才: 食蘋果哽死?

10六月08

因為星期二要番工,所以犧牲左噚晚場荷蘭對意大利,結果係今朝晨咁早起身,知道超精彩既3:0比數之後有d想死既感覺…就係依個時候,公仔箱(最近屋企以$0既代價,繼承左一部d死有錢人用舊左,換機之後唔用既42寸Plasma,AK覺得自己對眼開始因為要照顧過份龐大既可視空間而出現蒼蠅複眼化現像)入面既財經新聞傳來震撼既消息「3G 8GB iphone美國定價199」!!

之後AK諗左一諗,同Apple簽左約係香港負責銷售iphone既係…無錯…就係…唉…無理由為左食3隻蘋果而哽死自己喎…真係…

番到公司,同做開水貨電話既咬粉傾左兩嘴,佢話,199個價一定係上台價,淨機根本無可能做到…咁…可唔可以解鎖呢?咬粉話,解銷一定得,但係你一係用正價買部3G水貨機番來,一係就傻仔地走去3出機,之後爆鎖轉用Smartone…結果係一個人交每個月交兩份台費…well…唔好咁喪啦…我只係一個潮州兒童(冒認),唔係「潮童」喎…

不過晏晝同IT人鹿米傾開…有以下對話:

AK:「其實最大問題真係3,無理由為左食蘋果而哽死架…」
鹿:「到時解左鎖就人人有機用架啦…」
AK:「解鎖水貨即係正價…貴呀…」
鹿:「好多人唔care個價既,當佢地係fashion icon咋麻,出面咁多潮童…多左3g,又多d人買」
AK:「…」(下?? AK無聽過有人為左3g出電話過喎…)
鹿:「買得iphone既都係d潮人異士,所以唔care個價。你睇d人追手機追得咁貼,就知到d人真係唔多理個價錢,最緊要潮!!」
鹿:「如果在意個價,就不一定要買iphone了,買部motorla都得…」
AK:「我以為果d潮童應該一早買左,未買果d就係我依隻,左度右度果d…」
鹿:「你去先達睇下d人,真係好鬼狼架,好似唔駛錢咁…」
AK:「咁又係…不過如果係3,199美今我都唔係好想,但係如果唔係3,要我五千蚊買部電話,我都唔想…」
鹿:「另一個例子就係,為左潮,用3都唔介意,亦大有人在。」
AK:「我介意…唔響既電話,即係無電話…」
鹿:「我公司那幾個阿頭,買左,六七千元都照買。另一個阿姐,其實咩都唔識,但有錢,照買,又五六千咁買。」
鹿:「所以蘋果推廣手法,確係有一手,將手機當作一種fashion咁賣…」
AK:「唔怪得知d名牌袋可以做到一皮野一隻啦!」
鹿:「所以咪就係咁解,佢用LV做套iphone,你話夠勁未。BV,Lv果d電話繩可以成千蚊一條,你話死未?iphone同佢d周邊產品既profit margin,根本就係天價…所以iphone所針對既market,其實未必是你囉,哈哈。」
AK:「係…我知我係死老餅…」

廣告


15 Responses to “才: 食蘋果哽死?”

  1. 嘩嘩嘩,我還是喜歡大陸版「愛phone」,中國加油。

  2. 2 AK

    Terence兄,
    咁…你會唔會唔要部Wii…整番部國產既「威力棒」?

  3. 3 Terence

    AK兄
    我部Wii早已放入博物館,作為歷史檔案一員。我估有大半年冇開過來玩了。哈哈。
    所以「威力棒」唔買了,但未知要唔要買「威而鋼」呢,哈哈。

  4. AK兄:

    別來無恙, 有失遠迎, 請多多恕罪恕罪。

    講起呢部新iphone, 今日一朝早就俾思媽"嘩"醒, 她話: “嘩!好抵呀!"

    我有諗過買, 但記得舊版的問題係電池好快用完, 但新版有無呢個問題, 真係等到有人做白老鼠至知。

    賣到咁平, 帶出少少marketing的concern係:
    1. 先平後貴(Apple公司無話呢個price係fix幾耐, 別忘記仲要concern埋滙率問題), 這是一般做marketing的技倆。
    2. 賣到咁平, 無錯, technology疑似high-tech o左, 但係咪連入面的materials同樣提升還是inferior了(例如無相機功能), 這亦是個問題。
    3. 暫時而言, 會在"衫"發售, 但如果等多兩個月(屆時大部份電訊商和大型電器店都有得賣), 會否變成割喉戰?

    摩記以前的機都有問題, 但願它呢期部新機, 幫摩記爭回market share。

    不過, 我仍是屬意諾記—-習慣問題。

  5. 久仰大名!又出山寫文啦,好极好极!

    我唔中意換手機,但咁平當mp3用都抵啦,所以都想買。

  6. 6 AK

    Terence兄,
    所以AK一直覺得Wii只係一個潮流…來得快去得更快…對於一個gamer來講,360 / PS3先係王道…

    Karen姐,
    好似話今次舊電會耐用d…但係都係唔鐘意佢一體化電池既設計,想換電都唔得…

    據知,3會有一段獨家時期,之後係唔係百花齊放就唔知…因為今次同上次唔同,Apple唔會係服務費上分紅,而佢地個出貨價同199美元之間既差價,係要零售商去補貼既…所以可以預期,3個plan既收費一定勁高,合約年期亦會勁長…

    Hana姐,
    在下都係「姣婆守唔到寡」果隻…於是又寫寫寫…

    其實…iphone同佢自己部iPod Touch根本係同一部機,只係差左條天線,依家3G iphone咁鬼平…分分鐘iPod Touch要摺啦…

  7. 7

    終於等到你返黎喇ak!!!
    我一定要記低你個email~保持聯絡!

    iPhone占仔都未用過, 但係身邊好多"潮"人都話一定要有部係手, 究竟佢地係追潮流丫, 定係睇到咁平可以做潮童, 先想買呢?

  8. iPhone的補貼價其實向來有之,有如零機價一樣,特別在日本,NTT DoCoMo的手機,常常好靚又好正,但又好鬼平,因為電訊公司來個大補貼,才有這個價錢,hitachi、sharp等更是表表者。日本手機其實真正的主宰不是手機商,而是電訊商如KDDI、NTT DoCoMo等,他們每年會推一份Spec比手機商,要求佢地跟個spec發展手機,其實都對架,貼近客戶,未必是手機,而是電訊商。

    除左itouch可以摺,ipod classic等可以放入歷史館都得,可能是最快放入歷史館產物都唔定喎,哈哈。

    wii其實都想繼續玩,特別是個wii fit呢,大時大等,一班人玩,又幾搞笑。日本好多銀髮族人士喜歡玩wii。因為貪佢夠低能。AK兄以你的遊戲專才,wii是較難吸引到你的。或者到你銀髮族後,另作別論乎?哈哈。

  9. LV/BV電話繩係iPhone個concept仲喺SJ個屎塔果陣已經熱賣緊喇woh, 又入iPhone數?

    講開名牌袋, 我有樣嘢想講好耐: 點解一定要用一種反智眼光去看待一群用名牌袋既人呢? 點解個袋既售價超越咗佢既通識價值就代表個買家係俾某種外在因素"昆"咗去買呢個袋呢? 同樣道理, 係咪一個人走落高登砌部超勁電腦就一定係御宅呢? 相反, 係咪著10蚊3件既tee同用$1888一部既電腦就代表佢係精明消費呢?

    的確, 有部份人係為名牌而名牌, 95%以上價值放喺果幾個英文之母之上, 但唔可以以偏蓋全, 將所有買名牌既人都打成傻仔一族。試想像一群無論收入地位職級等等都有返咁上下既人, 唔通真係樣樣掂但係去到買嘢就忽然碌葛? 平時真係"秒秒鐘幾廿萬上落"既行入Harvey Nichols就會智商減半? 一隻白痴"懂得用xxx, 先算得上真享受"之類既爛廣告就真係可以昆到大劉每年買400萬Hermes(當然, 俾女昆另計, 此乃後話, 按下不表)? 係邏輯上於理不合囉…

    我討厭人盲目崇尚名牌, 但係更唔想睇到人盲目批評名牌。當然, 我唔係話緊你, 講開又講only 🙂

  10. 10 AK

    占兄,
    算啦…都係「姣婆守唔到寡」…

    當一樣野去到由product轉化為trend既時候,好多野都唔可以再用舊既model去做分析,思考問題既時候要採另一個角度…

    Terence兄,
    補貼制度其實一貫係電訊業中存在,而且對於電訊商以至手機廠來說,依個制度其實都有必要…不過今次iphone去到199既價位,真係去到好盡…其他廠牌既手機亦都必然受到衝擊…Apple應該係睇住3G高速上網收費服務個市場,所以希望一舉「谷大」個市佔率…

    Alan兄,
    在下當然唔敢一竹篙「辨」死一船人啦,亦都深深明白,一件product由低檔次產品去到名牌,應該係有佢既理由既(例如女人街三十蚊一隻同victoria’s secert係唔同既…AK都識得睇)…其中當然有你地依班對design,fashion有研究既高人…不過…正如之前所講,一件product由產品發展為一個潮流之後,好多野都會唔同左…

    你買HiFi,你會考慮佢係唔係「高音甜,中音準,低音勁」,買樓會睇地區,樓層,座向…,買科技產品,spec表係基本參考資料,就算係最原始既交易,你上141都要睇下相(雖然好多都係PS後產品)…買名牌,當然都會有睇catalog…但係當某一樣野去到潮流既時候,對於一班follower而言,以上既考慮就會唔再存在,背後推動既係「羊群心理」下產生既snowball effect…

    AK唔反對崇尚名牌(AK有時都會),亦都唔係話所有用名牌者皆傻仔,但係對於潮流呢樣野,在下一貫有d抗拒…畢竟,與其做一個follower,不如做一個trend setter…

  11. 3… 我情願買水貨。

  12. 12 AK

    Elaine姐,
    3…我情願等…平都唔用3…死都唔用3…

  13. 13 kw

    AK兄,等左差唔多一年,終於可以再欣賞你既文采喇

    iphone,我諗對於我黎講,係搭車等人時聽下歌之餘仲可以上下網,3g同2g對我黎講只係上網速度上既分別。不過,有得揀,我都唔會揀件爛衫。如果有水貨而個價錢係一個合理既範圍 (最少比htc既機為平),小弟都會入返部。

  14. 14 AK

    kw兄,
    AK無咩墨水架咋,遊戲文章,談不上甚麼文采呢…kw兄抬舉了…

    要記得,「有得揀,你先係老闆。」唔好為左食蘋果而哽死呀…

  15. 15 野蠻郡主

    講到IPHONE,我都有意思…不過我點都要轉3..但係依家個部電話又未壞,可能又唔會買住,唔必需嘛!


發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s


%d 位部落客按了讚: