」…所以都唔係隻酒既問題…

    果兩位美人…應該不致於咁諗卦…驚驚…

    係咩係咩…咁下次要通知在下…

  10. 或者女士想你有野呢,哈哈。
    咪住先,係咪同一個女仔先?哈哈。
    祝成功。

  11. 11 野蠻郡主

    你丫…真係睇少眼都唔得啦!

    UM……咁樣係咪即係當冇事發生,唔係喎!有冇事發生過你應該架喎!
    仲有,係張床到冇問題,你有冇衫係身架!(對不起,D問題太白痴了)

    遲D好似D人咁訓街,最衰我依排少出夜街,
    如果唔係,我一定救你返屋企,唔好失禮街坊呀!

    呵呵呵!

  12. >>要練既…其實係控制自己既速度…

    唔明。係咩速度呀?同有冇知覺有咩關係呀?

  13. 我上星期五晚就啱啱斷完片….@_@"


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: